- Samningur
- Stjórnarskrá
- Jafnræði
|
Fimmtudaginn
8. nóvember 2012. |
Nr. 547/2011. |
Íslenska ríkið (Einar Karl
Hallvarðsson hrl.) gegn Sólheimum ses. (Karl Axelsson
hrl.) og gagnsök |
Samningur. Stjórnarskrá. Jafnræði.
Félagsmálaráðherra gerði 8. maí 2004 þjónustusamning
til 31. desember 2008 við sjálfseignarstofnunina S, þar sem ráðuneytið
skuldbatt sig meðal annars til að leggja til að tiltekin fjárhæð yrði veitt til
starfsemi S með fjárlögum hvers árs. Með fjárlögum ársins 2009 var fjárhæð til
handa S skert um 4% frá því sem aðilar höfðu samið um. S höfðaði mál á hendur Í
og krafðist aðallega viðurkenningar þess að skerðingin hefði verið óheimil, þar
sem hún bryti gegn 65. gr. og 1. mgr. 76. gr. stjórnarskrárinnar, en til vara
að viðurkennt yrði að Í hefði með skerðingunni vanefnt skuldbindingar sínar að
samningnum. Í dómi Hæstaréttar var talið að Alþingi hefði haft vald til að
ákveða fjárveitingu til S og að S gæti ekki byggt rétt til frekari
fjárveitingar á útrunnum samningi. Var Í því sýknað af kröfum S.
Dómur Hæstaréttar.
Mál
þetta dæma hæstaréttardómararnir Markús Sigurbjörnsson, Árni Kolbeinsson,
Gunnlaugur Claessen, Ingibjörg Benediktsdóttir og Ólafur Börkur Þorvaldsson.
Aðaláfrýjandi
skaut málinu til Hæstaréttar 6. október 2011. Hann krefst sýknu af kröfum
gagnáfrýjanda og málskostnaðar í héraði og fyrir Hæstarétti.
Gagnáfrýjandi
áfrýjaði héraðsdómi fyrir sitt leyti 15. desember 2011. Hann krefst aðallega
viðurkenningar á því að 4% skerðing er fjárframlag aðaláfrýjanda til hans sætti
með fjárlögum fyrir árið 2009 hafi verið óheimil, en til vara að héraðsdómur
verði staðfestur. Í báðum tilvikum krefst gagnáfrýjandi staðfestingar á
málskostnaðarákvörðun héraðsdóms og málskostnaðar fyrir Hæstarétti.
I
Gagnáfrýjandi
er sjálfseignarstofnun sem meðal annars hefur með höndum þjónustu við fólk með
þroskahömlun. Hinn 8. maí 2004 gerði félagsmálaráðherra þjónustusamning við
gagnáfrýjanda samkvæmt heimild í þágildandi 14. gr. laga nr. 59/1992 um málefni
fatlaðra og 30. gr. laga nr. 88/1997 um fjárreiður ríkisins. Með samningnum tók
gagnáfrýjandi að sér að veita 40 fötluðum íbúum á Sólheimum í Grímsnesi
þjónustu við búsetu og atvinnu samkvæmt lögum nr. 59/1992, jafnframt því að
lýsa sig reiðubúinn til að eiga á gildistíma samningsins viðræður við
félagsmálaráðuneytið um þjónustu við fleiri fatlaða einstaklinga gegn sérstakri
greiðslu. Í 1. grein samningsins sagði að starfsemi gagnáfrýjanda skyldi hagað
í samræmi við I. kafla laga nr. 59/1992 og reglugerðir settar samkvæmt þeim. Í
2. grein var að finna almenn ákvæði um starfsemi Sólheima samkvæmt samningnum,
en 3., 4. og 5. grein voru um markmið samningsins, verkefni gagnáfrýjanda
samkvæmt honum og umsóknir um búsetu á Sólheimum og mat á þjónustuþörf. Í 6.
grein var að finna ákvæði um fjármál gagnáfrýjanda, þar á meðal um greiðslur
til hans vegna einstakra rekstrarliða samkvæmt samningnum. Í grein 6.1 sagði:
„Ráðuneytið mun leggja til að veitt verði fé á fjárlögum sem Sólheimar ráðstafa
í samræmi við ákvæði samningsins.“ Í grein 6.2 kom fram að árlegar greiðslur á
grundvelli samningsins væru vegna „veittrar þjónustu, umsjónar með rekstri,
ráðgjafar, næturvaktar og annars sameiginlegs kostnaðar“, samtals að fjárhæð
173.500.000 krónur. Í ákvæðinu voru greiðslurnar sundurliðaðar eftir
viðfangsefnum og jafnframt vísað til fylgiskjals með samningnum sem hafði að
geyma enn frekari skýringar um þetta. Þá sagði í grein 6.6 að fjárhæðir
samkvæmt grein 6.2 væru settar fram miðað við verðlagsforsendur fjárlaga fyrir
árið 2004, en frá og með árinu 2005 myndu þær breytast árlega í samræmi við
launa- og verðlagsforsendur sem lægju til grundvallar árlegum fjárveitingum í
fjárlögum hvers árs. Af heildarframlagi ríkisins samkvæmt grein 6.2 skyldu 80%
teljast vera vegna launakostnaðar, en 20% vegna annars kostnaðar sem breytast
skyldi samkvæmt forsendum fjárlaga um almennar verðlagsbreytingar á sama
kostnaði hjá svæðisskrifstofum málefna fatlaðra. Færi fram endurmat á launa- og
verðlagsforsendum fjárveitinga til svæðisskrifstofa málefna fatlaðra innan
ársins skyldi endurskoða fjárframlag til gagnáfrýjanda með sama hætti. Samkvæmt
grein 6.3 skyldi árlegt framlag innt af hendi með 12 jöfnum greiðslum fyrsta
virka dag hvers mánaðar. Þá var í grein 6.4 eftirfarandi ákvæði: „Stjórn
Sólheima er heimilt að ráðstafa rekstrarafgangi til myndunar varasjóðs.
Hlutverk sjóðsins er að mæta óvæntum áföllum í rekstri og leggja fram fé til
bættrar þjónustu og framkvæmda í samræmi við markmið skipulagsskrár Sólheima.
Árlegt framlag í varasjóð má þó ekki nema hærri upphæð en 4% af upphæð
samnings.“ Í 10. grein er bar heitið „Gildistími, uppsögn og
endurskoðunarákvæði“ sagði: „Samningur þessi sem gerður er til fimm ára öðlast
gildi hinn 1. janúar 2004. Samningsaðilar skulu ákveða sameiginlega fyrir 1.
maí 2008 hvort stefna skuli að endurnýjun samningsins. 10.1 Samningurinn er
uppsegjanlegur af beggja hálfu með a.m.k. 12 mánaða fyrirvara miðað við áramót.
Uppsögn skal vera skrifleg. 10.2 Hvor samningsaðili getur óskað eftir því fyrir
15. mars ár hvert að yfirfara samninginn, í fyrsta sinn í mars 2005, með
tilliti til óvæntra eða umfangsmikilla breytinga á þörf fyrir þjónustu á
Sólheimum, sbr. fylgiskjal 10. 10.3 Breytist forsendur samningsins verulega
skal hann endurskoðaður. Breyttar forsendur teljast m.a.: 10.3.1 Breytingar á
ákvæðum laga um málefni fatlaðra um umfang og gæði þjónustu við fatlaða. 10.3.2
Ef samningsaðilar geta ekki af einhverjum ástæðum staðið við skuldbindingar
sínar og það leiðir til verulegrar röskunar á þeirri þjónustu sem veitt er á
Sólheimum.“
Með
bréfi til félagsmálaráðherra 30. apríl 2008 óskaði gagnáfrýjandi eftir því að
samningurinn frá 8. maí 2004 yrði endurnýjaður og vísaði í því sambandi til
áðurnefndrar 10. greinar hans. Samkvæmt gögnum málsins svaraði ráðherra ekki
þessu erindi.
Í frumvarpi
til fjárlaga fyrir árið 2009 var ráðgert að greiðslur til gagnáfrýjanda úr
ríkissjóði á því ári yrðu alls 277.400.000 krónur og mun sú fjárhæð hafa verið
í samræmi við ákvæði samningsins 8. maí 2004. Í tillögum meiri hluta
fjárlaganefndar um breytingar á frumvarpinu, sem komu fram við 2. umræðu um
það, var lögð til breyting á fjárveitingu til gagnáfrýjanda, sem eftir gögnum
málsins var skýrð með þessari athugasemd: „Gerð er tillaga um 11 m.kr. lækkun á
liðnum. Fjárhæðin svarar til 4% lækkunar útgjalda en það er það hlutfall sem
heimilið hefur tekið af árlegu framlagi ríkissjóðs í sérstakan varasjóð.
