Þriðjudaginn 3. júlí 2012.
Nr. 468/2012.	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Stefán Karl Kristjánsson hdl.)

 

Kærumál. Gæsluvarðhald. C. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli c. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma Þorgeir Örlygsson hæstaréttardómari og Benedikt Bogason og Helgi I. Jónsson settir hæstaréttardómarar.

Varnaraðili skaut málinu til Hæstaréttar með kæru 29. júní 2012 sem barst réttinum ásamt kærumálsgögnum 2. júlí sama ár. Kærður er úrskurður Héraðsdóms Reykjavíkur 29. júní 2012, þar sem varnaraðila var gert að sæta áfram gæsluvarðhaldi, en þó eigi lengur en til „fimmtudagsins 1. nóvember kl. 16:00.“ Kæruheimild er í b. lið 2. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur á þann hátt sem í dómsorði greinir.

Dómsorð:

Varnaraðili, X, sæti áfram gæsluvarðhaldi, en þó eigi lengur en til fimmtudagsins 1. nóvember 2012 klukkan 16.

 

Úrskurður Héraðsdóms Reykjavíkur föstudaginn 29. júní 2012.

Lögreglustjórinn á höfuðborgarsvæðinu hefur krafist þess að Héraðsdómur Reykjavíkur úrskurði að X, kt. [...], verði gert að sæta gæsluvarðhaldi, á meðan mál hans er til meðferðar fyrir Hæstarétti Íslands, þó eigi lengur en til fimmtudagsins 1. nóvember kl. 16:00.

Í greinargerð kemur fram að með dómi Hæstaréttar Íslands nr. 380/2012 hafi dómfellda X verið gert að sæta gæsluvarðhaldi til föstudagsins 29. júní 2012 á grundvelli c. liðar 1. mgr. 95. gr. laga um meðferð sakamála nr. 88/2008. Dómfelldi hafi hlotið 2 ára fangelsisdóm í Héraðsdómi Reykjavíkur þann 4. maí í máli s-191/2012. Þar hafi dómfelldi verið sakfelldur fyrir fjölmörg brot, þjófnaði, gripdeild, fjársvik, hylmingu, nytjastuld og umferðarlagabrot, sem ákærð hafði áfrýjað til Hæstaréttar þann 29. maí 2012. Þar hafi verið um að ræða samtals um 30 brot, sem dómfelldi hafi verið ákærður fyrir einn eða með öðrum á tímabilinu frá júní 2011 fram til mars 2012. Þar af hafi verið um að ræða um 9 auðgunarbrot eftir dóma, en dómfelldi hafi hlotið 1 mánaðar fangelsisdóm 10. janúar sl. við héraðsdóm Suðurlands og  12 mánaða fangelsisdóm 24. nóvember 2011 við hd. Rvk. fyrir fjölmörg auðgunarbrot skilorðsbundið í 3 ár. Í dag hafi dómfelldi hlotið dóm fyrir þjófnað og fjársvik, en ekki verið gerð sérstök refsing.

Dómur Héraðsdóms Reykjavíkur nr. S-191/2012 sé ekki fullnustuhæfur þar sem dómfelldi  hafi áfrýjað dómnum til Hæstaréttar Íslands. Áfrýjunarstefna hafi verið gefin út af ríkissaksóknara þann 29. maí sl.

Brotaferill dómfellda hafi verið samfelldur frá því að dómar féllu á hann þann 24. nóv. og 10. jan. sl. en dómfelldi hafi verið handtekinn þann 3. maí sl. og hafi sætt gæsluvarðhaldi síðan.

Dómfelldi hafi nú hlotið fangelsisrefsingu og sé það mat lögreglustjóra að yfirgnæfandi líkur séu á því að dómfelldi muni halda áfram brotastarfsemi fari hann frjáls ferða sinna og það sé brýnt að dómfelldi sæti gæsluvarðhaldi.

Með vísan til framangreinds, framlagðra gagna og  c.-liðar 1. mgr. 95. gr., sbr. 3. mgr. 97. gr.  laga 88, 2008 um meðferð sakamála er þess krafist að krafan nái fram að ganga eins og hún sé sett fram.

Eins og að framan er rakið hefur brotaferill dómfellda verið nokkuð samfelldur um alllangan tíma allt þar til hann var úrskurðaður í gæsluvarðhald 3. maí sl. Hann var með dómi héraðsdóms Reykjavíkur uppkveðnum 4. maí sl. dæmdur í tveggja ára fangelsi fyrir fjölmörg afbrot framin á tímabilinu frá júní 2011 til mars 2012. Með sumum brotanna rauf hann skilorð. Kærði hefur áfrýjað dóminum.

Eins og að framan er rakið hefur brotaferill kærða verið samfelldur og verður því að telja yfirgnæfandi líkur á að hann muni halda áfram brotastarfsemi fari hann frjáls ferða sinna.

Samkvæmt framansögðu er fallist á með lögreglustjóra að skilyrði c.-liðar 1. mgr. 95. gr. laga 88/2008 um meðferð sakamála séu fyrir hendi. Er krafa um gæslu­varðhald því tekin til greina eins og nánar greinir í úrskurðarorði  en ætla má að dómur gangi í Hæstarétti í máli dómfellda fyrir 1. nóvember nk.

Arngrímur Ísberg kveður upp úrskurð þennan.

Ú R S K U R Ð A R O R Ð:

Dómfelldi, X, kt. [...], skal sæta áfram gæsluvarðhaldi, þó eigi lengur en til fimmtudagsins 1. nóvember kl. 16:00.