Miðvikudaginn 11. júlí 2012.
Nr. 482/2012.	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Magnús Ingi Erlingsson hrl.)

 

Kærumál. Gæsluvarðhald. A. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Eiríkur Tómasson, Greta Baldursdóttir og Þorgeir Örlygsson.

Varnaraðili skaut málinu til Hæstaréttar með kæru 8. júlí 2012 sem barst réttinum ásamt kærumálsgögnum degi síðar. Kærður er úrskurður Héraðsdóms Reykjavíkur 8. júlí 2012, þar sem varnaraðila var gert að sæta gæsluvarðhaldi allt til föstudagsins 13. júlí 2012 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi og einangrun verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Við skýrslutöku hjá lögreglu 8. júlí 2012 játaði varnaraðili að hafa ásamt Y farið inn á heimili A að [...] í [...] og svipt hann þar frelsi sínu. Varnaraðili kvaðst hins vegar engin verðmæti hafa tekið þar á staðnum og vísaði um það atriði til Y með þeim orðum að „Y var bara eitthvað að taka saman dótið inn í íbúðinni.“ Þegar krafa um gæsluvarðhald yfir varnaraðila var tekin fyrir á dómþingi síðar sama dag lét héraðsdómari fyrir farast að spyrja varnaraðila, svo ekki færi milli mála, hvaða brot hann hefði játað. Er þetta aðfinnsluvert, meðal annars í ljósi 2. mgr. 111. gr. laga nr. 88/2008.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjavíkur sunnudaginn 8. júlí  2012.

Lögreglustjórinn á höfuðborgarsvæðinu hefur krafist þess að Héraðsdómur Reykja­víkur úrskurði að X, kt. [...], verði með vísan til a. liðar 1. mgr. 95. gr. sakamálalaga nr. 88/2008, gert að sæta gæsluvarðhaldi allt til föstudagsins 13. júlí 2012 kl. 16.00  Þá er þess með vísan til b. liðar 1. mgr. 99. gr. sömu laga krafist að honum verði gert að sæta einangrun á meðan á gæsluvarðhaldinu stendur.

Í greinargerð Lögreglustjórans á höfuðborgarsvæðinu kemur fram að í gærmorgun hafi lögreglu borist tilkynning frá [...], [...] um að ráðist hafi verið að íbúa þar, hann sviptur frelsi sínu og rændur.  Tilkynningin hafi borist frá starfsfólki [...] sem hafi komið á heimili vinnufélaga síns þar skömmu áður vegna þess að þau hafi saknað hans úr vinnu og haft áhyggjur af honum.  Þegar þau hafi komið að heimili hans hafi þau orðið vör manna þar, sem hafi komið sér undan með því að fara út um svalir íbúðarinnar.

Árásarþolinn, A hafi, þegar komið var að, verið bundinn og með límteip fyrir munni og mjög miður sín, með sýnilega áverka og af honum dregið. A hafi getað gefið greinargóða lýsingu sem hafi komið heim og saman við Y sem lögreglan hafi handtekið í grenndinni eða við [...] í [...].

A hafi lýst atvikum þannig að hringt hafi verið á dyrabjöllu hjá honum um klukkan 03:00 aðfaranótt s.l. föstudags.  Hann hafi þá verið sofandi, vaknað og farið til dyra.  Umsvifalaust hafi þá tveir menn ruðst inn í íbúðina og á hann.  Þeir hafi strax yfirbugað hann bundið og troðið einhverju upp í munn hans og sett límteip fyrir.  Þeir hafi þjarmað að honum og beitt hann ofbeldi og hótunum af ýmsu tagi.  Þeir hafi gefið honum skipanir um að gefa upplýsingar um bankanúmer og aðgangsnúmer til þess að taka peninga út af bankareikningum hans.  A kveðist hafa látið undan og hafi mennirnir fengið hann til að millifæra af sínum reikningi á reikninga sem þeir hafi krafið hann um að leggja inn á.  A hafi sagt mennina hafa leitað verðmæta á heimilinu og tekið þaðan ýmis verðmæti. A kveði ofbeldið og frelsissviptinguna hafa staðið yfir frá 03:00 um nóttina þar til samstarfsmenn hans hafi komið honum til hjálpar um klukkan 10:30 um morguninn.

Í samræmi við framburð A hafi 453.000 krónur verið færðar af reikningi hans á bankareikning Y nr. [...] um morguninn.