Heimild til þess hefur byggt á ákvæði í þjónustusamningi félags- og
tryggingamálaráðuneytisins og Sólheima sem rennur út 31. desember 2008.“ Þá kom fram í skýringum með greiðsluáætlun
samkvæmt þessum fjárlagalið að um væri að ræða „áætlaðar greiðslur til Sólheima
þar til þjónustusamningur liggur fyrir.“ Var frumvarpið samþykkt með þessari
breytingu 22. desember 2008 og varð að fjárlögum fyrir árið 2009 nr. 177/2008,
en samkvæmt þeim nam fjárveiting til gagnáfrýjanda 268.000.000 krónum.
Í
samþykkt fulltrúaráðs gagnáfrýjanda 24. febrúar 2009 var mótmælt framangreindri
lækkun fjárveitingar til hans sem sagt var að orðið hafi fyrir atbeina
ráðuneytisins og væri skerðingin meiri en aðrar sambærilegar stofnanir þyrftu
að þola. Þá sagði meðal annars í samþykktinni: „Að athuguðu máli telur
fulltrúaráð Sólheima forsendur brostnar til viðræðna við Félags- og
tryggingamálaráðuneytið um framlengingu og/eða gerð nýs þjónustusamnings.“ Í
bréfi ráðuneytisins til gagnáfrýjanda 26. maí 2009 var því meðal annars lýst
yfir að það væri reiðubúið til að „framlengja út árið 2009 þann þjónustusamning
... sem rann út 31. desember sl. að teknu tilliti til þeirrar breytingar sem gerð
var við afgreiðslu fjárlaga 2009“, svo og að gera nýjan þjónustusamning til
lengri tíma í kjölfar stjórnsýsluúttektar ríkisendurskoðunar á starfsemi
gagnáfrýjanda. Frekari bréfaskipti milli gagnáfrýjanda og ráðuneytisins og
fundir þeirra leiddu ekki til breytinga á fjárveitingum til þess fyrrnefnda og
höfðaði hann mál þetta 28. júní 2010.
II
Endanleg
aðalkrafa gagnáfrýjanda er á þann veg að hann krefst viðurkenningar á því að 4%
skerðing sú sem fjárveiting aðaláfrýjanda til hans sætti með fjárlögum fyrir
árið 2009 hafi verið óheimil, en kröfu þessa reisir hann á því að skerðingin
hafi falið í sér brot á 1. mgr. 65. gr. og 1. mgr. 76. gr. stjórnarskrárinnar.
Til vara krefst hann að viðurkennt verði að með skerðingunni hafi aðaláfrýjandi
vanefnt skuldbindingar sínar samkvæmt samningnum 8. maí 2004. Skilja verður
málatilbúnað gagnáfrýjanda svo að hann byggi þessar dómkröfur á réttindum sem
hann telur sig eiga samkvæmt þessum samningi, enda væri hann að öðrum kosti að
leita eftir því að kveðið yrði í málinu á um réttindi honum til handa sem ekki
er á valdi dómstóla að ákveða heldur þyrfti lagaheimild til, sbr. 41. gr.
stjórnarskrárinnar.
Samkvæmt
1. mgr. 30. gr. laga nr. 88/1997, sem vísað var til í samningnum 8. maí 2004, er einstökum
ráðherrum heimilt, með samþykki fjármálaráðherra, að gera verksamninga og
samninga um rekstrarverkefni, sem undir ráðuneyti þeirra heyra, til lengri tíma
en eins árs við ríkisstofnun sem sinnt hefur verkefninu, aðrar ríkisstofnanir,
sveitarfélög eða einkaaðila, enda sé áætlað fyrir verkefninu í fjárlögum. Með
rekstrarverkefni sé átt við afmarkaða rekstrarþætti eða rekstur ríkisstofnunar
í heild sinni vegna viðfangsefna eða þjónustu sem ýmist er kveðið á um í lögum
að ríkið skuli veita og standa undir kostnaði af eða eru liðir í því að
ríkisaðili geti rækt hlutverk sitt. Samkvæmt 5. mgr. 30. gr. laganna skal í
slíkum samningi um rekstrarverkefni meðal annars skilgreina umfang og gæði
þeirrar þjónustu sem ríkissjóður kaupir, samningstíma, greiðslur úr ríkissjóði,
eftirlit með þjónustu og meðferð ágreiningsmála. Samningstími skuli almennt
lengstur vera sex ár í senn og uppsagnarfrestur samnings stystur vera þrír
mánuðir. Í samræmi við fyrirmæli í 5. mgr. 30. gr. laganna setti
fjármálaráðherra reglugerð nr. 343/2006 um samninga um rekstrarverkefni sem ráðuneyti og ríkisstofnanir gera til
lengri tíma en eins árs. Í 17. gr. reglugerðarinnar kemur fram að við samningslok skuli verkkaupi gera
sérstaka úttekt á framkvæmd samnings þar sem meta skuli hvernig til hafi tekist
á samningstíma. Slík úttekt skuli lögð til grundvallar við ákvörðun um framhald
rekstrarverkefnis og hún liggja fyrir áður en þjónustusamningur sé endurnýjaður
eða framlengdur.
Samningurinn
8. maí 2004 var með gildistíma frá 1. janúar sama ár. Þótt segja hafi mátt upp
samningnum með 12 mánaða fyrirvara miðað við áramót var hann einnig
tímabundinn, eins og gert var ráð fyrir í 30. gr. laga nr. 88/1997. Eins og að
framan greinir þurfti að viðhafa formlega aðferð við endurnýjun hans með nýjum
samningi og bera framlögð bréfaskipti með sér að báðum samningsaðilunum hafi
verið það fullljóst. Samkvæmt 10. gr. samningsins rann hann út 31. desember
2008 en eins áður segir var sú staðreynd forsenda fyrir fjárveitingu til
gagnáfrýjanda í fjárlögum fyrir árið 2009. Alþingi hafði með höndum að ákveða
fjárveitingu til gagnáfrýjanda fyrir árið 2009 með þeim hætti sem það gerði og
úr því sem komið var gat gagnáfrýjandi ekki byggt rétt til frekari
fjárveitingar á samningi sem eftir efni sínu hafði runnið sitt skeið á enda.
Verður aðaláfrýjandi því þegar af þessari ástæðu sýknaður af kröfum
gagnáfrýjanda.
Gagnáfrýjandi
verður dæmdur til að greiða aðaláfrýjanda málskostnað í héraði og fyrir
Hæstarétti eins og í dómsorði greinir.
Dómsorð:
Aðaláfrýjandi,
íslenska ríkið, er sýkn af kröfum gagnáfrýjanda, Sólheima ses.
Gagnáfrýjandi
greiði aðaláfrýjanda samtals 1.500.000 krónur í málskostnað í héraði og fyrir
Hæstarétti.
Dómur Héraðsdóms Reykjavíkur 28. júlí 2011.
Mál þetta,
sem var dómtekið 9. júní 201l, er höfðað fyrir Héraðsdómi Reykjavíkur af
Sólheimum sjálfseignarstofnun, Sólheimum, Selfossi, gegn íslenska ríkinu, með
stefnu áritaðri um birtingu 28. júní 2010.
Dómkröfur
stefnanda eru aðallega þær að viðurkennt verði að sú 4% skerðing sem
fjárframlag til hans sætti með fjárlögum ársins 2009 hafi verið ólögmæt.
Til vara
gerir stefnandi þá kröfu að viðurkennt verði að með því að skerða fjárframlag
til hans um 4% með fjárlögum ársins 2009 hafi stefndi vanefnt
samningsskuldbindingar sínar samkvæmt þjónustusamningi stefnanda við
félagsmálaráðuneytið, dags. 8. maí 2004.
Loks er
þess krafist að stefndi verði dæmdur til að greiða stefnanda málskostnað að
skaðlausu.
Dómkröfur
stefnda eru þær að hann verði sýknaður af öllum dómkröfum stefnanda og að
stefnandi verði dæmdur til að greiða stefnda málskostnað samkvæmt mati dómsins.
Málsatvik
Stefnandi,
Sólheimar, er sjálfseignarstofnun sem þjónustar fólk með þroskahömlun. Starfsemin
fellur undir lög nr. 59/1992, um málefni fatlaðra (sbr. nú lög nr. 59/1992 um
málefni fatlaðs fólks, eins og þeim var breytt með lögum nr. 152/2010), og
hefur fengið fjárframlög úr ríkissjóði á grundvelli fjárlaga ár hvert.
Samkvæmt
14. gr. fyrrgreindra laga er félags- og tryggingamálaráðherra heimilt að gera
þjónustusamninga við sjálfseignarstofnanir sem þjónusta fatlað fólk.
