Fimmtudaginn 25. október 2012.
Nr. 345/2012.	Ákæruvaldið (Hulda Elsa Björgvinsdóttir saksóknari) gegn Friðriki Guðmundssyni (Erlendur Þór Gunnarsson hrl.)

 

Líkamsárás.

F var sakfelldur fyrir líkamsárás samkvæmt 1.mgr. 218. gr. almennra hegningarlaga með því að hafa slegið A einu hnefahöggi í andlitið með þeim afleiðingum að hann nefbrotnaði. Við ákvörðun refsingar var litið til þess að A hafði í aðdraganda brotsins ögrað F og var refsing hans hæfilega ákveðin fangelsi í 30 daga, en fullnustu refsingarinnar var frestað skilorðsbundið. Þá var F gert að greiða A miskabætur.

 

Dómur Hæstaréttar.

Mál þetta dæma hæstaréttardómararnir Ólafur Börkur Þorvaldsson, Benedikt Bogason og Þorgeir Örlygsson.

Ríkissaksóknari skaut málinu til Hæstaréttar 12. desember 2011 í samræmi við yfirlýsingu ákærða um áfrýjun. Af hálfu ákæruvalds er þess krafist að refsing ákærða verði þyngd.

Ákærði krefst þess aðallega að honum verði ekki gerð refsing en til vara að hún verði milduð. Þá krefst hann þess aðallega að einkaréttarkröfu verði vísað frá héraðsdómi, til vara sýknu af kröfunni, en að því frágengnu að fjárhæð hennar verði lækkuð. 

A hefur ekki látið málið til sín taka fyrir Hæstarétti. Verður því litið svo á að hann krefjist þess að staðfest verði ákvæði hins áfrýjaða dóms um einkaréttarkröfu sína, sbr. 1. mgr. 208 gr. laga nr. 88/2008 um meðferð sakamála.

Svo sem greinir í hinum áfrýjaða dómi hefur ákærði játað að hafa slegið brotaþola einu hnefahöggi í andlitið með þeim afleiðingum að hann nefbrotnaði. Er háttsemi ákærða réttilega heimfærð til 1. mgr. 218. gr. almennra hegningarlaga nr. 19/1940. Af hálfu ákæruvaldsins er ekki vefengt að brotaþoli hafi í aðdraganda brotsins ögrað ákærða með því að greina honum með grófum og niðrandi hætti frá nánum kynnum sem brotaþoli kvaðst hafa haft af fyrrverandi unnustu ákærða. Að því gættu verður fallist á með héraðsdómi að við ákvörðun refsingar megi líta til 3. mgr. 218. gr. b. almennra hegningarlaga. Samkvæmt þessu og að öðru leyti með vísan til forsendna hins áfrýjaða dóms verður hann staðfestur.

Ákærði greiði allan áfrýjunarkostnað málsins, þar með talin málsvarnarlaun verjanda síns fyrir Hæstarétti, sem ákveðin verða með virðisaukaskatti eins og í dómsorði greinir.

Dómsorð:

Héraðsdómur skal vera óraskaður.

Ákærði, Friðrik Guðmundsson, greiði allan áfrýjunarkostnað málsins, samtals 238.129 krónur, þar með talin málsvarnarlaun verjanda síns, Erlendar Þórs Gunnarssonar hæstaréttarlögmanns, 225.900 krónur.

 

Dómur Héraðsdóms Reykjavíkur 26. október 2011

             Málið er höfðað með ákæru lögreglustjórans á höfuðborgarsvæðinu, dagsettri 16. ágúst 2011, á hendur:

             ,,Friðriki Guðmundssyni, kt. [...],

[...], Kópavogi,

fyrir líkamsárás, með því að hafa, aðfaranótt miðvikudagsins 28. júlí 2010, utandyra við skemmtistaðinn Bakkus við Tryggvagötu 22, Reykjavík, ráðist að A, kt. [...], og slegið hann einu hnefahöggi í nef, með þeim afleiðingum að hann hlaut nefbrot og skekkju á nefbrjóski.

Telst þetta varða við 1. mgr. 218. gr. almennra hegningarlaga nr. 19/1940, sbr. 11. gr. laga nr. 20/1981.

Þess er krafist að ákærði verði dæmdur til refsingar og til greiðslu alls sakarkostnaðar.

