Fimmtudaginn 14. júní 2012.
Nr. 412/2012.	Lögreglustjórinn á höfuðborgarsvæðinu (Jón H.B Snorrason saksóknari) gegn X (Stefán Karl Kristjánsson hdl.)

 

Kærumál. Gæsluvarðhald. C. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli c. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Greta Baldursdóttir og Eiríkur Tómasson og Helgi I. Jónsson settur hæstaréttardómari.

Varnaraðili skaut málinu til Hæstaréttar með kæru 12. júní 2012 sem barst réttinum ásamt kærumálsgögnum 13. sama mánaðar. Kærður er úrskurður Héraðsdóms Reykjavíkur 12. júní 2012, þar sem varnaraðila var gert að sæta gæsluvarðhaldi uns dómur gengur í málum hans, þó eigi lengur en til þriðjudagsins 10. júlí 2012 klukkan 16. Kæruheimild er í l. lið 1. mgr. og b. lið 2. mgr. 192. gr. laga nr. 88/2008 um meðferð sakamála. Varnaraðili krefst þess aðallega að úrskurðurinn verði felldur úr gildi en til vara að gæsluvarðhaldi verði markaður skemmri tími og að honum „verði gert að sæta geðrannsókn á gæsluvarðhaldstíma.“

Sóknaraðili krefst staðfestingar hins kærða úrskurðar.

Í varakröfu sinni krefst varnaraðili þess að honum verði gert að sæta geðrannsókn á gæsluvarðhaldstíma. Héraðsdómur hefur ekki tekið afstöðu til þeirrar kröfu og kemur hún því ekki til álita fyrir Hæstarétti.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

 

Úrskurður Héraðsdóms Reykjavíkur 12. júní 2012.

Lögreglustjórinn á höfuðborgarsvæðinu hefur krafist þess að Héraðsdómur Reykjavíkur úrskurði X, kt. [...], til að sæta gæslu­varðhaldi uns dómur gengur í málum hans, þó eigi lengur en til þriðjudagsins 10. júlí 2012 kl. 16.00.

Í greinargerð kemur fram að Lögreglan á höfuðborgarsvæðinu hafi unnið að rann­sóknum mála þar sem ákærði sé grunaður um auðgunarbrot, tilraun til nytja­stuldar, tilraun til nauðgunar og brot er varði meiriháttar nauðung.

Með úrskurði héraðsdóms Reykjavíkur 16. maí 2012 hafi ákærða verið gert að sæta gæsluvarðhaldi til miðvikudagsins 13. júní á grundvelli c. liðar 1. mgr. 95. gr. laga nr. 88/2008.

Rannsókn sé lokið í nær öllum málum á hendur ákærða og hafi  þann 15. maí sl. verið gefin út ákæra af embætti Lögreglustjórans á Höfuðborgarsvæðinu á hendur ákærða vegna fjölda auðgunarbrota sem ákærði hafi að mestu viðurkennt í yfirheyrslum hjá lögreglu svo og við þingfestingu málsins þann 6. júní sl., sjá nánar meðfylgjandi ákæru. Þá hafi farið fram aðalmeðferð vegna þeirrar ákæru þann 12. júní sl.

Að auki hafi mál þar sem ákærði sé grunaður um að hafa með ofbeldi og hótunum gert tilraun til að nauðga vinkonu sinni á heimili hans þar sem hann hélt henni nauðugri í fjórar klukkustundir verið sent til ríkissaksóknara til þóknanlegrar meðferðar.

Samkvæmt sakavottorði ákærða eigi hann að baki samfelldan sakaferil frá því hann var 15 ára gamall og hafi hlotið fangelsisdóm fyrir þjófnaði og tilraun til ráns. Þá komi fram í yfirheyrslum lögreglu að ákærði hafi verið í mikilli neyslu vímuefna sem hann virðist að mestu leyti fjármagna með afbrotum.

Með vísan til brotaferils ákærða á undanförnum mánuðum sé það mat lögreglu­stjóra að yfirgnæfandi líkur séu á því að hann muni halda áfram brota­starf­semi fari hann frjáls ferða sinna.

Með vísan til framangreinds, framlagðra gagna og c.-liðar 1. mgr. 95. gr. laga 88/2008 um meðferð sakamála sé þess krafist að krafan nái fram að ganga.

Brotaferill ákærða er nær samfelldur frá 15 ára aldri hans. Ákæra var gefin út á hendur ákærða 15. maí sl. vegna þjófnaðarbrota, tilraunar til þjófnaðar, tilrauna til nytjastuldar og fjársvik, sem ákærði hefur að mestu viðurkennt í yfirheyrslum hjá lögreglu og  fyrir dómi, en 10 af 11 brotum voru framin í mars og apríl sl. Þá hefur mál þar sem ákærði er grunaður um tilraun til nauðgunar og meiriháttar nauðung verið sent ríkissaksóknara til þóknanlegrar meðferðar.

Með vísan til brotaferils ákærða á undanförnum mánuðum  verður fallist á með lögreglustjóra að veruleg hætta sé á að ákærði muni halda áfram brotastarfsemi fari hann frjáls ferða sinna.  Þykir fullnægt skilyrðum c-liðar 1. mgr. 95. gr. laga nr. 88/2008 til að fallast á kröfu lögreglustjórans eins og hún er fram sett.

Þorgerður Erlendsdóttir  héraðsdómari kveður upp úrskurðinn.

Ú R S K U R Ð A R O R Ð: 

Ákærði, X, kt. [...],  skal sæta gæsluvarðhaldi uns dómur gengur í málum hans, þó eigi lengur en til þriðjudagsins 10. júlí 2012 kl. 16.00.