Í maí 2004
gerðu félagsmálaráðuneytið og stefnandi með sér samning um þjónustu stefnanda
við fólk með fötlun með heimild í fyrrnefndri 14. gr. laga nr. 59/1992 og 30.
gr. laga nr. 88/1997 um fjárreiður ríkisins. Samkvæmt samningnum tók hann gildi
1. janúar 2004 og gilti til ársloka 2008. Með bréfi til stefnda, dags. 30.
apríl 2008, óskaði stefnandi eftir því að samningurinn yrði framlengdur. Því
bréfi var þó ekki svarað sérstaklega af hálfu félagsmálaráðuneytisins. Hins
vegar hefur stefnandi haldið áfram að veita þjónustu á grundvelli samningsins
og fengið til þess fjárveitingar á grundvelli fjárlaga.
Hinn 1.
október 2008 lagði fjármálaráðherra frumvarp til fjárlaga fyrir árið 2009 fram
á Alþingi. Þegar frumvarp þetta var lagt fram var fjárveiting til Sólheima í
samræmi við þjónustusamning aðila. Þegar kom að afgreiðslu fjárlaga fyrir árið
2009 var fjárframlag félagsmálaráðuneytisins til stefnanda lækkað um sem nemur
4% í samræmi við breytingartillögu sem var sett fram.
Stefnandi
hefur höfðað mál þetta aðallega til viðurkenningar á því að fyrrnefnd 4%
skerðing sem fjárframlag til hans sætti með fjárlögum ársins 2009 hafi verið ólögmæt.
Til vara gerir stefnandi þá kröfu að viðurkennt verði að með því að skerða
fjárframlag til hans um 4% með fjárlögum ársins 2009 hafi stefndi vanefnt
samningsskuldbindingar sínar samkvæmt þjónustusamningi stefnanda við
félagsmálaráðuneytið, dags. 8. maí 2004.
Málsástæður og lagarök stefnanda
Stefnandi
byggir aðalkröfu sína í fyrsta lagi á því að umrædd 4% skerðing á fjárframlögum
til hans samkvæmt fjárlögum fyrir árið 2009 feli í sér brot á bæði
jafnræðisreglu 65. gr. laga nr. 33/1944, stjórnarskrá lýðveldisins Íslands (hér
eftir stjórnarskráin), og rétti til framfærsluaðstoðar sem beri að tryggja án
mismununar samkvæmt 1. mgr. 76. gr. stjórnarskrárinnar og sé þar með ólögmæt.
Byggir
stefnandi á því að með skerðingunni hafi hann sem aðili sem rækir þjónustu
fyrir fatlaða einstaklinga sætt ójafnræði sem brjóti í bága við 65. gr.
stjórnarskrárinnar. Þá hafi fötluðum íbúum Sólheima jafnframt verið gróflega
mismunað með skerðingunni.
Stefnandi
kveður að aðrir sem veiti fötluðum þjónustu hafi ekki sætt sambærilegri
skerðingu. Sé þetta til að mynda ljóst þegar fjárveiting til stefnanda samkvæmt
fjárlögum fyrir árið 2009 sé borin saman við fjárveitingar til
Skálatúnsheimilisins, Styrktarfélagsins Áss og Skaftholts. Umrædd skerðing hafi
eingöngu verið rökstudd með vísan til þess að skerðingin hafi svarað til þess
að stefnanda hafi verið heimilt að taka 4% af árlegu framlagi úr ríkissjóði og
koma fyrir í sérstökum varasjóði. Stefnandi kveður það rétt að hann hafi slíka
heimild samkvæmt þjónustusamningi við félagsmálaráðuneytið. Þannig sé ákvæði
6.4 þjónustusamningsins frá 8. maí 2004 svohljóðandi:
Stjórn
Sólheima er heimilt að ráðstafa rekstrarafgangi til myndunar varasjóðs.
Hlutverk sjóðsins er að mæta óvæntum áföllum í rekstri og leggja fram fé til
bættrar þjónustu og framkvæmda í samræmi við markmið skipulagsskrár Sólheima.
Árlegt framlag í varasjóð má þó ekki nema hærri upphæð en 4% af upphæð
samnings.
Hins vegar hafi aðrar stofnanir sem
reki þjónustu fyrir fatlaða jafnframt slíka heimild og megi sem dæmi nefna að í
þjónustusamningi félagsmálaráðuneytis og Skálatúnsheimilisins frá 6. janúar
2005 sé að finna svipað ákvæði sem mæli fyrir um skyldu til að ráðstafa
rekstrarafgangi í varasjóð:
Verði um
rekstrarafgang að ræða ber Skálatúnsheimilinu að ráðstafa hagnaðinum til
myndunar varasjóðs til að mæta hugsanlegum halla eða til bygginga, fegrunar
umhverfis og annarra framkvæmda í samræmi við markmið skipulagsskrár
Skálatúnsheimilisins, og bættrar þjónustu við fatlaða í þjónustu heimilisins.
Stefnandi
telji ljóst að hann sé í sambærilegri stöðu og Skálatúnsheimilið, enda veiti
báðir aðilar fötluðum einstaklingum þjónustu á grundvelli þjónustusamnings við
félagsmálaráðuneytið. Af ársreikningum Skálatúnsheimilisins í gildistíð umrædds
þjónustusamnings verði glöggt ráðið að Skálatúnsheimilið hafi ráðstafað
fjármagni í varasjóð. Þannig hafi 21.060.000 krónur verið í varasjóði
heimilisins í lok árs 2005, 24.109.867 krónur í lok árs 2006 og 13.480.932
krónur í lok árs 2007. Hins vegar hafi sjóðurinn verið neikvæður um 2.103.232
krónur í lok árs 2008. Þrátt fyrir það hafi fjárframlög til heimilisins engum
skerðingum sætt á þeim grundvelli að heimilinu beri að ráðstafa fjármagni í
varasjóð. Þá verði heldur ekki séð að aðrar stofnanir sem tengist félagsmálaráðuneytinu
og hafi heimild til að flytja rekstrarafgang á milli ára hafi sætt skerðingu í
fjárlögum fyrir árið 2009 af slíkri ástæðu. Megi þar sem dæmi nefna
Framkvæmdasjóð fatlaðra, Greiningar- og ráðgjafarstöð ríkisins,
Tryggingastofnun ríkisins og Vinnueftirlitið, sbr. yfirlit yfir fjárframlög til
þessara aðila.
Stefnandi
telji samkvæmt þessu ljóst að hann hafi sætt annarri og meira íþyngjandi
meðferð en stofnanir í sambærilegri stöðu. Þessi mismunandi meðferð felist í
því að stefnanda sé gert að sæta skerðingu á fjárframlögum á þeim eina
grundvelli að hann hafi heimild til að ráðstafa fjármagni í varasjóð á meðan
aðrir aðilar sem njóti sambærilegrar heimildar þurfi ekki að sæta slíkri
skerðingu. Þá fái stefnandi ekki séð að hlutlægar og málefnalegar ástæður búi
að baki þessari mismunandi meðferð aðila í sambærilegri stöðu. Þvert á móti
gefi auga leið að það sé ómálefnalegt að skerða fjárframlög til stefnanda á
þeim grundvelli að hann hafi heimild til að ráðstafa fé í varasjóð á meðan slík
heimild annarra aðila í sambærilegri stöðu hafi engin áhrif á fjárframlög til
þeirra. Telji stefnandi þetta ótvírætt benda til þess að aðrar ástæður hljóti
að hafa legið að baki skerðingu á fjárframlögum til hans en þær sem hafi verið
tilgreindar. Eigi það sérstaklega við þegar slík skerðing gangi ekki jafnt yfir
aðila í sambærilegri stöðu. Með hliðsjón af þessu telji stefnandi ljóst að hann
hafi sætt meðferð sem brjóti í bága við jafnræðisreglu 65. gr.
stjórnarskrárinnar.
Þá telji
stefnandi að hafa verði í huga að umrædd skerðing á fjárframlögum til stefnanda
sé til þess fallin að skerða þjónustu við fatlaða íbúa að Sólheimum og þar með
lífsgæði þeirra, en það sé óviðunandi að þeir þurfi einir að þola gerræðislega
og ómálefnalega skerðingu á fjárframlögum. Feli skerðingin því jafnframt í sér
brot á jafnræði umræddra íbúa. Sé í reynd verið að mismuna fötluðum íbúum að
Sólheimum þegar litið sé til fatlaðra einstaklinga sem búa á öðrum heimilum sem
þurfi ekki að sæta sambærilegri skerðingu. Slíkt sé að sjálfsögðu ólíðandi
þegar litið sé til jafnræðisreglu stjórnarskrárinnar og brjóti gegn kjarna
hennar.
Stefnandi
byggir enn fremur á því að fjárframlag stefnda til hans sé liður í því að
uppfylla þær skyldur sem á stefnda séu lagðar í 1. mgr. 76. gr.
stjórnarskrárinnar og lúti að því að tryggja fötluðum jafnrétti og sambærileg
lífskjör við aðra þjóðfélagsþegna og skapa þeim skilyrði til þess að lifa
eðlilegu lífi. Slíkar skyldur séu jafnframt tíundaðar í 12. 15. gr.
