Miðvikudaginn 8. október 2014.
Nr. 653/2014.	Lögreglustjórinn á höfuðborgarsvæðinu (Jón H. B. Snorrason saksóknari) gegn X (Brynjólfur Eyvindsson hdl.)

 

Kærumál. Gæsluvarðhald. A. liður 1. mgr. 95. gr. laga nr. 88/2008.

Staðfestur var úrskurður héraðsdóms þar sem X var gert að sæta gæsluvarðhaldi á grundvelli a. liðar 1. mgr. 95. gr. laga nr. 88/2008 um meðferð sakamála og einangrun á meðan á gæsluvarðhaldinu stæði.

 

Dómur Hæstaréttar.

Mál þetta dæma Helgi I. Jónsson hæstaréttardómari og Guðrún Erlendsdóttir og Ingveldur Einarsdóttir settir hæstaréttardómarar.

Varnaraðili skaut málinu til Hæstaréttar með kæru 6. október 2014 sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 6. október 2014 þar sem varnaraðila var gert að sæta gæsluvarðhaldi allt til mánudagsins 13. október 2014 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess að hinn kærði úrskurður verði felldur úr gildi en til vara að gæsluvarðhaldinu verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjanes 6. október 2014.

Lögreglustjórinn á höfuðborgarsvæðinu hefur í dag krafist þess með vísan til a-lið 1. mgr. 95. gr.  og b-lið 1. mgr. 99. gr.  laga nr. 88/2008 um meðferð sakamála að X, kt. [...], sæti gæsluvarðhaldi allt til föstudagsins 17. október nk., kl. 16:00.  Þá er þess krafist að kærðu verði gert að sæta einangrun á meðan á gæsluvarðhaldinu stendur.

Kærða hefur mótmælt kröfu lögreglustjóra.

I

Í greinargerð lögreglustjórans á höfuðborgarsvæðinu kemur meðal annars fram að að kvöldi föstudagsins 3. október sl., kl. 19:44, hafi lögreglan í Stokkhólmi handtekið aðila með mikið magn fíkniefna í fórum sínum. Hafi umræddur aðili verið með símanúmerið [...].

Samkvæmt gögnum lögreglu hafi kærða, sem þá var stödd í Stokkhólmi, reynt að hringja ítrekað í umrætt símanúmer hið sama kvöld, en án árangurs. Hafi kærða síðan verið handtekin við komuna til landsins í gærkvöldi, grunuð um aðild að umræddu fíkniefnamisferli.

Við skýrslutöku í nótt hafi kærða viðurkennt að hafa farið til Stokkhólms í þeim tilgangi að flytja fjögur kíló af amfetamíni til Íslands.  Kærða kvað aðila, sem hún treystir sér ekki til að segja hver er, hafa beðið sig um að flytja efnin til Íslands og að hún hafi átt að fá tvær milljónir króna fyrir innflutninginn. Kærða sagðist hins vegar hafa hætt við að flytja efnin áður en hún fór til Svíþjóðar og jafnframt hafa tilkynnt skipuleggjanda innflutningsins þá ákvörðun.

Lögreglustjóri segir framburð kærðu um fráhvarf hennar frá fíkniefna­innflutningnum ekki standast því 4. október sl. hafi aðili, með símanúmerið [...], hringt í kærðu og skýrt henni frá því að ekki gæti orðið af innflutningnum þar sem ekki hefði náðst í aðilann sem verið hefði með efnin. Samkvæmt gögnum lögreglu hafi umræddur maður hringt kl. 18:03 hinn 3. október sl. í þann aðila sem handtekinn hafi verið með efnin og spurt hann hvort allt væri í lagi. Hann hafi svarað játandi og hafi símtalinu þá verið slitið.

Um kl. 14:30 í dag hafi lögregla síðan handtekið þann aðila sem umrætt kvöld hafi bæði verið í símasambandi við kærðu og þann mann sem handtekinn var með fíkniefnin í fórum sínum.  Við handtökuna hafi hann verið með símanúmerið [...]. Sá aðili hafi ekki enn verið yfirheyrður af lögreglu.

II

Lögreglustjóri segir kærðu undir rökstuddum grun um að hafa ætlað að flytja hingað til lands mikið magn amfetamíns. Rannsóknin málsins sé á frumstigi. Lögregla telji ljóst að fleiri aðilar tengist málinu og þurfi að hafa uppi á þeim og taka af þeim skýrslur. Að mati lögreglu megi ætla að ef kærða verði látin laus muni hún eiga þess kost að torvelda rannsókn málsins, svo sem með því að ræða við samverkamenn og hafa áhrif á framburð þeirra eða koma undan munum. Rannsókn málsins, sem unnin sé í samvinnu við sænsk lögregluyfirvöld, sé á viðkvæmu stigi og því afar brýnt að krafa lögreglustjóra verði tekin til greina.

Sakarefnið kveður lögreglustjóri varða við 173. gr. a. almennra hegningarlaga en brot gegn því ákvæði varði allt að tólf ára fangelsi.

Samkvæmt öllu framansögðu og með vísan til gagna málsins telji lögreglustjóri nauðsynlegt að kærðu verði með vísan til a-liðar 1. mgr. 95. gr. laga um meðferð sakamála nr. 88/2008 gert að sæta gæsluvarðhaldi til föstudagsins 17. október nk. kl. 16.00 og til að sæta einangrun samkvæmt b-lið 1. mgr. 99. gr. sömu laga.

III

Með vísan alls framanritaðs, svo og gagna málsins, er fallist á það með lögreglustjóra að kærða sé undir rökstuddum grun um að hafa brotið gegn 173. gr. a. almennra hegningarlaga nr. 19/1940, eftir atvikum sbr. 20. og 22. gr. sömu laga, en brot gegn 173. gr. a. getur varðað allt að tólf ára fangelsi.

Rannsókn málsins er í fullum gangi. Þannig var ætlaður samverkamaður kærðu handtekinn kl. 14:30 í dag en ekki hefur gefist ráðrúm til þess að yfirheyra hann. Er fallist á það með lögreglustjóra að gangi kærða laus megi ætla að hún kunni að torvelda rannsókn málsins, svo sem með því að afmá merki eftir brot, skjóta undan munum ellegar hafa áhrif á samseka eða vitni. Skilyrði a-liðar 1. mgr. 95. gr. laga nr. 88/2008 um meðferð sakamála eru því uppfyllt í málinu. Þá er fallist á að uppfyllt séu skilyrði til að kærða sæti einangrun meðan á gæsluvarðhaldi stendur skv. 2. mgr. 98. gr. laga nr. 88/2008, sbr. b-lið 1. mgr. 99. gr. sömu laga. Er því fallist á kröfu lögreglustjóra um að kærða sæti gæsluvarðhaldi með þeim hætti sem nánar greinir í úrskurðarorði.

Úrskurð þennan kveður upp Kristinn Halldórsson héraðsdómari.

Ú r s k u r ð a r o r ð :

Kærða, X, skal sæta gæsluvarðhaldi allt til mánudagsins 13. október nk., kl. 16:00.

Kærða skal sæta einangrun meðan á gæsluvarðhaldinu stendur.