Fimmtudaginn 13. nóvember 2014.
Nr. 727/2014.	Lögreglustjórinn á Suðurnesjum (Súsanna Björg Fróðadóttir fulltrúi) gegn X (Bjarni Hauksson hrl.)

 

Kærumál. Farbann.

Staðfestur var úrskurður héraðsdóms þar sem X var gert að sæta áfram farbanni á grundvelli b. liðar 1. mgr. 95. gr. laga nr. 88/2008 um meðferð sakamála, sbr. 1. mgr. 100. gr. sömu laga.

 

Dómur Hæstaréttar.

Mál þetta dæma hæstaréttardómararnir Helgi I. Jónsson og Benedikt Bogason og Karl Axelsson settur hæstaréttardómari.   

Varnaraðili skaut málinu til Hæstaréttar með kæru 11. nóvember 2014 sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 11. nóvember 2014 þar sem varnaraðila var áfram gert að sæta farbanni allt til þriðjudagsins 9. desember 2014 klukkan 16. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess að hinn kærði úrskurður verði felldur úr gildi.  

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjaness 11. nóvember 2014.

Lögreglustjórinn á Suðurnesjum krafðist þess í dag fyrir Héraðsdómur Reykjaness með vísan til b liðar 1. mgr. 95. gr. og 1., 2. og 3. mgr. 100. gr. laga um meðferð sakamála nr. 88/2008 að X, kt. [...], verði með úrskurði gert að sæta áframhaldandi farbanni allt til þriðjudagsins 9. desember 2014 kl. 16:00.

Kærði krefst þess aðallega að kröfunni verið hafnað en til var að farbanni verið markaður skemmri tími.

Krafan er reist á því að kærði sé undir rökstuddum grun um brot gegn 210. gr. a almennra hegningarlaga nr. 19/1940.

Í kröfu lögreglunnar og öðrum gögnum málsins kemur m.a. fram að 1. ágúst sl. hafi tollgæslan á Keflavíkurflugvelli haft afskipti af kærða við komu hans til landsins. Hafi tollgæsluna grunað að kærði hefði í vörslum sínum barnaklám. Við leit í farangri hafi fundist vísbendingar um slíkt og lögreglan verið kölluð til í framhaldinu. Vegna rannsóknar málsins hafi verið lagt hald á tvær Samsung tölvur og sex minnislykla sem kærði hafi haft meðferðis umrætt sinn. Rannsókn sé nú lokið á mununum sem haldlagðir voru er kærði kom til  landsins.  Við skoðun á annarri Samsung tölvunni hafi komið í ljós rúmlega 36.000 ljósmyndir sem sýni unga drengi nakta og á kynferðislegan hátt. Einnig hafi rannsókn leitt í ljós að kærði hafi vistað í tölvum sínum og minniskubbum kvikmyndaskrár sem hafi verið eytt af tölvunum. Lögregla hafi fundið 11 kvikmyndir sem sýni drengi á kynferðislegan hátt. Þá hafi lögregla einnig lagt hald á fartölvu á dvalarstað kærða hér á landi við húsleit sem framkvæmd hafi verið 19. ágúst sl. Hafi rannsókn lögreglu á þeirri tölvu m.a. leitt í ljós að horft hafi verið á hreyfimyndir í tölvunni sem lögregla telur innihalda kynferðisbrot gegn börnum. Um sé að ræða skrá sem síðast hafi verið opnuð 12. ágúst sl. og gefi heiti skráarinnar tilefni til að ætla að um sé að ræða skrá sem innihaldi svipað efni. Rannsókn á tölvugögnum kærða sé lokið og telji rannsakandi engan vafa leika á því að kærði sé eigandi þessara gagna og muni málið fara nú í kjölfarið til saksóknara og er talið afar líklegt að gefin verði út ákæra með hraði á hendur kærða.