Þegar kærði Y hafi verið handtekinn hafi hann haft í fórum sínum rúmlega 308.000 kr. í seðlum og skiptimynt, tvær lyklakippur og minnislykil sem hafi verið úr eigu A, ávísun stílaða á hann og blað, sem komið hafi heim og saman við það sem A segi að sér hafi verið sýnt, með handskrifaðri kennitölu kærða, Y, og bankanúmeri hans.

Við yfirheyrslur hafi kærði, Y, neitað öllum sakargiftum og gefið ótrúverðugar skýringar á ástæðu millifærslu á milli bankareikninga hans og A og engar skýringar gefið á því að hann hafi verið með persónulega muni A í fórum sínum við handtöku. Þá liggi fyrir upplýsingar frá starfsmönnum [...]bankans að skömmu fyrir handtökuna hafi kærði millifært tæplega helming upphæðarinnar, sem millifærð hafi verið af reikningi A inn á hans reikning, inn á reikning kærða X, sbr. gögn lögreglu, og tekið út um 305.000 kr. í peningum út af eigin bankareikningi.

Kærði hafi verið handtekinn síðdegis í gær og verið þá í mjög annarlegu ástandi og því ekki unnt að yfirheyra hann þá.  Við yfirheyrslu fyrr í dag hafi kærði játað aðild sína að árásinni á A, að [...], [...] aðfaranótt sl. föstudags.

Talsverð rannsókn sé framundan.  Yfirheyra þurfi brotaþola nánar, vitni og kærðu ítarlegar.

Kærðu séu undir rökstuddum grun um aðild að sérstaklega alvarlegri líkamsárás og andstyggilegu brot, þar sem ruðst hafi verið inn á brotaþola um miðja nótt, hann bundinn á höndum og fótum og teipað fyrir munn hans og hann þannig bjargarlaus beittur ofbeldi klukkustundum saman. Kærðu hafi fengið brotaþola með hótunum um ofbeldi og með því að beita hann ofbeldi til þess að láta af hendi peninga auk þess sem kærðu hafi tekið ýmis verðmæti af heimili hans. Brot kærðu séu talin varða við 252. gr., 2. mgr. 218. gr. og 2. mgr. 226. gr. almennra hegningarlaga nr. 19/1940.  Brot kærðu kunni að varða fangelsi allt að 16 árum.

Rannsókn málsins sé á frumstigi og því brýnt að kærða verði gert að sæta gæsluvarðhaldi þannig að hann fái ekki tækifæri til að torvelda rannsóknina með því að koma undan munum eða hafa áhrif á aðra samseka og eða vitni. Með vísan til þess sem að framan er rakið og rannsóknargagna þyki skilyrði a. liðar 1. mgr. 95. gr. laga nr. 88/2008 til þess að úrskurða hann til að sæta gæsluvarðhaldi og jafnframt til þess, samkvæmt b. lið 1. mgr. 99. gr. sömu laga, að sæta einangrun á meðan á gæsluvarðhaldi standi.

                Samkvæmt því sem rakið er í greinargerð lögreglustjóra og ráða má af öðrum gögnum málsins er kærði undir rökstuddum grun um að hafa, aðfararnótt síðastliðins föstudags í félagi við Y, ráðist á og beitt mann líkamsmeiðingum svipt hann frelsi sínu og rænt. Brot það sem kærði er grunaður um getur varðað fangelsisrefsingu, allt að sextán árum.  Kærði hefur játað aðild sína að brotinu, en rannsókn þess er þó á frumstigi.  Er fallist á það með lögreglustjóranum að kærði geti torveldað rannsókn málsins, svo sem með því að hafa áhrif á samseka eða vitni, gangi hann laus. Með vísan til þess og framangreinds rökstuðnings í greinargerð lögreglustjóra að öðru leyti verður krafan tekin til greina eins og hún er fram sett.  Með sömu rökum er fallist á að kærði sæti einangrun í gæsluvarðhaldinu. 

Hervör Þorvaldsdóttir héraðsdómari kveður upp úrskurð þennan.

Ú R S K U R Ð A R O R Ð :

Kærði,    X, kt. [...], skal sæta gæsluvarðhaldi allt til föstudagsins 13. júlí 2012 kl. 16.00.  Kærði skal sæta einangrun á meðan á gæsluvarðhaldinu stendur.