Þriðjudaginn 12. febrúar 2013.
Nr. 94/2013.	Lögreglustjórinn á höfuðborgarsvæðinu (Jón H. B. Snorrason saksóknari) gegn X (Haukur Örn Birgisson hrl.)

Kærumál. Gæsluvarðhald. A. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, var staðfestur.

Dómur Hæstaréttar.

Mál þetta dæma hæstaréttardómararnir Eiríkur Tómasson, Greta Baldursdóttir og Þorgeir Örlygsson.

Varnaraðili skaut málinu til Hæstaréttar með kæru 8. febrúar 2013, sem barst réttinum ásamt kærumálsgögnum 11. sama mánaðar. Kærður er úrskurður Héraðsdóms Reykjaness 8. febrúar 2013 þar sem varnaraðila var gert að sæta gæsluvarðhaldi allt til fimmtudagsins 14. febrúar 2013 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími og einangrun aflétt.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Reykjaness 8. febrúar 2013.

                Lögreglustjórinn á Suðurnesjum hefur krafist þess fyrir dóminum í dag að Héraðsdómur Reykjaness úrskurði að X, kt. [...], verði gert að sæta gæsluvarðhaldi allt til fimmtudagsins 21. febrúar 2013 kl. 16:00.  Þá er þess krafist að honum verði gert að sæta einangrun á meðan á gæsluvarðhaldinu stendur.

                Kærði hefur mótmælt gæsluvarðahaldskröfunni og krafist þess til vara að gæsluvarðhaldi verði markaður skemmri tími

Í greinargerð lögreglustjóra segir að ávana- og fíkniefnadeild lögreglustjórans á höfuðborgarsvæðinu hafi til rannsóknar póstsendingar hingað til lands frá Kaupmannahöfn í Danmörku.  Í póstsendingunum var að finna mikið magn sterkra fíkniefna, sjá nánar meðfylgjandi efnaskýrslur.

Lögregla hefur undir höndum myndbandsupptökur þar sem sjá má kærða, ásamt öðrum mönnum póstleggja umræddar sendingar.

Kærði var handtekinn 24. janúar sl. grunaður um aðild að fíkniefnainnflutningnum og úrskurðaður í gæsluvarðhald 25. janúar, sem var staðfest með dómi Hæstaréttar Íslands nr. 57/2013.

Kærði hefur neitað sök í málinu.

Það er grunur lögreglu að kærði hafi ásamt fleiri aðilum staðið að innflutningi mikils magns sterkra fíkniefna hingað til lands. Rannsókn lögreglu er á frumstigi og er nauðsynlegt að yfirheyra kærða frekar og að hafa upp á og taka skýrslur af fleiri einstaklingum sem kunna að tengjast málinu. Þá er einnig beðið frekari gagna frá Danmörku. Mikilvægt er í þágu rannsóknarinnar að unnt sé að bera upplýsingar undir kærða sjálfstætt á meðan hann sætir gæsluvarðhaldi og að hann sæti einangrun á þessu stigi rannsóknarinnar. Gangi kærði laus ferða sinna þá getur hann torveldað rannsóknina, s.s. með því að koma undan munum sem hafa sönnunargildi í málinu eða haft áhrif á aðra samverkamenn.

Kærði er undir rökstuddum grun um aðild að afbroti sem allt að 12 ára fangelsisrefsing er lögð við. Um er að ræða stórfelldan innflutning fíkniefna, sem víst þykir að hafi átt að fara í sölu- og dreifingu hér á landi. Þykir þannig brýnt að vernda rannsóknarhagmuni á þessu stigi málsins með því að varna því að kærði gangi laus. 

                Með vísan til framangreinds er það mat lögreglustjóra að lagaskilyrðum rannsóknargæslu sé fullnægt. Með skírskotun til þess, framlagðra gagna og a.liðar 1. mgr. 95. gr. laga nr. 88/2008 um meðferð sakamála er þess krafist að krafan nái fram að ganga.

                Með vísan til framangreinds er það mat lögreglustjóra að lagaskilyrðum rannsóknargæslu sé fullnægt. Með skírskotun til þess, framlagðra gagna og a.liðar 1. mgr. 95. gr. laga nr. 88/2008 um meðferð sakamála er þess krafist að krafan nái fram að ganga.

Með vísan til framangreinds, framlagðra gagna og a. liðar 1. mgr. 95. gr. og b. liðar 1. mgr. 99. gr. laga nr. 88/2008 um meðferð sakamálamála er þess krafist að krafan nái fram að ganga.

                Þess er krafist gæsluvarðhaldinu verði settar sérstakar takmarkanir samkvæmt b-, c-, d-, e- og f-liðum 1. mgr. 99. gr. laga nr. 88/2008.

                 Með vísan til rannsóknargagna og þess sem nú hefur verið rakið, a. liðar 1. mgr. 95. gr. og b. liðar 1. mgr. 99. gr. laga nr. 88/2008 um meðferð sakamála, er fallist á kröfu lögreglustjóra eins og hún er fram sett, þó þannig að gæsluvarðhaldinu verðu markaður skemmri tími eins og nánar greinir í úrskurðarorði.

                Sveinn Sigurkarlsson héraðsdómari kveður upp úrskurð þennan.

Úrskurðarorð:

                Kærði, X, skal sæta gæsluvarðhaldi allt til fimmtudagsins 14. febrúar nk. kl. 16:00.

                Kærði skal sæta einangrun meðan á gæsluvarðhaldinu stendur.