Kærði hafi við skýrslutökur hjá lögreglu alfarið neitað sök. Hafi hann gefið þær skýringar á tilvist framangreindra mynda í tölvum sínum og á usb kubbum að hann hafi ekki einn haft aðgang að tölvum sínum. Hafi samstarfsmenn hans haft aðgang að tölvunum og telji kærði að þeir gætu hafa komið þeim fyrir í tölvunum. Varðandi usb kubbana hafi kærði greint frá því að hann hefði keypt þá notaða á útimarkaði í [...]. Varðandi tölvuna, sem hald hafi verið lagt á á dvalarstað kærða hér á landi, hafi kærði gefið þær skýringar að tölvan sé í eigu dóttur hans og hann hafi ekki horft á framangreinda hreyfimynd í tölvunni. Miðað við þau rannsóknargögn sem liggi fyrir í málinu telji lögregla skýringar kærða á tilvist umræddra ljós- og hreyfimynda vera afar ótrúverðugar. Rannsakandi telji ekki nokkurn vafa leika á því að kærði sé eigandi umræddra gagna.

Kærði hafi þann [...] verið dæmdur í Hæstarétti í 3 ára og 6 mánaða fangelsi fyrir kynferðisbrot gegn ungum dreng, brot gegn 1. og 3. mgr. 202. gr. almennra hegningarlaga nr. 19/1940. Kærða hafi verið veitt reynslulausn þann 7. desember 2012 í 2 ár á eftirstöðum refsingar, 420 dögum. Þau brot sem kærði sé sakaður um séu mjög alvarleg að mati lögreglu og telji lögregla rökstuddan grun vera fyrir hendi um að kærði hafi brotið gegn XXII. kafla almennra hegningarlaga nr. 19/1940, nánar tiltekið 210. gr. a.

Kærði er íslenskur ríkisborgari en sé búsettur og með lögheimili í [...] og starfi þar sem [...]. Kærði hafi því takmörkuð tengsl við landið að mati lögreglu. Þá beinist rannsókn lögreglu að alvarlegum brotum sem kærða er gefið sök að hafa framið. Í ljósi þess og alvarleika þeirra brota sem kærða sé gefið að sök, telji lögregla hættu á að kærði muni reyna að komast úr landi eða leynast ellegar koma sér undan með öðrum hætti undan málsókn eða fullnustu refsingar verði honum ekki gert að sæta farbanni. Af þessum sökum telji lögregla að skilyrðum b liðar 1. mgr. 95. gr., sbr. 100. gr. laga um meðferð sakamála sé fullnægt í málinu. Vísist í þessu skyni einnig til dóma Hæstaréttar Íslands í máli nr. 559/2014 frá 26. ágúst og að auki í máli nr. 670/2014 frá 16. október sl. þar sem fyrri farbannskrafa lögreglu hafi verið tekinn til greina.

Með vísan til alls framangreinds, b liðar 1. mgr. 95. gr., sbr. 1., 2. og 3. mgr. 100. gr. laga nr. 88/2008 um meðferð sakamála, 210. gr. a almennra hegningarlaga nr. 19/1940, telji lögreglustjóri brýna hagsmuni standa til þess að kærða verði gert að sæta áframhaldandi farbanni allt til þriðjudagsins 9. desember 2014 kl. 16:00.

Samkvæmt rannsóknargögnum málsins er kærði undur rökstuddum grun um að hafa framið brot sem fangelsisrefsing er lögð við. Kærði er íslenskur ríkisborgari en hann er með lögheimili í [...] þar sem hann býr og starfar. Með dómi Hæstaréttar í máli nr. 559/2014 var kærða gert að sæta farbanni til 16. september sl. og með dómi Hæstaréttar í máli nr. 614/2014 var kærða gert að sæta farbanni til dagsins í dag. Rannsókn málsins er nú lokið og verða rannsóknargögn, að sögn fulltrúa lögreglustjóra,  send ríkissaksóknara á allra næstu dögum en rannsóknin mun hafa verið tæknilega flókin og tímafrek. Með vísan til þessa er fallist á að áfram sé nauðsynlegt að tryggja nærveru kærða meðan máli hans er ekki lokið, enda skilyrðum 1. mgr. 100. gr. laga nr. 88/2008, sbr. b lið 1. mgr. 95. gr. sömu laga, fullnægt til þess að kærða verði bönnuð för úr landinu. Verður því fallist á kröfu lögreglustjóra eins og nánar greinir í úrskurðarorði.

Úrskurð þennan kveður upp Gunnar Aðalsteinsson héraðsdómari.

Úrskurðarorð:

Varnaraðili, X, kt. [...], sæti farbanni allt til þriðjudagsins 9. desember nk. kl. 16:00.