Félagsmálasáttmála Evrópu og 11. gr. samnings Sameinuðu þjóðanna um
efnahagsleg, félagsleg og menningarleg réttindi sem Ísland eigi aðild að og
beri að skýra 76. gr. stjórnarskrárinnar með hliðsjón af þeim. Í þessu sambandi
skuli sérstaklega vísað til 15. gr. Félagsmálasáttmála Evrópu þar sem fram komi
að í því skyni að tryggja að réttur líkamlega og andlega fatlaðs fólks til
verknáms, endurhæfingar og endurheimtar félagslegrar aðstöðu sé raunverulega
nýttur skuldbindi samningsaðilar sig meðal annars til „að gera nægar
ráðstafanir til að skapa aðstöðu til þjálfunar, þ. á m., þegar það sé
nauðsynlegt, að koma á fót sérhæfðum stofnunum opinberra aðila og einkaaðila“.
Til að slíkar stofnanir, svo sem það heimili sem stefnandi reki, geti gegnt
hlutverki sínu sé nauðsynlegt að þær hljóti fullnægjandi fjárframlög frá ríkinu
sem ekki séu skert á ómálefnalegum grundvelli og í andstöðu við
jafnræðisregluna.
Þegar
þjónustusamningur aðila hafi verið gerður hafi stefndi tekið kostnað við
þjónustu stefnanda út og reiknað honum fjárframlag á þeim grundvelli á sama
hátt og öðrum þeim sem sinni þjónustu við fatlaða á grundvelli
þjónustusamninga. Með því að skerða það fjárframlag með áðurnefndum hætti til
stefnanda eins slíkra þjónustuveitenda sé gróflega brotið gegn 76. gr.
stjórnarskrárinnar og þeirri skyldu stefnda að tryggja þeim hópum sem þar um
geti fullnægjandi framfærslu. Þá sé ljóst að tryggja verði slík
lágmarksréttindi með þeim hætti að önnur mannréttindi séu tryggð og skipti hér
einkum máli jafnræðisregla 65. gr. stjórnarskrárinnar.
Stefnandi
kveður að lögum nr. 59/1992 um málefni fatlaðra sé, í samræmi við bæði 65. gr.
og 1. mgr. 76. gr. stjórnarskrárinnar, ætlað að tryggja öllum sem eins sé
ástatt um sambærilega aðstoð. Stefnandi sé hins vegar sá eini sem hafi þurft að
þola skerðingu fjárframlags á þeim grundvelli að honum hafi verið heimilt að
færa rekstrarafgang á milli ára en slíkt feli eðli málsins samkvæmt í sér
augljósa mismunun gagnvart fötluðum íbúum Sólheima.
Telji
stefnandi að samkvæmt þessu leiði umrædd skerðing á fjárframlögum til Sólheima
til þess að íbúum á Sólheimum séu ekki tryggð þau lágmarksréttindi sem felist í
76. gr. stjórnarskrárinnar til jafns við aðra aðila í sambærilegri stöðu svo
sem jafnræðisreglu 65. gr. stjórnarskrárinnar sé ætlað að tryggja. Telji
stefnandi því að brotið hafi verið gegn 76. gr. stjórnarskrárinnar, eins og hún
verði skýrð með hliðsjón af 65. gr. stjórnarskrárinnar, sbr. jafnframt
þjóðréttarlegar skuldbindingar íslenska ríkisins.
Þá telji
stefnandi nauðsynlegt að koma því á framfæri að í stjórn Sólheima sitji
einstaklingar sem hafi starfað að málefnum fatlaðra hér á landi og erlendis í
áratugi. Enginn þeirra þekki þess dæmi að fyrr hafi framlög til ákveðins aðila
sem veiti fötluðum þjónustu verið skert sérstaklega á meðan fjárframlög til
annarra aðila í sambærilegri stöðu séu óbreytt. Þá hafi málið verið kynnt
systrasamtökum Sólheima erlendis og hafi þessi skerðing jafnframt vakið mikla
furðu þar, enda í andstöðu við þá meginreglu að gæta skuli jafnræðis í þjónustu
við fatlaða.
Aðalkröfu
sína byggir stefnandi í öðru lagi á því að sjónarmið það sem hafi búið að baki
4% skerðingu á fjárúthlutun til hans, að því er virðist til frambúðar, hafi
verið ómálefnalegt og skerðingin þar með ólögmæt.
Stefnandi
vísar til þess að um handhafa ríkisvalds og beitingu þeirra á valdi sínu gildi
ákveðnar meginreglur. Ein þessara meginreglna sé sú að valdbeiting þeirra
hverju sinni þurfi að vera reist á málefnalegum sjónarmiðum. Gildi sú regla
eðli málsins samkvæmt jafnt um beitingu löggjafans á lagasetningarvaldi sínu,
um ákvarðanir framkvæmdavaldsins um réttindi og skyldur borgaranna og um
beitingu dómenda á dómsvaldi sínu, enda ótækt að geðþótti eða hrein tilviljun
ráði för svo sem í því tilviki sem hér um ræði.
Stefnandi
telji að í samræmi við þetta verði að gera þá stjórnskipulegu kröfu til Alþingis,
sem hafi fjárveitingarvaldið, að þegar fjárveitingar til ákveðins aðila séu
skertar búi að baki málefnaleg sjónarmið. Þá telji stefnandi að skerðing sem
ekki sé byggð á slíkum grunni verði að teljast ólögmæt.
Eins og
áður greini hafi til stuðnings 4% skerðingu á fjárúthlutun til stefnanda
eingöngu verið vísað til þess að Sólheimum væri heimilt að ráðstafa
rekstrarafgangi til myndunar varasjóðs. Stefnandi telji þessa tilvísun
fullkomlega ómálefnalega enda þurfi aðrar stofnanir sem heyri undir félagsmálaráðuneytið
og aðrir sem sinni þjónustu á grundvelli þjónustusamninga við ráðuneytið ekki
að þola skerðingu við fjárúthlutun á þeim grundvelli að þeim hafi verið heimilt
að færa rekstrarafgang á milli ára. Megi sem dæmi um slíkar stofnanir nefna
Skálatúnsheimilið, Framkvæmdasjóð fatlaðra, greiningar- og ráðgjafarstofu
ríkisins, Tryggingastofnun ríkisins og Vinnueftirlitið.
Að gera
stefnanda einum að sæta skerðingu á þessum grundvelli sé því fullkomlega
ómálefnalegt. Jafnframt leggi stefnandi áherslu á að það ákvæði í umræddum
þjónustusamningi sem heimili honum að láta fé renna í varasjóð sé
heimildarákvæði. Ekki fáist séð að það hafi verið rannsakað sérstaklega eða
haft einhverja þýðingu að þessu leyti hvort stefnandi hafi nýtt umrætt ákvæði
þjónustusamningsins eða eftir atvikum nýtt það til hlítar. Verði að telja það
mjög óeðlilegt að slíkt sé ekki kannað sérstaklega áður en skerðing sé ákveðin,
enda einsýnt að það að skerða fjárframlög eingöngu vegna heimildar til að mynda varasjóð geti ekki staðist
sem röksemd. Auk þess verði að telja að heimild til að setja allt að 4% af
upphæð samnings í varasjóð geti ekki vegið upp á móti 4% skerðingu fjárframlaga
í framtíðinni, þar sem framlög hækki eðli málsins samkvæmt með tilliti til
verðlags samkvæmt forsendum í fylgiskjali 2 með samningnum.
Framangreindu
til frekari stuðnings vísar stefnandi til sjónarmiða um réttmætar væntingar og
réttaröryggi. Hann hafi hvorki getað séð fyrir né hafi hann mátt eiga von á að
fjárframlög til hans yrðu að óbreyttu skert eftir svo langan tíma. Þvert á móti
hafi hann öðlast réttmætar væntingar til þess að fjárframlög til hans yrðu
áfram reiknuð á sama grundvelli. Í þessu sambandi sé vísað sérstaklega til
ítrekaðra yfirlýsinga þáverandi félagsmálaráðherra í fjölmiðlum um að
fjárframlög til málefna fatlaðra yrðu ekki skert. Telji stefnandi að vegna
þessa séu þau brot á stjórnarskránni sem leiði af umræddri skerðingu mun
alvarlegri en ella.
Framangreind
sjónarmið styðji stefnandi við grunnrök stjórnskipunarréttar. Eins og þekkt sé
hvíli sú skylda á Alþingi að virða hina stjórnskipulegu meðalhófsreglu og
jafnræðisreglu. Telji stefnandi að á sama grundvelli beri Alþingi að styðjast
við málefnaleg sjónarmið þegar það beiti lagasetningar- og fjárveitingarvaldi
sínu.
