Þriðjudaginn 20. nóvember 2012.
Nr. 691/2012.	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Bjarni Hauksson hrl.)

 

Kærumál. Gæsluvarðhald. A. liður mgr. 95. gr. laga nr. 88/2008.

Úrskurður héraðsdóms um að X skyldi áfram sæta gæsluvarðhaldi, á grundvelli a. liðar 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Viðar Már Matthíasson, Benedikt Bogason og Helgi I. Jónsson.

Varnaraðili skaut málinu til Hæstaréttar með kæru 16. nóvember 2012, sem barst réttinum ásamt kærumálsgögnum 19. sama mánaðar. Kærður er úrskurður Héraðsdóms Reykjaness 16. nóvember 2012, þar sem varnaraðila var gert að sæta gæsluvarðhaldi allt til föstudagsins 23. nóvember klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldinu verður markaður skemmri tími.

Sóknaraðili krefst þess að úrskurðurinn verði staðfestur.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjaness föstudaginn 16. nóvember 2012.

Lögreglustjórinn á Suðurnesjum hefur í dag krafist þess að X, kt. [...], verði með úrskurði Héraðsdóms Reykjaness gert að sæta gæsluvarðhaldi allt til föstudagsins 23. nóvember 2011, kl. 16:00. Þá er þess krafist að honum verði gert að sæta einangrun á meðan á gæsluvarðhaldinu stendur.

Í greinargerð með kröfunni segir að ávana- og fíkniefnadeild lögreglustjórans á höfuðborgarsvæðinu hafi haft til rannsóknar mál er varði stórfelldan innflutning fíkniefna hingað til lands. Málið hafi verið rannsakað í samstarfi við lögregluna í Danmörku.

Í greinargerðinni kemur fram að maður að nafni A hafi sætt rannsókn lögreglu en hann sé grunaður um að hafa ásamt öðrum staðið að skipulagningu innflutnings fíkniefna hingað til lands. Rannsókn lögreglu hér á landi hafi leitt í ljós tengsl A við kærða X. Fram hafi komið við rannsóknina að A og X hafi hist hér á landi í síðustu viku og náð í peninga. Þeir hafi síðan farið út til Kaupmannahafnar föstudaginn 9. nóvember sl. og átt bókað far heim í gær með sama flugi. Lögreglan hafi fengið upplýsingar um að þeir hafi gist á sama hóteli í Kaupmannahöfn. Í gær hafi X verið handtekinn við komu hingað til lands. A hafi verið handtekinn í Kaupmannahöfn í gær og við leit í herbergi hans hafi fundist mikið magn fíkniefna, en X og A hafi deilt saman herbergi á meðan þeir voru úti í Danmörku. A sé nú í haldi dönsku lögreglunnar. Í tengslum við rannsókn málsins í Danmörku hafi lögreglan gert húsleit á fleiri stöðum Kaupmannahöfn í gær og fundið þar umtalsvert magn fíkniefna.

Við skýrslutöku hjá lögreglu hafi kærði neitað aðild að málinu.

Í greinargerðinni segir að rannsókn lögreglu sé nú á frumstigi en miði áfram og sé unnin í samstarfi við lögregluna í Danmörku. Rannsaka þurfi þætti er snúi að skipulagningu og fjármögnun brotsins. Nauðsynlegt sé að yfirheyra kærða frekar og fleiri einstaklinga, vitni og mögulega samseka sem kunni að tengjast málinu. Mikilvægt sé talið í þágu rannsóknarinnar að unnt sé að bera upplýsingar undir kærða sjálfstætt á meðan hann sætir gæsluvarðhaldi og að hann sæti einangrun á þessu stigi rannsóknarinnar. Gangi kærði frjáls ferða sinna geti hann torveldað rannsókninni, s.s. með því að koma undan munum sem hafa sönnunargildi í málinu eða haft áhrif á aðra samverkamenn.

Kærði sé undir rökstuddum grun um aðild að broti sem allt að 12 ára fangelsisrefsing sé lögð við. Um sé að ræða mikið magn fíkniefna sem víst þyki að átt hafi að fara í sölu- og dreifingu hér á landi. Þyki þannig brýnt að vernda rannsóknarhagmuni á þessu stigi málsins með því að varna því að kærði gangi laus.

Með vísan til framangreinds sé það mat lögreglustjóra að lagaskilyrðum rannsóknargæslu sé fullnægt. Með skírskotun til þess, framlagðra gagna og a.liðar 1. mgr. 95. gr. laga nr. 88/2008 um meðferð sakamála er þess krafist að krafan nái fram að ganga.

Með vísan til alls framanritaðs og gagna málsins er fallist á það með lögreglustjóra að kærða sé undir rökstuddum grun um að hafa framið brot sem fangelsisrefsing liggur við. Fallist er á það með lögreglustjóra að skilyrðum a. liðar 1. mgr. 95. gr. laga um meðferð sakamála nr. 88/2008 sé fullnægt. Er því fallist á kröfu lögreglustjóra eins og hún er fram sett og nánar greinir í úrskurðarorði.

                Ragnheiður Bragadóttir héraðsdómari kveður upp úrskurð þennan.

Úrskurðarorð:

Kærði, X, skal sæta gæsluvarðhaldi allt til föstudagsins 23. nóvember 2011, kl. 16:00.

Kærði sæti einangrun meðan á gæsluvarðhaldinu stendur.