Dómur Hæstaréttar.

Mál þetta dæma hæstaréttardómararnir Helgi I. Jónsson, Benedikt Bogason og Karl Axelsson.

Varnaraðili skaut málinu til Hæstaréttar með kæru 3. desember 2015, sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 30. nóvember 2015, þar sem varnaraðila var gert að sæta gæsluvarðhaldi allt til mánudagsins 14. desember 2015 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldinu verði markaður skemmri tími og einangrun verði aflétt.

Sóknaraðili krefst staðfestingar hins kærða úrskurðar.

Varnaraðili er undir rökstuddum grun um brot sem geta varðað fangelsisrefsingu samkvæmt 5. gr. laga nr. 65/1974 um ávana- og fíkniefni eða 173. gr. a. almennra hegningarlaga nr. 19/1940 og 264. gr. sömu laga. Jafnframt er fullnægt skilyrðum a. liðar 1. mgr. 95. gr. laga nr. 88/2008 til að honum verði gert að sæta gæsluvarðhaldi og einangrun meðan á því stendur, sbr. 2. mgr. 98. gr. sömu laga. Verður hinn kærði úrskurður því staðfestur.  

Dómsorð:

Hinn kærði úrskurður er staðfestur.

Úrskurður Héraðsdóms Reykjaness 30. nóvember 2015.

Lögreglustjórinn á Suðurnesjum hefur í dag krafist þess að Héraðsdómur Reykjaness úrskurði að X, fd. [...], frá [...], verði með úrskurði gert að sæta gæsluvarðhaldi allt til mánudagsins 14. desember 2015, kl. 16:00 og að honum verði gert að sæta einangrun á meðan gæsluvarðhaldi stendur.

                Kröfuna byggir lögreglustjóri á a- lið 1. mgr. 95. gr. laga um meðferð sakamála nr. 88/2008.

Í greinargerði með kröfunni segir að síðdegis í gær hafi lögreglan handtekið Y, [...] ríkisborgara, vegna gruns um að hún hafi haft fíkniefni í fórum sínum við komu til landsins með flugi [...] frá [...]. Hafi það verið í kjölfar afskipta tollvarða af henni. Hafi komið í ljós að hún var með pakkningu af ætluðu kókaíni falda í leggöngum sínum. Lögregla hafi haft upplýsingar um að efnunum yrði veitt viðtaka á hótel [...], [...], Reykjavík, þar sem Y hafi einnig átt pantaða gistingu. Á þeim tímapunkti hafði lögregla einnig upplýsingar um að kærði, X, hafi haft aðkomu að málinu. Hafi honum verið veitt eftirför frá [...], þaðan sem hann hafi farið í beinu framhaldi á gistiheimilið á bifreiðinni [...]. Hafi kærði þar  verið handtekinn, grunaður um aðild að málinu. Í kjölfarið hafi lögregla aftur aftur að [...] í þeim tilgangi að framkvæma leit í því herbergi sem kærði sé með í leigu þar. Við leitina hafi fundist mikið magn af peningaseðlum, bæði evrur og íslenskar krónur, ætluð fíkniefni, farsímar og töluvert magn af pappírum. Vísast nánar til rannsóknargagna málsins.

Þá segir að rannsókn máls þessa sé í fullum gangi og miði út frá því að upplýsa um hlutverk kærða í umræddum innflutningi á hinum ætluðu ávana- og fíkniefnum auk þess sem fyrir liggi að afla þurfi upplýsingar um ætlað peningaþvætti kærða. Lögregla telji sig þurfa svigrúm til að vinna nánar úr þeim gögnum sem hún hafi undir höndum og upplýst geti um framangreind atriði auk þess sem fyrir liggi gagnaöflun hér á landi og erlendis um þau atriði og önnur.  Vísast nánar til rannsóknargagna.

Þá segir ennfremur að að mati lögreglustjóra séu lagaskilyrði uppfyllt fyrir því að kærða verði gert að sæta gæsluvarðhaldi. Annars vegar sé verið að rannsaka innflutning á hættulegum ávana- og fíkniefnum sem að mati lögreglu hafi verið flutt hingað til lands í þeim tilgangi að selja þau til ótiltekins fjölda fólks. Hins vegar sé verið að rannsaka þvættisbrot kærða og e.a. annarra sem honum tengjast. Að mati lögreglustjóra sé fyrir hendi rökstuddur grunur um að kærði hafi gerst brotlegur við ákvæði laga um ávana og fíkniefni nr. 65/1974 og 173. gr. a. almennra hegningarlaga nr. 19/1940 auk 264. gr. sömu laga. Lögreglustjóri telji hættu á að kærði kunni að torvelda rannsókn málsins, svo sem með því að afmá merki eftir brot, skjóta undan munum ellegar hafa áhrif á samseka eða vitni, gangi hann laus.

Með vísan til alls framangreinds, rannsóknarhagsmuna, a-liðar 1. mgr. 95. gr. laga nr. 88/ 2008 um meðferð sakamála, 173. gr. a almennra hegningarlaga nr. 19/1940 og laga nr. 65/1974 um ávana og fíkniefni telur lögreglustjóri brýna rannsóknarhagsmuni standa til að fallist verði á kröfuna og kærða verði gert að sæta gæsluvarðhaldi allt til mánudagsins 14. desember 2015, kl. 16:00. Þess er einnig krafist að kærða verði gert að sæta einangrun, sbr. b-lið 1. mgr. 99. gr. laga nr. 88/2008 um meðferð sakamála, á meðan gæsluvarðhaldi stendur, með vísan til framangreindra rannsóknarhagsmuna. 

Kærði mótmælir kröfunni og vísar til þess að eðlilegar skýringar séu á háttsemi hans sem lýst sé í greinargerð lögreglustjóra.

                 Með vísan til þess sem nú hefur verið rakið, svo og rannsóknargagna málsins, er fallist á það með lögreglustjóra að kærði sé undir rökstuddum grun um að hann hafi framið brot sem fangelsisrefsing liggur við. Telur dómurinn að gangi kærði laus megi ætla að hann muni torvelda rannsókn málsins með því að skjóta undan munum eða hafa áhrif á samseka eða vitni. Er rannsókn málsins skammt á veg komin. Samkvæmt þessu telst fullnægt skilyrðum a- liðar 1. mgr. 95. gr. laga nr. 88/2008 um meðferð sakamála til þess að kærða verði gert að sæta gæsluvarðhaldi og er krafa lögreglustjóra því tekin til greina. Fallist er á að kærði sæti einangrun á meðan á gæsluvarðhaldsvist hans  stendur sbr. b. lið 1. mgr. 99. gr. laga nr. 88/2008 um meðferð sakamála.

Ástríður Grímsdóttir héraðsdómari kveður upp úrskurð þennan.

Úrskurðarorð:

Kærði, X, fæddur [...], skal sæta gæsluvarðhaldi allt til mánudagsins 14. desember  nk. kl. 16:00.

Kærði skal sæta einangrun á meðan á gæsluvarðhaldinu stendur.