Verði ekki
fallist á aðalkröfu stefnanda um að viðurkennt verði að sú 4% skerðing sem
fjárframlag til hans sætti með fjárlögum ársins 2009 hafi verið ólögmæt krefst
stefnandi þess til vara að viðurkennt verði að með umræddri skerðingu hafi
stefndi vanefnt þjónustusamning stefnanda við félagsmálaráðuneytið, dags. 8.
maí 2004.
Umræddur
þjónustusamningur hafi verið gerður samkvæmt heimild í 14. gr. laga nr. 59/1992
um málefni fatlaðra og 30. gr. laga nr. 88/1997 um fjárreiður ríkisins, sbr.
reglugerð nr. 343/2006 um samninga um rekstrarverkefni sem ráðuneyti og
ríkisstofnanir gera til lengri tíma en eins árs.
Þrátt fyrir
að gildistími umrædds samnings hafi eingöngu verið til 1. janúar 2009, sbr. 10.
gr. samningsins, telji stefnandi að hann sé enn í fullu gildi í samræmi við
munnlegt samkomulag aðila. Stefnandi hafi óskað eftir framlengingu
þjónustusamningsins með bréfi til félagsmálaráðuneytisins, dags. 30. apríl
2008, en því bréfi hafi ekki verið svarað af hálfu ráðuneytisins. Hins vegar
hafi stefnandi haldið áfram að veita þjónustu á grundvelli þjónustusamningsins
í samræmi við vilja ráðuneytisins. Þá sé ljóst að ráðuneytið hafi litið svo á
að samningurinn hafi enn verið í gildi. Í því sambandi sé vísað til þess að
fram hafi komið í tölvubréfi starfsmanns ráðuneytisins til fyrirsvarsmanns
Sólheima og fleiri aðila, dags. 14. maí 2010, sú afstaða að stefnandi veiti
fötluðum þjónustu á grundvelli þjónustusamnings. Þannig hafi verið óskað eftir
fundi með aðilum „sem veita fötluðum þjónustu á grundvelli þjónustusamninga“,
svo sem það sé orðað og hafi stefnandi verið þar á meðal. Telji stefnandi að
samkvæmt þessu hafi þjónustusamningur aðila verið framlengdur munnlega í
samræmi við vilja og athafnir beggja aðila og sé hann því enn í gildi.
Stefnandi
telji að almennt beri Alþingi, sem fari með fjárveitingarvald, að virða ákvæði
þjónustusamninga sem ráðuneyti hafi gert við aðila til að uppfylla þær opinberu
skyldur sem á þeim hvíli. Byggt sé á því að sé fjárlögum breytt þannig að ekki
sé unnt að standa við þjónustusamning sem ráðuneyti hafi gert geti það bakað
íslenska ríkinu bótaábyrgð.
Stefnandi
telji að með umræddri skerðingu á fjárframlagi til hans hafi verið brotið gegn
þjónustusamningi hans við félagsmálaráðuneytið. Samkvæmt grein 2.1 í samningnum
taki Sólheimar að sér að veita 40 fötluðum íbúum þjónustu, búsetu og atvinnu
samkvæmt lögum nr. 59/1992 um málefni fatlaðra í samræmi við nánari ákvæði
samningsins og í samræmi við þær greiðslur sem félagsmálaráðuneytið inni af
hendi. Þegar samningurinn hafi verið gerður hafi stefndi tekið kostnað við
þjónustu stefnanda út og reiknað honum fjárframlag á þeim grundvelli á sama
hátt og öðrum þeim sem sinna þjónustu við fatlaða á grundvelli
þjónustusamninga. Fram komi í grein 6.1 í samningnum að ráðuneytið muni leggja
til að veitt verði fé á fjárlögum sem Sólheimar ráðstafi í samræmi við ákvæði
samningsins. Þá sé fjallað um greiðslufyrirkomulag í grein 6.2 og sé þar vísað
til þess að í fylgiskjali 2 sé gerð grein fyrir forsendum og útreikningi
greiðslna. Þannig séu forsendur greiðslna útskýrðar ítarlega í fylgiskjali 2
með samningnum og komi þar meðal annars fram að greiðslur séu byggðar á nánar
tilgreindu einingarverðlagi og að miðað sé við verðlag ársins 2004.
Með því að
skerða fjárframlag til stefnanda, sem beri að reikna á þessum grundvelli,
eingöngu með vísan til heimildar hans til að leggja fé í varasjóð sé brotið
gegn greiðsluskyldu stefnda á grundvelli þjónustusamningsins. Samkvæmt
samningnum beri einfaldlega að ákveða greiðslur til handa stefnanda á ákveðnum
grundvelli og sé engin heimild til að skerða þær eingöngu með vísan til þess að
stefnanda sé heimilt að ráðstafa fé í varasjóð. Feli slíkt í sér vanefnd á
þjónustusamningnum sem valdi stefnanda sýnilega fjárhagslegu tjóni og telji
stefnandi að stefndi beri skaðabótaábyrgð á slíku tjóni. Hafi stefnandi
samkvæmt þessu umtalsverða fjárhagslega hagsmuni af því að viðurkennt verði með
dómi að umrædd skerðing feli í sér vanefnd á þjónustusamningi hans við
félagsmálaráðuneytið svo sem gert sé ráð fyrir í kröfugerð hans.
Um lagarök
vísar stefndi til 65. gr. og 76. gr. stjórnarskrárinnar, svo og til laga nr.
59/1992 um málefni fatlaðra. Jafnframt vísar hann til meginreglna
samningaréttar um skuldbindingargildi samninga. Þá vísar hann til skuldbindinga
íslenska ríkisins samkvæmt Félagsmálasáttmála Evrópu og samningi Sameinuðu
þjóðanna um efnahagsleg, félagsleg og menningarleg réttindi. Um heimild til
þess að höfða viðurkenningarmál vísar stefnandi til 2. mgr. 25. gr. laga um
meðferð einkamála nr. 91/1991. Krafan um málskostnað styðjist við 1. mgr. 130. gr.
laga nr. 91/1991.
Málsástæður og lagarök stefnda
Stefndi
lýsir atvikum máls svo að gildistími umrædds þjónustusamnings, frá maí 2004,
hafi runnið út 31. desember 2008. Stefndi líti svo á að samningurinn hafi
runnið úr gildi þann dag eins og skýrt sé kveðið á um í samningnum enda megi
ráða af samskiptum aðila frá þeim tíma að báðir aðilar hafi litið svo á. Í
þessu sambandi sé bent á að stefnandi hafi óskað eftir því með bréfi til
stefnda, dags. 30. apríl 2008, að samningurinn yrði framlengdur.
Enginn nýr þjónustusamningur hafi enn verið gerður
milli aðila málsins en fjárframlög úr ríkissjóði hafi á tímabilinu verið tryggð
stefnanda eins og verið hafi á grundvelli gildandi fjárlaga hverju sinni. Í
fyrrgreindu ljósi líti stefndi ekki svo á að í gildi sé þjónustusamningur milli
stefnda og stefnanda í skilningi 14. gr. laga um málefni fatlaðra, þrátt fyrir
að stefnandi hafi haldið áfram að veita þjónustu í anda fyrri samnings milli
aðila og fengið til þess fjárveitingar á grundvelli fjárlaga.
Við ákvörðun
fjárheimilda til stefnanda hverju sinni hafi almennt verið litið til
síðasta þjónustusamnings sem í gildi hafi verið milli stefnda og stefnanda.
Hafi ekki staðið annað til en að sami háttur yrði hafður á vegna fjárlaga fyrir
árið 2009, sbr. frumvarp til fjárlaga fyrir árið 2009 sem fjármálaráðherra
lagði fram á Alþingi 1. október 2008, sbr. þó bréf ráðuneytisins til
Ríkisendurskoðunar, dags. 1. september 2008. Á þessu hafi þó orðið breyting af
illri nauðsyn eins og nánar verði gerð grein fyrir hér á eftir.
Stefndi kveður að samkvæmt 2. mgr. 21. gr. laga nr.
88/1997 um fjárreiður ríkisins skuli frumvarp fjármálaráðherra til fjárlaga
vera samið með hliðsjón af þjóðhagsáætlun ríkisstjórnarinnar og skuli áætlanir
um tekjur og gjöld í frumvarpinu gerðar á sömu meginforsendum og
þjóðhagsáætlun. Ljóst sé að í október 2008 hafi verulegar breytingar orðið á
efnahagshorfum fyrir árið 2009 þegar fyrir hafi legið að stærsti hluti
fjármálakerfis landsins stefndi í þrot. Þær forsendur sem fjárlagafrumvarpið
hafi byggst á hafi verið brostnar og hafi þingmenn staðið frammi fyrir því að
gera þyrfti verulegar breytingar á frumvarpinu til að draga saman útgjöld hins
opinbera svo unnt væri að mæta verulega breyttum aðstæðum í ríkisrekstrinum.
