Þriðjudaginn 23. júlí 2013.
Nr. 501/2013.	Lögreglustjórinn á höfuðborgarsvæðinu (Karl Ingi Vilbergsson aðstoðarfulltrúi) gegn X (Björgvin Jónsson hrl.)

Kærumál. Gæsluvarðhald. A. liður 1. mgr. 95. gr. laga nr. 88/2008.

Staðfestur var úrskurður héraðsdóms um að X skyldi sæta gæsluvarðhaldi á grundvelli a. liðar 1. mgr. 95. gr. laga nr. 88/2008 um meðferð sakamála og einangrun meðan á gæsluvarðhaldinu stæði.

Dómur Hæstaréttar.

Mál þetta dæma hæstaréttardómararnir Viðar Már Matthíasson, Benedikt Bogason og Eiríkur Tómasson.

Varnaraðili skaut málinu til Hæstaréttar með kæru 21. júlí 2013 sem barst réttinum ásamt kærumálsgögnum 23. sama mánaðar. Kærður er úrskurður Héraðsdóms Reykjaness 21. júlí 2013, þar sem varnaraðila var gert að sæta gæsluvarðhaldi til föstudagsins 26. júlí 2013, klukkan 16, og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur. 

Dómsorð:

Hinn kærði úrskurður er staðfestur.

                                                                  

Úrskurður Héraðsdóms Reykjaness sunnudaginn 21. júlí 2013.

Lögreglustjórinn á höfuðborgarsvæðinu hefur í dag krafist þess að Þess er krafist að Héraðsdómur Reykjaness úrskurði, að X kt. [...], verði gert að sæta gæsluvarðhaldi allt til föstudagsins 26. júlí 2013, kl. 16.00 og einangrun meðan á gæsluvarðhaldinu stendur. 

Í greinargerð segir að lögreglustjórinn á höfuðborgarsvæðinu  hafi nú til rannsóknar tvö mjög gróf ofbeldisbrot þar sem hópur manna liggur undir grun um að hafa ráðist gróflega á tvo menn.

Í fyrsta lagi er um að ræða stórfellda líkamsárás og frelsissviptingu þar sem ruðst var inn á heimili A að [...] í [...], aðfaranótt mánudagsins 1. júlí sl., hann sviptur frelsi sínu og honum misþyrmt með höggum og spörkum, þá fluttur nauðugur á annan stað, þar sem honum var byrlað lyf,  hann afklæddur, klipinn með töngum, barinn með svipum og eldur lagður kynfærum hans.

Þá hefur lögregla einnig til rannsóknar ætlaða frelsissviptingu, ólögmæta nauðung eftir atvikum og líkamsmeiðingar gegn B að [...], en kærði, X, er undir rökstuddum grun um aðild að málinu á tímabilinu 29. júní til 1. júlí sl. Þar er kærði grunaður um  að hafa með grófu ofbeldi ásamt meðkærðu Y, Z og  ásamt fleiri aðilum,  gengið í skrokk á B í byrjun júlí sl.  Lögregla fékk upplýsingar frá föður brotaþola þann  3. júlí að honum hefði verið haldið nauðugum, að [...] þar sem gengið var í skrokk á honum af 4 mönnum með kylfum, skærum og dúkahníf. Þegar lögregla kom á vettvang  var þar fyrir B og mátti sjá áverka á B í andliti, var hann bólginn í framann, með skurð hægra megin við kinnbein, bólgin við hægra auga og kjálka, greinileg blæðing inn í hægra auga. Einnig var hann með fjölda skurða á  vinstri handlegg.

Kærði var handtekinn í gær í þágu rannsóknar málsins og neitaði alfarið sök í skýrslutökum hjá lögreglu.  Hann kvaðst ekki hafa verið viðstaddur í [...] er ofangreind árás átti sér stað.  hann kvaðst hafa verið hjá vinkonu sinni umrædda nótt.

Í málinu liggja fyrir framburður þriggja aðila um að kærði hafi verið á vettvangi er umrædd árás átti sér stað gagnvart B.  Þá hefur komið fram hjá einu vitni að X hafi tekið þátt í að misþyrma B í umrætt sinn, sjá samanber meðfylgjandi skýrslu í rannsóknargögnum, dags. 17. júlí sl.

Kærði X er nú undir rökstuddum grun ásamt meðkærðu um að hafa tekið þátt í frelsissviptingu, eftir atvikum ólögmætri nauðung og stórfelldri líkamsárás, með því að ganga í  skrokk á B.

Eftir er að taka frekari skýrslur af meðkærðu, brotaþola og öðrum vitnum.  Þá er ljóst að taka þarf frekari skýrslur af kærða, en rannsókn málsins er á frumstigi. Þykir því brýnt með hliðsjón af gögnum málsins og rökstuddum grunsemdum lögreglu að vernda rannsóknarhagsmuni á þessu stigi málsins með því að varna því að kærði gangi laus en veruleg hætta er talin á að hann torveldi rannsókn málsins með því að hafa áhrif,  eftir atvikum á aðra samseka og eftir atvikum vitni ef hann fær að fara frjáls ferða sinna.

Í máli sækjanda í þinghaldi í dag kom fram að einn sakborninga virðist hafa farið úr landi og hefur ekki tekist að hafa upp á honum en hann er nú eftirlýstur og gild handtökuskipun hefur verið gefin út. Einnig kom fram  að upplýsingar um meinta þátttöku kærða í verknaði þeim sem um ræðir kom ekki fram fyrr en í vitnaskýrslu hjá lögreglu þann 17. þessa mánaðar.

Kærði er nú undir rökstuddum grun um alvarlega líkamsárás,  frelsissviptingu, og eftir atvikum ólögmæta nauðung,  en um er að ræða rannsókn á alvarlegu broti og telur lögregla að miklir rannsóknarhagsmunir séu í húfi. Þáttur kærða er óljós, en hann virðist hafa tekið þátt í ætluðu broti að [...], þar sem ofbeldi var beitt og eftir er að rannsaka frekari aðild að broti að [...]. Með vísan til framangreinds, framlagðra gagna og a. - liðar 1. mgr. 95. gr. laga 88, 2008 um meðferð sakamála, og til að sæta einangrun samkvæmt b. lið 1. mgr. 99. gr. sömu laga,  er þess krafist að krafan nái fram að ganga eins og hún er sett fram.

Með vísan til alls framanritaðs, svo og gagna málsins, er fallist á það með lögreglustjóra að kærði sé undir rökstuddum grun um að hafa framið brot sem fangelsisrefsing liggur við. Gangi kærði laus má ætla að hann muni torvelda rannsókn málsins með því að hafa áhrif á samseka eða vitni. Samkvæmt þessu telst fullnægt skilyrðum a. liðar 1. mgr. 95. gr. laga nr. 88/2008 um meðferð sakamála til þess að kærða verði gert að sæta gæsluvarðhaldi og er krafa lögreglustjóra því tekin til greina á þann veg sem nánar greinir í úrskurðarorði. Jafnframt er fallist á með sömu rökum að kærði sæti einangrun á meðan á gæsluvarðhaldsvist hans stendur, sbr. b. lið 1. mgr. 99. gr. laga nr. 88/2008 um meðferð sakamála.

Sveinn Sigurkalsson héraðsdómari kveður upp úrskurð þennan.

Úrskurðarorð:

Kærði, X, skal sæta gæsluvarðhaldi allt til föstudagsins 26. júlí 2013 kl. 16:00.

Kærði sæti einangrun meðan á gæsluvarðhaldinu stendur.