Miðvikudaginn 11. júlí 2012.
Nr. 483/2012.	Lögreglustjórinn á höfuðborgarsvæðinu (Jón H.B. Snorrason saksóknari) gegn Y (Flosi Hrafn Sigurðsson hdl.)

 

Kærumál. Gæsluvarðhald. A. liður 1. mgr. 95. gr. laga nr. 88/2008.

Úrskurður héraðsdóms um að Y skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Eiríkur Tómasson, Greta Baldursdóttir og Þorgeir Örlygsson.

Varnaraðili skaut málinu til Hæstaréttar með kæru 7. júlí 2012 sem barst réttinum ásamt kærumálsgögnum 9. sama mánaðar. Kærður er úrskurður Héraðsdóms Reykjavíkur 7. júlí 2012, þar sem varnaraðila var gert að sæta gæsluvarðhaldi allt til föstudagsins 13. júlí 2012 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega hinn kærði úrskurður verði felldur úr gildi, en til vara að gæsluvarðhaldi verði markaður skemmri tími. Að því frágengnu krefst hann þess að sér verði ekki gert að sæta einangrun meðan á gæsluvarðhaldi stendur.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Það athugist að þegar krafa um gæsluvarðhald yfir varnaraðila var tekin fyrir á dómþingi 7. júlí 2012 hefði í ljósi atvika málsins verið rétt af héraðsdómara að spyrja varnaraðila hvort hann hafi framið brot þau sem hann er sakaður um. Er þá til þess litið að við skýrslutöku hjá lögreglu daginn áður hafði varnaraðili neitað með öllu þeim sakargiftum sem á hann eru bornar.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjavíkur laugardaginn 7. júlí 2012.

Lögreglustjórinn á höfuðborgarsvæðinu hefur krafist þess að Héraðsdómur Reykja­víkur úrskurði að Y, kt. [...], verði gert að sæta gæsluvarðhaldi allt til föstudagsins 13. júlí 2012 kl. 16.  Þá er þess krafist að honum verði gert að sæta einangrun á meðan á gæsluvarðhaldinu stendur.

Í greinargerð Lögreglustjórans á höfuðborgarsvæðinu kemur fram að í gær hafi lögreglu borist tilkynning frá [...] hér í borg um að maður hafi verið sviptur frelsi og rændur á heimili sínu. Þar hafi lögreglumenn hitt A sem sagði tvo menn hafa ruðst inn í íbúð sína, haldið sér í gíslingu og neytt með ofbeldi og hótunum til að millifæra af bankareikningi sínum inn á reikning sem mennirnir hafi gefið upp ásamt því að stela munum úr íbúðinni.

A hafi lýst mönnunum fyrir lögreglu og skömmu síðar hafi kærði, Y, sem samsvarað hafi lýsingu á öðrum mannanna, verið handtekinn skammt frá, við [...].

Í framburði A komi fram að hann hafi vaknað kl. 03:00 við að dyrabjöllunni hafi verið hringt. Er hann hafi opnað hurðina hafi ruðst inn tveir menn, annar talandi með erlendum hreim, fjötrað, troðið tusku upp í munn hans og límt límband fyrir. Næstu sex klukkustundirnar hafi mennirnir leitað í íbúðinni að verðmætum og neytt A með ofbeldi og hótunum til að millifæra símleiðis 453.000 kr. af bankareikningi hans inn á bankareikning kærða, Y (reikning nr. [...]), en annar mannanna hafi skrifað niður upplýsingar á blað. Við atlögurnar hafi A hlotið sýnilega áverka ásamt því að vera í andlegu áfalli. Nánar um atvikalýsingu og áverka vísist til gagna lögreglu.

Samstarfsfólk A hafi farið að undra hví hann kæmi ekki til vinnu um morguninn og afráðið að fara heim til hans og kanna hvort í lagi væri með hann. Er þau hafi knúið dyra á íbúð A, klukkan rúmlega 10:30, hafi árásarmennirnir verið þar inni. Er þeir hafi orðið varir við samstarfsfólkið hafi þeir haft sig á brott út um svaladyrnar, bakdyramegin.

Ásamt því að samsvara lýsingu A á öðrum árásarmannanna hafi kærði, Y, haft í fórum sínum við handtökuna rúmlega 308.000 kr. í seðlum og skiptimynt, tvær lyklakippur og minnislykil sem hafi verið í eigu A, ávísun stílaða á A og blað, sem A hafi verið sýnt, með handskrifaðri kennitölu kærða Y, og bankanúmeri hans.

Við yfirheyrslur hafi kærði Y neitað öllum sakargiftum og gefið ótrúverðugar skýringar á ástæðu millifærslu á milli bankareikninga hans og A og engar skýringar gefið á hví hann hafi verið með persónulega muni A í fórum sínum við handtöku. Þá liggi fyrir upplýsingar frá starfsmönnum [...]bankans að skömmu fyrir handtökuna hafi kærði millifært tæplega helming upphæðarinnar, sem millifærð hafi verið af reikningi A, inn á hans reikning, inn á reikning meints samverkamanns, sbr. gögn lögreglu, og tekið út um 305.000 kr. í peningum út af eigin bankareikningi.

Af framansögðu telji lögreglan að kærði, Y, sé undir rökstuddum grun um að hafa í félagi við annan mann frelsissvipt og rænt A á heimili þess síðastnefnda.

Rannsókn málsins sé á frumstigi og á lögreglan eigi eftir að hafa hendur í hári samverkamanns kærða, yfirheyra vitni og klára rannsókn í tengslum við vettvang og þess sem stolið hafi verið. Sé því brýnt að kærða verði gert að sæta gæsluvarðhaldi þannig að hann fái ekki tækifæri til að torvelda rannsókninni með því ýmist að koma undan munum eða hafa áhrif á aðra samseka og/eða vitni.

Með vísan til framangreinds, framlagðra gagna og a. liðar 1. mgr. 95. gr. og b. liðar 1. mgr. 99. gr. laga nr. 88/2008 um meðferð sakamála sé þess krafist að krafan nái fram að ganga.

Samkvæmt því sem rakið er í greinargerð lögreglustjóra og ráða má af öðrum gögnum málsins er kærði undir rökstuddum grun um að hafa rænt og svipt mann frelsi sínu síðustu nótt í félagi við annan mann, sem enn er ófundinn. Brot það sem kærði er grunaður um getur varðað fangelsisrefsingu.  Rannsókn málsins er á frumstigi og er fallist á það með lögreglustjóranum að kærði geti torveldað rannsókn málsins, svo sem með því að hafa áhrif á samseka eða vitni, gangi hann laus. Með vísan til þess og framangreinds rökstuðnings í greinargerð lögreglustjóra að öðru leyti verður krafan tekin til greina eins og hún er fram sett, en ekki þykir ástæða til að marka varðhaldinu skemmri tíma. Með sömu rökum er fallist á að kærði sæti einangrun í gæsluvarðhaldinu. 

Hervör Þorvaldsdóttir héraðsdómari kveður upp úrskurð þennan.

Ú R S K U R Ð A R O R Ð :

Kærði,    Y, kt. [...], skal sæta gæsluvarðhaldi allt til föstudagsins 13. júlí 2012 kl. 16.00.  Kærði skal sæta einangrun á meðan á gæsluvarðhaldinu stendur.