Stjórnvöld hafi markað þá stefnu að ekki yrði farið
í flatan niðurskurð þar sem slíkt teldist bersýnilega ósanngjarnt og því ekki
forsvaranlegt að fara þá leið í niðurskurði í opinberum rekstri. Þess í stað
hafi verið lögð áhersla á að verja þá þjónustu ríkisins sem yrði talin
samfélaginu nauðsynleg eins og frekast væri kostur og hafi í því efni verið
vísað til svokallaðrar grunnþjónustu sem opinberar stofnanir veita almenningi.
Engu að síður hafi sú krafa verið gerð að rekstur hverrar stofnunar yrði
skoðaður sérstaklega ef hugsanlegt svigrúm væri fyrir hendi til að draga úr
rekstrarkostnaði án þess að skerða þá grunnþjónustu sem hlutaðeigandi stofnun
hafi verið ætlað að veita. Hafi þáverandi félags- og tryggingamálaráðherra lagt
sérstaka áherslu á að stofnunum er starfi á grundvelli laga um málefni fatlaðra
yrði hlíft eins og kostur væri við sparnaðarkröfum á árinu 2009 enda hafi
rekstur flestra þeirra verið erfiður árin á undan.
Þegar í upphafi hafi legið fyrir að aðhaldskröfur
yrðu misjafnar milli ólíkra málaflokka og jafnvel innan sömu málaflokka enda
rekstrarstaða stofnana með mismunandi hætti. Þessi framkvæmd hafi verið talin
forsvaranleg og málefnaleg í ljósi þess bráðnauðsynlega markmiðs að draga úr
rekstrarútgjöldum ríkisins í því skyni að mæta breyttum efnahagsforsendum en
jafnframt að tryggja nauðsynlega grunnþjónustu.
Við 2. og 3. umræðu fjárlaga hafi verið samþykktar
tillögur um lækkun útgjalda í félags- og tryggingamálaráðuneytinu um 2.866,8
milljónir króna (fjárlög 2009, bls. 251). Jafnframt hafi komið fram í fjárlögum
þess árs að „[a]lmennt var gengið út frá 3% samdrætti
í rekstrarkostnaði stofnana í velferðarþjónustu s.s. heilbrigðisstofnunum,
menntastofnunum, auk löggæslustofnana, en um 5% hjá stjórnsýslustofnunum og
almennum þjónustustofnunum.“ (fjárlög 2009, bls. 229).
Ljóst hafi verið að útgjaldalækkunin hafi verið
töluverð og langt frá þeim aðhaldskröfum sem aðilar er njóta fjárframlaga á
grundvelli fjárlaga hafi átt að venjast. Við hafi tekið vinna við að útfæra
lækkun rekstrarútgjalda hjá stofnunum er starfa á málefnasviði stefnda og hafi
þau sjónarmið, sem rakin séu hér að framan, verið höfð að leiðarljósi við
yfirferð á rekstri allra stofnana. Hafi meðal annars verið byggt á ítarlegri
skoðun á möguleikum stofnananna til að bregðast við breyttum aðstæðum. Meðal
þess sem lagt hafi verið til grundvallar hafi verið rekstur stofnananna árin á
undan sem og mat á þeim verkefnum sem sérhver stofnun hafi horfst í augu við að
teknu tilliti til breyttra aðstæðna í samfélaginu.
Sem dæmi hafi ekki þótt forsendur til að gera
aðhaldskröfur á rekstur Tryggingastofnunar ríkisins og Vinnumálastofnunar þar
sem talið hafi verið að hinar breyttu aðstæður í þjóðfélaginu myndu leiða til
verulega aukins álags hjá þeim stofnunum. Það hafi síðar orðið reyndin og þá
sérstaklega hafi verið aukið álag hjá Vinnumálastofnun.
Enn fremur hafi ekki verið gerð aðhaldskrafa á
svæðisskrifstofur málefna fatlaðra eftir að farið hafi verið vel yfir
rekstrarforsendur þeirra. Tvær þeirra hafi haft rekstrarafgang sem numið hafi
2% af fjárlagaheimild þeirra á árinu 2007 en tvær þeirra hafi þurft samtals 100
milljóna króna viðbótarfjárheimild í fjáraukalögum fyrir árið 2007 vegna
hallareksturs. Tvær hafi verið reknar með halla sem ekki hafi verið bættur og
þeim skrifstofum hafi verið gert að flytja hallann með sér til ársins 2008.
Tvær svæðisskrifstofur hafi fengið viðbótarfjárhæð samtals að fjárhæð 45
milljónir króna í fjáraukalögum fyrir árið 2008 en önnur þeirra hafi einnig
fengið fjáraukaheimild á árinu 2007. Rekstur annarra svæðisskrifstofa hafi
verið „í járnum“.
Aðhaldskrafa hafi verið gerð á Greiningar- og
ráðgjafarstöð ríkisins og Þjónustu- og þekkingarmiðstöð fyrir blinda,
sjónskerta og daufblinda einstaklinga. Fjárheimild Greiningarstöðvarinnar hafi
verið lækkuð um 2,5% og framlag ráðuneytisins til Þjónustumiðstöðvarinnar um 5%
frá því sem gert hefði verið ráð fyrir í frumvarpi fjármálaráðherra. Þá hafi
verið litið til einstakra stofnana sem þjónusta fatlað fólk. Þeirra á meðal
hafi verið Sólheimar, Skálatún og Ás styrktarfélag.
Það hafi verið mat þeirra sem stóðu að nánari
útfærslu útgjaldalækkunarinnar hjá ríkissjóði, að teknu tilliti til
framangreindra sjónarmiða, að stefnandi gæti brugðist við breyttum aðstæðum í
ljósi þess að á árunum 2004 2007 hafi rekstrarafgangur stefnanda numið tæpum
26,8 milljónum króna en það fé hafi verið sett í varasjóð samkvæmt heimild í
grein 6.4 í þjónustusamningi milli stefnda og stefnanda. Samkvæmt þeirri
heimild hafi stjórn stefnanda getað ráðstafað rekstrarafgangi til myndunar
varasjóðs sem hafi haft það hlutverk að mæta óvæntum áföllum í rekstri og
leggja fram fé til bættrar þjónustu og framkvæmda í samræmi við markmið
skipulagsskrár stefnanda. Í þessu sambandi sé lögð sérstök áhersla á að stjórn
stefnanda hafi eingöngu verið heimilt að ráðstafa rekstrarafgangi til myndunar
varasjóðs samkvæmt fyrrnefndri heimild í þjónustusamningi málsaðila. Í sama
ákvæði hafi jafnframt verið gert að skilyrði að árlegt framlag í varasjóð næmi
ekki hærri fjárhæð en 4% af fjárhæð samningsins. Nemi sú fjárhæð sem stjórn
stefnanda hafi lagt í varasjóð á áðurgreindu tímabili 3,37% af rekstrarframlagi
til Sólheima úr ríkissjóði. Enn fremur hafi verið litið til þess að á árunum
2006 og 2007 hafi rekstrarafgangurinn numið 4% af samningsfjárhæð þeirra ára.
Þar sem fénu, sem safnast hefði í varasjóðinn, hefði verið ráðstafað til
byggingaframkvæmda á árunum 2005 2008, í stað þess að varðveita sjóðinn áfram
til að mæta óvæntum áföllum í rekstri stefnanda, hafi verið talið að rekstur
stefnanda gæti þolað 4% skerðingu á rekstarframlagi úr ríkissjóði án þess að
koma þyrfti til breytinga á grunnþjónustu við þá er þar búa eða skerðingar á
framfærslu þeirra.
Til samanburðar hafi Skálatún verið rekið með 10
milljóna króna halla á árinu 2007 og hafi stefnt í hallarekstur á árinu 2008
sem síðar hafi reynst vera 15 milljóna króna halli. Sá hallarekstur hafi átt
sér ákveðnar skýringar í ljósi aðstæðna á vinnumarkaði á þeim tíma. Hafi
Skálatún mætt þeim hallarekstri með inneign úr varasjóði sem komið hafi til
vegna rekstrarafgangs á árunum 2005 og 2006. Hallarekstur hafi einnig verið hjá
Ási styrktarfélagi.
Aðrar stofnanir er starfa á málefnasviði félags- og
tryggingamálaráðuneytis hafi þurft að sæta 2-11% skerðingu í fjárlögum fyrir
árið 2009.
Alþingi hafi samþykkt fjárlögin fyrir árið 2009 í
desember 2008 með áorðnum breytingum sem meirihluti fjárlaganefndar þingsins
hafi lagt til. Þar á meðal hafi verið 4% skerðing á fjárframlögum til Sólheima
frá því sem frumvarp fjármálaráðherra hafi gert ráð fyrir. Skerðingin sé því
ákvörðun Alþingis og hafi verið samþykkt á lögformlegum grundvelli sem gildandi
lög um fjárheimildir fyrir árið 2009.
