Fimmtudaginn 31. október 2013.
Nr. 690/2013.	Lögreglustjórinn á höfuðborgarsvæðinu (Jón H.B. Snorrason saksóknari) gegn Ö (Eggert Páll Ólason hdl.)

Kærumál. Gæsluvarðhald. A. liður 1. mgr. 95. gr. laga nr. 88/2008.

Staðfestur var úrskurður héraðsdóms um að Ö skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, og einangrun meðan á því stæði en gæsluvarðhaldi markaður skemmri tími.

Dómur Hæstaréttar.

Mál þetta dæma hæstaréttardómararnir Helgi I. Jónsson og Benedikt Bogason og Ingveldur Einarsdóttir settur hæstaréttardómari.

Varnaraðili skaut málinu til Hæstaréttar með kæru 29. október 2013 sem barst réttinum ásamt kærumálsgögnum degi síðar. Kærður er úrskurður Héraðsdóms Reykjavíkur 29. október 2013 þar sem varnaraðila var gert að sæta gæsluvarðhaldi allt til föstudagsins 8. nóvember 2013 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi en til vara að gæsluvarðhaldi verði markaður skemmri tími og einangrun aflétt.

Sóknaraðili krefst staðfestingar hins kærða úrskurðar.

Samkvæmt 3. mgr. 206. gr. almennra hegningarlaga nr. 19/1940 skal sá sem hefur atvinnu eða viðurværi sitt af vændi annarra sæta fangelsi allt að fjórum árum. Þá segir í 6. mgr. sömu greinar að hver sem stuðli að því með ginningum, hvatningum eða milligöngu að aðrir hafi samræði eða önnur kynferðismök gegn greiðslu eða hefur tekjur af vændi annarra, svo sem með útleigu húsnæðis eða öðru, skuli sæta fangelsi allt að fjórum árum en sektum eða fangelsi allt að einu ári ef málsbætur eru. Varnaraðili er undir rökstuddum grun um brot gegn framangreindum lagaákvæðum. Að þessu gættu en að öðru leyti með vísan til forsendna hins kærða úrskurðar verður staðfest sú niðurstaða hans að varnaraðila verði gert að sæta gæsluvarðhaldi, þó þannig að því verður markaður skemmri tími eins og greinir í dómsorði.

Dómsorð:

Varnaraðili, Ö, sæti gæsluvarðhaldi allt til föstudagsins 1. nóvember 2013 klukkan 16 og einangrun meðan á því stendur.

Úrskurður Héraðsdóms Reykjavíkur 29. október 2013.

                Lögreglustjórinn á höfuðborgarsvæðinu hefur krafist þess að Héraðsdómur Reykjavíkur úrskurði að Ö, kt. [...], verði gert að sæta gæsluvarðhaldi allt til föstudagsins 8. nóvember 2013, kl. 16:00. Þá er þess krafist að honum verði gert að sæta einangrun á meðan á gæsluvarðhaldinu stendur.

                Í greinargerð lögreglu kemur fram að lögreglustjórinn á höfuðborgarsvæðinu hafi nú til rannsóknar mál er varði milligöngu um vændi og peningaþvætti.

                Rannsókn lögreglu beinist að ætlaðri sölu og milligöngu vændis forsvarsmanna og starfsmanna veitingastaðar í [...] í Reykjavík sem er rekinn undir heitinu A, en X sé skráður eigandi staðarins. Lögreglan hafi fengið og aflað ótvíræðra upplýsinga og staðfestinga um að konur á staðnum og á vegum staðarins selji kynlíf gegn greiðslu. Sannreynt hafi verið að greiðsla fari fram hjá starfsfólki veitingahússins á bar, með því að greitt sé með greiðslukorti inn á greiðslukortareikning staðarins. Þá séu upplýsingar um að veitingastaðurinn og viðkomandi kona skipti greiðslu á milli sín að jöfnu. Grunsemdir hafi verið staðfestar um að kynlífsþjónustan sem starfsmenn veitingahússins hafi milligöngu um fari fram í húsnæði veitingastaðarins. Lögreglan hafi ástæðu til að ætla að allt að 10 konur stundi vændi á vegum staðarins. Grunsemdir séu um að vændisstarfsemi hafi verið stunduð á vegum staðarins undanfarin 4-6 misseri a.m.k.

                Á grundvelli ofangreindra upplýsinga hafi lögreglan með heimild héraðsdóms Reykjavíkur aflað upplýsinga um bankagögn X og félaga honum tengdum. Í ljós hafi komið að verulegur munur er á milli uppgefinna opinberrar tekjuskráningar félagsins og veltu samkvæmt tekjuskráningakerfi. Þá hafi komið í ljós að X hafi tekið út í reiðufé af greiðslukortareikningum félagsins hvert ár tæplega helming af veltu, sem jafnframt sé hærri úttekt en uppgefin virðisaukaskyld velta félagsins.

                Aðfararnótt laugardagsins síðasta hafi sjö óeinkennisklæddir lögreglumenn farið á staðinn í tveimur aðskildum hópum. Þeim hafi öllum verið boðin kynlífsþjónusta gegn 100.000 kr. greiðslu, auk ýmiss annarra þjónustu eins og einkadans, en í því felist að starfsstúlka staðarins dansi nakin fyrir viðskiptavininn. Hafi þeim verið boðið að vera í klukkustund með einni af starfsstúlkum staðarins í sérstöku herbergi á þriðju hæð hússins. Í því herbergi og gegn 100.000 kr. greiðslu væri allt leyfilegt, þar væri hægt að fá “sex” og “go all the way”.

