Mánudaginn 15. mars 2010.
Nr. 160/2010.	Lögreglustjórinn á Suðurnesjum (Óli Ásgeir Hermannsson fulltrúi) gegn X (Bjarni Hauksson hrl.)

Kærumál. Farbann.

Staðfestur var úrskurður héraðsdóms um að X yrði bönnuð för frá Íslandi á grundvelli b. liðar 1. mgr. 95. gr. laga nr. 88/2008, sbr. 1. mgr. 100 gr. sömu laga.

Dómur Hæstaréttar.

Mál þetta dæma hæstaréttardómararnir Ólafur Börkur Þorvaldsson og Hjördís Hákonardóttir og Viðar Már Matthíasson settur hæstaréttardómari.

Varnaraðili skaut málinu til Hæstaréttar með kæru 11. mars 2010, sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 11. mars 2010, þar sem varnaraðila var bönnuð för frá Íslandi allt til þriðjudagsins 6. apríl 2010 klukkan 16. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess að hinn kærði úrskurður verði felldur úr gildi.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

                                               

Úrskurður Héraðsdóms Reykjaness 11. mars 2010.

Lögreglustjórinn á Suðurnesjum hefur með kröfu dagsettri 8. mars sl. krafist þess fyrir dóminum að X,  kt. [...], pólskum ríkisborgara, með dvalarstað að [...], verði með úrskurði Héraðsdóms Reykjaness gert að sæta farbanni allt til þriðjudagsins 6. apríl kl. 16.00.

Í greinargerð lögreglustjóra kemur fram að lögreglan á Suðurnesjum hafi til rannsóknar kæru barnaverndaryfirvalda í [...] vegna höfuðáverka á barni sem heiti A, kennitala [...]. Móðir barnsins heiti B kt. [...], en grunaði sé sambýlismaður móðurinnar og fósturfaðir barnsins.

Barnaverndarnefnd [...] hafi þann 25. ágúst 2009 borist tilkynning frá Pétri Lúðvígssyni, sérfræðingi á Landsspítala-háskólasjúkrahúsi, þar sem fram komi að barnið hafi verið lagt inn á spítalann nokkrum dögum áður vegna hratt vaxandi höfuðmáls. Jafnframt að við rannsóknir á barninu hafi vaknað sterkur grunur um að barnið hafi orðið fyrir áverka, líklega hristingsáverka (Shaken Infant Syndrome). Fram komi í kærunni að áverkar á barninu séu alvarlegir og kunni að hafa í för með sér varanlegar heilsufarslegar afleiðingar.

Grunaði hafi í skýrslu hjá lögreglu, dagsettri 26. ágúst sl., kannast við að hafa í nokkur skipti í leik hent barninu upp í loftið og gripið það. Eitt vitni sem yfirheyrt hafi verið af lögreglu hafi borið að hafa séð grunaða hrista barnið með harkalegum hætti í byrjun júlí sl.

Lögreglustjórinn kveður rannsókn málsins komna nokkuð á veg og hafi verið teknar skýrslur af móður og fósturföður barnsins sem liggi undir grun um að hafa valdið barninu skaðanum auk þess sem teknar hafi verið skýrslur af nágrönnum og vinum þeirra og hjúkrunarfræðingi sem hafi séð barnið í ungbarnaeftirliti. Ríkissaksóknari hafi lagt fyrir lögreglustjórann á Suðurnesjum að halda rannsókn málsins áfram og óski eftir dómkvaðningu matsmanna til rannsóknar á því af hverju hinir ætluðu áverkar kunni að stafa og hvaða skaða þeir hafi valdið.

Upplýsinga um kærða hafi verið aflað frá Interpol í Póllandi og hafi komið í ljós að hann sé þekktur þar í landi að líkamsárásarbrotum, fjársvikum, efnahagsbrotum og ölvunarakstri og sé hann eftirlýstur þar. Kærði sé erlendur maður og þyki mega ætla að hann muni reyna að komast úr landi eða leynast ellegar koma sér með öðrum hætti undan málssókn og refsingu verði honum ekki gert að sæta farbanni. Kærði sé grunaður um brot sem varðað geti fangelsisrefsingu. Lögregla telji, í ljósi alls sem að ofan er rakið og framlagðra gagna, brýna hagsmuni að kærða verði, með vísan til ofanritaðs, gert að sæta farbanni allt til mánudagsins 5. apríl kl. 16.00.

Lögreglustjóri vísar kröfu sinni til stuðnings til b-liðar 1. mgr. 95. gr. og 100. gr. laga nr. 88/2008 um meðferð sakamála, sbr. 2. mgr. 218. gr. almennra hegningarlaga nr. 19/1940 og 98. gr. barnaverndarlaga nr. 80/2002.

Kærði hefur mótmælt farbannskröfu lögreglustjóra.

Kærði sætir rannsókn á ætluðu broti sem að lögum getur varðað fangelsisrefsingu. Ætlað brot lýtur að áverkum á ungu barni sambýliskonu kærða. Í gögnum málsins kemur fram að samkvæmt frásögn sambýliskonunnar hafi barnið ávallt verið í umsjá hennar og kærða. Kærði er erlendur maður og þykir  mega ætla að hann muni reyna að komast úr landi eða leynast ellegar koma sér með öðrum hætti undan málssókn og refsingu verði honum ekki bönnuð för af landinu. Með vísan til framanskráðs og raka lögreglustjóra þykja því skilyrði vera fyrir hendi til að verða við kröfu lögreglustjóra og samkvæmt því er kærða bönnuð för frá Íslandi allt til þriðjudagsins 6. apríl 2010 kl. 16.00.

Arnfríður Einarsdóttir héraðsdómari kveður úrskurðinn upp.

ÚRSKURÐARORÐ

Kærða, X, er bönnuð för frá Íslandi allt til þriðjudagsins 6. apríl 2010 kl. 16.00.