Þegar litið sé til 2. mgr. 21. gr. laga nr. 88/1997
um fjárreiður ríkisins og þeirra málefnalegu sjónarmiða sem hafi verið lögð til
grundvallar við útfærslu þingsins á þeim útgjaldalækkunum sem hafi verið gerðar
við afgreiðslu þess á frumvarpinu, með það að markmiði að fullnægja skilyrði
laganna um fjárreiður ríkisins, verði ekki séð að sú 4% skerðing sem
fjárframlag til stefnanda hafi sætt með fjárlögum ársins 2009 hafi verið
ólögmæt eða ómálefnaleg. Verði í því sambandi sérstaklega að líta til þess að
stefnandi hafi skilað rekstrarafgangi fjögur síðustu árin á undan. Skerðingin
hafi ekki verið umfram það sem aðrar stofnanir sem starfi á málefnasviði
félags- og tryggingamálaráðuneytisins hafi þurft að sæta og hafi verið taldar
geta hagrætt í rekstri.
Samkvæmt ofanrituðu beri því að sýkna stefnda af
aðalkröfu stefnanda.
Samkvæmt 41. gr. stjórnarskrárinnar megi ekkert
gjald greiða úr ríkissjóði nema heimild sé til þess í fjárlögum eða
fjáraukalögum. Að því er varðar samninga við opinberar stofnanir verði að
leggja til grundvallar að stjórnarframkvæmdin verði að vera bæði lög- og
formbundin auk þess að styðjast við þann lagaramma sem settur sé með
fjárveitingum.
Stefndi vísar enn fremur til 21. gr. laga nr.
88/1997 um fjárreiður ríkisins þar sem gert sé ráð fyrir að fjármálaráðherra
leggi fram frumvarp til fjárlaga sem nái yfir fjárreiður stofnana þess á næsta
fjárlagaári. Þannig skuli fyrir fram leitað heimilda til greiðslna úr
ríkissjóði, eftirgjafar krafna og til að gera hvers konar samninga um
fjárhagslegar skuldbindingar fyrir ríkissjóð og ríkisstofnanir. Enn fremur sé ráðherra
eingöngu heimilt að gera verksamninga og samninga um rekstrarverkefni sem undir
ráðuneytið heyri þegar áætlað sé fyrir verkefninu í fjárlögum, sbr. 30. gr.
sömu laga. Verði því að gera ráð fyrir að samningar um greiðslur úr ríkissjóði
hljóti alltaf að vera háðar því að til fjárveitinga sé stofnað í samræmi við
lög.
Í fyrri samningi aðila, sem hafi runnið út 31.
desember 2008, sé tekið fram í grein 6.1 að stefndi muni leggja til að veitt
verði fé á fjárlögum sem stefnandi muni ráðstafa til rekstrar í samræmi við
ákvæði samningsins. Við gerð fjárlaga fyrir árið 2009 hafi stefndi lagt til við
fjármálaráðuneytið óbreyttar fjárhæðir til handa Sólheimum til rekstrar, sbr.
frumvarp fjármálaráðherra til fjárlaga fyrir árið 2009 sem lagt hafi verið fram
á Alþingi 1. október 2008. Í meðförum Alþingis hafi frumvarpinu hins vegar
verið breytt með þeim hætti að fjárframlag til rekstrar Sólheima hafi verið
skert um 4% frá því sem hafi verið í áðurnefndu frumvarpi ráðherra. Fyrir þeim
breytingum hafi verið lögmætar og málefnalegar forsendur eins og áður hafi
verið gerð grein fyrir.
Enn fremur beri til þess að líta að grein 6.6
samningsins, sem fjalli um breytingar á þeim greiðslum sem falla skuli til á
grundvelli samningsins, vísi til launa- og verðlagsforsendna sem liggi til
grundvallar árlegum fjárveitingum í fjárlögum hvers árs. Verði því að ætla að
rekstraraðilar Sólheima hafi mátt búast við skerðingum á fjárframlögum þegar af
þeirri ástæðu að forsendur fjárlagafrumvarpsins hafi breyst verulega frá því að
frumvarpið hafi verið lagt fram. Þetta hafi öllum mátt vera ljóst í íslensku
samfélagi sem á einhvern hátt hafi tengst opinberum rekstri.
Stefnda hafi borið að fara að ákvæðum fjárlaga að
því er varði fjárframlög stefnda vegna rekstrar stefnanda á árinu 2009 og hafi
þá ekki skipt máli hvort formlegur samningur hafi verið í gildi eða ekki. Að
mati stefnda sé því haldlaus sú fullyrðing stefnanda að stefndi hafi vanrækt
samningsskuldbindingar sínar samkvæmt þjónustusamningi hans við stefnanda frá
maí 2008. Í fyrsta lagi hafi enginn samningur verið í gildi eins og sýnt hafi
verið fram á og í öðru lagi hafi stefndi einungis farið að landslögum.
Fullyrðingum stefnanda um formlegt gildi þjónustusamnings sé ítrekað mótmælt
sem röngum og jafnvel þó svo hafi verið hafi stefnda borið að fara að ákvæðum
fjárlaga. Verði því líka að sýkna stefnda af varakröfu stefnanda.
Niðurstaða
Þjónustusamningur
stefnanda við félagsmálaráðuneytið, dags. 8. maí 2004, var gerður samkvæmt
heimild í 14. gr. laga um málefni fatlaðra nr. 59/1992 og 30. gr. laga nr.
88/1997 um fjárreiður ríkisins, eins og fram kemur í inngangi samningsins. Í
gr. 6.1 í samningnum segir að ráðuneytið muni leggja til að veitt verði fé á
fjárlögum sem Sólheimar ráðstafa í samræmi við ákvæði samningsins. Þá segir í gr.
6.4 í samningnum að stjórn Sólheima sé heimilt að ráðstafa rekstrarafgangi til
myndunar varasjóðs. Hlutverk sjóðsins sé að mæta óvæntum áföllum í rekstri og
leggja fram fé til bættrar þjónustu og framkvæmda í samræmi við markmið
skipulagsskrár Sólheima. Árlegt framlag í varasjóð má þó ekki nema hærri upphæð
en 4% af upphæð samnings.
Fyrir
liggur að stefnandi fékk óskertar fjárveitingar til starfsemi sinnar á
grundvelli samningsins samkvæmt fjárlögum allt fram til ársins 2009. Þegar
frumvarp til fjárlaga fyrir árið 2009 var lagt fram á Alþingi hinn 1. október
2008 var fjárveiting til stefnanda í samræmi við þjónustusamning aðila. Í
meðförum Alþings við afgreiðslu fjárlaga fyrir árið 2009 var fjárframlag
félagsmálaráðuneytisins til stefnanda lækkað um 11.000.000 króna eða um 4%. Til
skýringar á þessari lækkun er tekið fram að fjárhæðin svari til 4% lækkunar
útgjalda en það sé það hlutfall sem heimilið hafi tekið af árlegu framlagi
ríkissjóðs í sérstakan varasjóð í samræmi við heimild þar um í
þjónustusamningi.
Stefnandi
byggir aðalkröfu sína í málinu í fyrsta lagi á því að umrædd 4% skerðing á
fjárframlögum til hans samkvæmt fjárlögum fyrir árið 2009 feli í sér brot á
bæði jafnræðisreglu 65. gr. stjórnarskrárinnar og rétti til framfærsluaðstoðar
sem beri að tryggja án mismununar samkvæmt 1. mgr. 76. gr. stjórnarskrárinnar
og sé þar með ólögmæt.
Stefndi byggir hins vegar á því að samkvæmt 2. mgr.
21. gr. laga nr. 88/1997 um fjárreiður ríkisins skuli frumvarp til fjárlaga
vera samið með hliðsjón af þjóðhagsáætlun ríkisstjórnarinnar og skuli áætlanir
um tekjur og gjöld í frumvarpinu gerðar á sömu meginforsendum og
þjóðhagsáætlun. Ljóst sé að í október 2008 hafi verulegar breytingar orðið á
efnahagshorfum fyrir árið 2009 þegar fyrir lá að stærsti hluti fjármálakerfis
landsins stefndi í þrot. Þær forsendur sem fjárlagafrumvarpið byggðist á hafi
verið brostnar og því nauðsynlegt að gera verulegar breytingar á frumvarpinu
til að draga saman útgjöld hins opinbera. Alþingi hafi samþykkt fjárlögin fyrir
árið 2009 í samræmi við þær breytingar sem meirihluti fjárlaganefndar þingsins
hafði lagt til, þar á meðal 4% skerðingu á fjárframlögum til stefnanda frá því
sem frumvarp fjármálaráðherra hafði gert ráð fyrir.