                Hafi lögreglumenn látið á það reyna að borga bæði fyrir einkadans sem fram hafi farið á fyrstu hæð hússins (sjá nánar skýrslur B og C) og kynlífsþjónustu á þriðju hæðinni, sbr. skýrslu D, þar sem eftirfarandi komi m.a. fram:

„Hún [ein af starfsstúlkum staðarins] bauð einkadans í kjallara hússins en ég sagðist ekki hafa efni á því. Ég spurði hana hvað hún hefði fram að bjóða, þá sagði hún að það væru bara einhverjar mínútur þarna niðri eða þá að fara upp á efri hæðina, þá væri farið "all the way", en það myndi kosta hundrað þúsund kall.

Á ákveðnum tímapunkti var mér boðið af félaga mínum að fara upp og þegar búið var að greiða fyrir það, kom barþjónninn til mín, grannur og stuttklipptur, og sagði við mig að ég mætti velja hverja sem er af stúlkunum sem inni voru. Ég valdi þá stúlku sem ég var búinn að tala við fyrr um kvöldið, hún spurði mig  hvers vegna hún, ég sagði að ástæðan fyrir því væri að ég hefði verið að tala við hana um kvöldið en ekki aðra.

Við gengum framhjá barnum, framhjá salerninu og upp þröngan stiga og þar vísaði hún mér inn í herbergi með stólum og púðum. Þar spurði ég hana hvað ég gæti fengið, hún sagði að ég gæti fengið hvað sem er (eins og hún orðaði það, "we can go all the way"), þar sem ég væri búinn að borga þennan hundrað þúsund kall, en ég mætti ekki láta það spyrjast niður að það myndi gerast. Túlkaði ég þau orð frá henni, að í því fælust kynmök. Eftir það hringdi ég í félaga minn til að láta vita að hún væri búin að bjóða þessa þjónustu og stuttu seinna komu lögreglumenn upp.

Eftir það, var ástandið fryst og ég yfirgaf vettvang.“

Kærði starfi sem barþjónn á veitingastaðnum A. Hann hafi verið handtekinn í gær þann 28. október.  Í skýrslutöku hjá lögreglu kveðst kærði vinna á staðnum við að selja áfengi á barnum, ganga frá reikningum og búa til reikninga fyrir bókara. Þá kvaðst hann einnig halda utan um vinnutíma starfsmanna. Kærði kvaðst hafa átt veitingastaðinn á árunum 2007-2009. Aðspurður um þær stúlkur sem lögreglan ætli að vinni á veitingastaðnum þá hafi hann neitað að tjá sig. Varðandi það hvort stúlkurnar fengju greidd laun þá hafi hann neitað að tjá sig. Hann kvaðst ekki kannast við það að vændi væri stundað á staðnum.

Ö sé skráður stjórnarformaður í fyrirtækinu E ehf. en félagið er skráð með heimilisfang á sama stað og veitingastaðurinn A.

Kærði sé undir rökstuddum grun um að hafa haft milligöngu um vændi starfsstúlkna á veitingastaðnum A og peningaþvætti. Rannsókn málsins sé nú í fullum gangi, lögreglan vinni í því að afla gagna og taka frekari skýrslur af kærðu og öðrum aðilum sem tengist málinu. Þá sé unnið að rannsókn sönnunargagna m.a. m.t.t. framburðar kærða og vitna. Það þyki afar brýnt á þessu stigi máls að kærða verði gert að sæta gæsluvarðhaldi m.t.t. rannsóknarhagsmuna málanna. Gangi kærði frjáls ferða sinna þá kunni hann að spilla rannsókninni, s.s. með því að afmá merki eftir brot eða koma undan gögnum eða munum sem sönnunargildi hafi. Brot kærða sé talið varða við ákvæði 6. mgr. 206. gr. og 264. gr. almennra hegningarlaga nr. 19/1940.

Með vísan til framangreinds, framlagðra gagna og a. liðar 1. mgr. 95. gr. og b. liðar 1. mgr. 99. gr. laga nr. 88/2008 um meðferð sakamálamála sé þess krafist að krafan nái fram að ganga.

                Samkvæmt því sem rakið er í greinargerð lögreglustjóra og ráða má af öðrum gögnum málsins er kærði undir rökstuddum grun um að hafa, í félagi við aðra, framið brot gegn 206. gr. almennra hegningarlaga nr. 19/1940, með því að hafa milligöngu um vændi og þiggja fyrir það greiðslu.  Brot það sem kærði er grunaður um getur varðað fangelsisrefsingu. Kærði hefur neitað sök, og einnig neitað að tjá sig um stúlkur þær er lögreglan ætlar að vinni á veitingastaðnum svo og hvort þær hafi þegið laun. Rannsókn málsins er á frumstigi.  Er fallist á það með lögreglustjóranum að kærði geti torveldað rannsókn málsins, svo sem með því að hafa áhrif á samseka eða vitni, gangi hann laus. Með vísan til þess eru uppfyllt skilyrði a.-liðar 1. mgr. 95. gr. laga um meðferð sakamála nr. 88/2008.  Verður krafan því tekin til greina eins og hún er fram sett. Ekki eru efni til þess að marka gæsluvarðhaldinu skemmri tíma. Með sömu rökum er fallist á að kærði sæti einangrun í gæsluvarðhaldinu, eins og krafist er, samkvæmt b-lið 1. mgr. 99. gr. laga nr. 88/2008.

Sigrún Guðmundsdóttir héraðsdómari kveður upp úrskurð þennan.

Ú R S K U R Ð A R O R Ð

Kærði, Ö, kt. [...], skal sæta gæsluvarðhaldi allt til föstudagsins 8. nóvember 2013, kl. 16:00. Kærði skal sæta einangrun á meðan á gæsluvarðhaldinu stendur.