Einkaréttarkrafa:

Þá gerir Óðinn Elísson, hrl., f.h. A, kt. [...], kröfu um að ákærði verði dæmdur til greiðslu skaða- og miskabóta samtals að fjárhæð kr. 704.591, með vöxtum skv. 8. gr. laga um vexti og verðtryggingu nr. 38/2001 frá 28. júlí 2010, en síðan með dráttarvöxtum skv. 9. gr., sbr. 1. mgr. 6. gr., sömu laga, frá þeim tíma er sakborningi var kynnt krafan til greiðsludags. Einnig er þess krafist af brotaþola að ákærða verði gert að greiða málskostnað brotaþola að skaðlausu, samkvæmt síðar framlögðum reikningi, að viðbættum virðisaukaskatti á málflutningsþóknun.“

Undir málsmeðferðinni féll ákæruvaldið frá orðalaginu ráðist að í ákærunni og eftir stendur að ákærða er gefið að sök að hafa slegið A eitt hnefahögg í nef.

Verjandi ákærða krefst vægustu refsingar sem lög leyfa. Aðallega er krafist sýknu af skaðabótakröfu, utan kröfuliðinn um útlagðan kostnað sem ákærði samþykkir. Til vara er krafist lækkunar á skaðabótakröfu.

Eftir breytingu á ákærunni sem rakin var er sannað með skýlausri játningu ákærða fyrir dómi og með öðrum gögnum málsins að hann hafi gerst sekur brot það sem hann er ákærður fyrir og er brotið rétt fært til refsiákvæðis í ákærunni.

             Skírskotað er til ákærunnar um lýsingu málavaxta.

             Ákærði hefur ekki áður gerst brotlegur við almenn hegningarlög. Hann hefur játað brot sitt hreinskilnislega og er það virt til refsilækkunar. Ákærði lýsti áreiti sem hann varð fyrir af hálfu A á þeim tíma sem í ákæru greinir. Þá hafi A viðhaft niðrandi ummæli um fyrrum unnustu ákærða. Ákærði reyndi árangurslaust að komast frá A en að því kom að hann sló A eitt högg eins og lýst er í ákærunni. Er litið til þessa við refsiákvörðun sbr. 3. mgr. 218. gr. b i.f. almennra hegningarlaga. Að þessu virtu þykir refsing ákærða hæfilega ákvörðuð fangelsi í 30 daga en rétt þykir að fresta fullnustu refsingarinnar eins og í dómsorði greinir.

Bótakrafa A er þannig saman sett: Miskabætur 250.000 krónur, bætur vegna útlagðs kostnaðar 54.591 króna og 400.000 krónur vegna kostnaðar vegna aðgerðar á nefi. Síðasta kröfuliðnum er andmælt en hann er byggður á áætluðum kostnaði. Þessi kröfuliður er ódómtækur og er honum vísað fræá dómi.

Ákærði hefur samþykkt kröfuliðinn vegna útlagðs kostnaðar og er hann dæmdur til að greiða þá fjárhæð.

A á rétt á miskabótum úr hendi ákærða á grundvelli 26. gr. skaðabótalaga nr. 50/1993 og þykja bæturnar hæfilega ákvarðaðar 200.000 krónur. Ákærði er þannig dæmdur til að greiða A 254.591 krónu auk vaxta eins og í dómsorði greinir en dráttarvextir reiknast frá 3. mars 2011 til greiðsludags. Auk ofanritaðs greiði ákærði Agnari Þór Guðmundssyni héraðsdómslögmanni, skipuðum réttargæslumanni A, 87.850 krónur í réttargæsluþóknun.

Ákærði greiði Arnari Kormáki Friðrikssyni héraðsdómslögmanni 125.500 króna málsvarnarlaun. Tekið hefur verið tillit til virðisaukaskatts við ákvörðun þóknunar lögmanna.

Katrín Ólöf Einarsdóttir, fulltrúi lögreglustjórans í Reykjavík, flutti málið fyrir ákæruvaldið.

Guðjón St. Marteinsson héraðsdómari kveður upp dóminn.

Dómsorð:

Ákærði, Friðrik Guðmundsson, sæti fangelsi í 30 daga en fresta skal fullnustu refsingarinnar skilorðsbundið í 2 ár frá birtingu dómsins að telja og falli refsingin niður að þeim tíma liðnum haldi ákærði almennt skilorð 57. gr. almennra hegningarlaga nr. 19/1940, sbr. 4. gr. laga nr. 22/1955.

Ákærði greiði A 254.591 krónu í skaða- og miskabætur auk  vaxta skv. 8. gr. laga um vexti og verðtryggingu nr. 38/2001 frá 28. júlí 2010, en síðan með dráttarvöxtum skv. 9. gr., sbr. 1. mgr. 6. gr., sömu laga frá 3. mars 2011 til greiðsludags.

Ákærði greiði Agnari Þór Guðmundssyni héraðsdómslögmanni 87.850 krónur í réttargæsluþóknun.

Ákærði greiði Arnari Kormáki Friðrikssyni héraðsdómslögmanni 125.500 króna málsvarnarlaun. Tekið hefur verið tillit til virðisaukaskatts við ákvörðun þóknunar lögmanna.