Í bréfi fjármálaráðuneytis til ráðneyta frá 14.
nóvember 2008, sem er fylgiskjal með nefndaráliti meirihluta fjárlaganefndar
með fjárlagafrumvarpi fyrir árið 2009, segir að fjármálaráðuneytið vinni að
endurskoðun á stöðu og sjálfbærni ríkisfjármála í ljósi þeirra áfalla sem dunið
hafa yfir fjármálakerfi landsins og til þess að fylgja eftir áætlunum um
viðreisn efnahagslífsins. Í bréfi þessu segir enn fremur svo:
Fjármálaráðuneytið
gerir ráð fyrir að ráðuneytin hafi að vanda undirbúið sig fyrir að setja fram
breytingartillögur við fjárlagafrumvarpið í fyrri hluta nóvember með hliðsjón
af horfum um þróun mála á næsta ári. Ráðuneytið hefur á undanförnum vikum
einnig átt óformleg samskipti við önnur ráðuneyti um að unnið væri að því að
leita allra leiða til að draga úr útgjöldum og undirbúa tillögur í því skyni
með hliðsjón af forgangsröð brýnustu verkefna og kjarnastarfsemi. Hjá sumum
ráðuneytum eru jafnvel þegar komnar fram fyrstu tillögur með þetta að markmiði.
Fjármálaráðuneytið
óskar nú eftir því að ráðuneytin leggi fram tillögur sínar vegna endurskoðunar
á fjárlagafrumvarpinu og skrái þær í fjárlagakerfið. Annars vegar verði um að
ræða tillögur um endurmetnar áætlanir um þá starfsemi og verkefni sem ætla má
að verði fyrir verulegum áhrifum af breyttu efnahagsástandi. Þær tillögur ættu
þó að miðast við að fjármálaráðuneytið mun ákvarða með samræmdum hætti áhrif af
breyttum horfum um laun, verðlag og gengi á fjárheimildir frumvarpsins út frá
endurskoðaðri þjóðhagsspá. Hins vegar verði um að ræða tillögur um samdrátt í
útgjöldum eins og frekast er kostur í hverju ráðuneyti. Núverandi áætlanir
benda til að ná þurfi það miklum árangri að því er beint til ráðuneyta að
vinnuviðmið þeirra verði að útfæra tillögur um lækkun útgjalda sem nemi a.m.k.
10% af veltu miðað við fjárlagafrumvarpið 2009.
Eins og bréf þetta ber með sér var mjög að
ráðuneytum lagt að setja fram tillögur um samdrátt í útgjöldum, sem var nauðsynlegt
að gera vegna ástandsins í efnahagsmálum þjóðarinnar. Verður að skoða skerðingu
á fjárframlagi til stefnanda í því ljósi.
Ekki er fallist á það með stefnanda að sú lækkun á
fjárheimildum til hans sem átti sér stað í meðförum Alþings á frumvarpi til
fjárlaga 2009 hafi falið í sér ójafnræði gagnvart honum sem brjóti í bága við
jafnræðisreglu 65. gr. stjórnarskrárinnar. Sú lækkun sem hér um ræðir var byggð
á því að borð væri fyrir báru hjá stefnanda þar sem hann hefði árlega nýtt sér
heimild í þjónustusamningi til að leggja rekstrarafgang af framlagi ríkissjóðs
í varasjóð. Verður ekki talið að lækkun fjárheimildar á þessum grundvelli hafi
verið ómálefnaleg og þrátt fyrir það að aðrir sambærilegir aðilar, sem veita
fötluðum þjónustu hafi ekki sætt slíkri skerðingu á framlögum úr ríkissjóði.
Ekki er heldur fallist á það með stefnanda að skerðing á fjárframlagi til hans
með áðurnefndum hætti hafi brotið í bága við 1. mgr. 76. gr.
stjórnarskrárinnar, þar sem ekki er talið að sú lækkun sé byggð á ómálefnalegum
grundvelli samkvæmt framansögðu og skerðir ekki þau grundvallarréttindi sem
greindu stjórnarskrárákvæði er ætlað að tryggja og lög nr. 59/1992 um málefni
fatlaðra byggja á. Hvorki er fallist á málsástæður stefnanda um að það sé með
öllu ómálefnalegt að rökstyðja skerðingu á fjárframlagi til stefnanda með vísan
til heimildarákvæðis um varasjóð í þjónustusamningi, né málsástæður er varða
sjónarmið um réttmætar væntingar og réttaröryggi. Þá er til þess að líta, eins
og stefndi byggir á, að brýna nauðsyn bar til að draga úr ríkisútgjöldum, eins
og mögulegt var, vegna efnahagshrunsins haustið 2008. Verður fallist á
málsástæður stefnda er að þessu lúta og þau sjónarmið hans sem uppi eru höfð
til stuðnings því að ekki beri að taka til greina aðalkröfu stefnanda í málinu.
Samkvæmt framansögðu er hafnað aðalkröfu stefnanda
í málinu um viðurkenningu á því að umrædd skerðing á fjárframlagi til
hans samkvæmt fjárlögum ársins 2009 hafi verið ólögmæt.
Til vara
byggir stefnandi á því að með því að skerða fjárframlag til hans um 4% með
fjárlögum ársins 2009 hafi stefndi vanefnt samningsskuldbindingar sínar
samkvæmt þjónustusamningi stefnanda við félagsmálaráðuneytið frá 8. maí 2004.
Í gr. 6.2 í
þjónustusamningi þessum er gerð grein fyrir greiðslum á grundvelli hans, sem
greiða ber úr ríkissjóði. Í gr. 6.6 er tekið fram að fjárhæðir samkvæmt 6.2 séu
settar fram miðað við verðlagsforsendur fjárlaga fyrir árið 2004. Þar segir
svo:
Frá og með árinu 2005 skulu þessar fjárhæðir breytast
árlega í samræmi við launa- og verðlagsforsendur sem liggja til grundvallar
árlegum fjárveitingum í fjárlögum hvers árs. Af heildarframlagi ríkisins skv.
6.2 skulu 80% teljast vera vegna launakostnaðar og 20% vegna annars kostnaðar.
Framlag ríkisins vegna annars kostnaðar en launa skal breytast samkvæmt
forsendum fjárlaga um almennar verðlagsbreytingar á sama kostnaði hjá
svæðisskrifstofum málefna fatlaðra. Fari fram endurmat á launa- og
verðlagsforsendum fjárveitinga til svæðisskrifstofa málefna fatlaðra innan
ársins skal endurskoða framlag til Sólheima með sama hætti.
Ekki liggur
annað fyrir en að fjárframlög ríkisins til stefnanda á samningstímabilinu hafi
verið í samræmi við þær forsendur sem um getur í gr. 6.6 þjónustusamnings aðila
og einnig fjárveiting til stefnanda samkvæmt fjárlögum fyrir árið 2009.
Samkvæmt
gr. 10 í samningum var gildistími hans fimm ár frá 1. janúar 2004 til 1. janúar
2009. Hann var því enn í gildi er fjárframlag til stefnanda var skert í
meðförum Alþings og til hans var sérstaklega vísað í því sambandi. Þá er og til
þess að líta að samningnum var ekki sagt upp í samræmi við ákvæði gr. 10.1, að
stefnandi óskaði sérstaklega eftir framlengingu hans, þjónusta var áfram veitt
á grundvelli hans og eftir honum farið sem í gildi væri eftir 1. janúar 2009.
Engin
heimild var til þess í samningnum að lækka greiðslur sem ríkissjóði bar að
greiða á grundvelli hans vegna ráðstöfunar stefnanda á rekstarafgangi í
varasjóð samkvæmt gr. 6.4. Umrædd lækkun á fjárframlagi til stefnanda um 4% á
þeim grundvelli átti sér ekki stoð í samningnum og var því brot á
greiðsluskyldu stefnda samkvæmt honum. Verður því fallist á varakröfu stefnanda
í málinu um viðurkenningu á því að stefndi hafi með framangreindri skerðingu á
fjárframlagi til stefnanda vanefnt samningsskuldbindingar sínar samkvæmt
þjónustusamningnum, eins og nánar greinir í dómsorði.
Samkvæmt
þessum úrslitum málsins verður stefndi dæmdur til að greiða stefnanda
málskostnað sem telst hæfilega ákveðinn 2.000.000 króna.
Eggert
Óskarsson héraðsdómari kvað upp dóm þennan.
D Ó M S O R Ð:
Viðurkennt
er að stefndi, íslenska ríkið, vanefndi samningsskuldbindingar sínar samkvæmt
þjónustusamningi stefnanda, Sólheima sjálfseignarstofnunar, við
félagsmálaráðuneytið, dags. 8. maí 2004, með því að skerða fjárframlag til
stefnanda um 4% með fjárlögum ársins 2009.
Stefndi
greiði stefnanda 2.000.000 króna í málskostnað.