Þriðjudaginn 17. apríl 2012.
Nr. 242/2012:	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Björgvin Jónsson hrl.)

 

Kærumál. Reynslulausn. Skilorðsrof. Fullnusta refsingar.

Úrskurður héraðsdóms um að X skyldi gert að afplána 300 daga eftirstöðvar fangelsisrefsingar, sem honum hafði verið veitt reynslulausn á, var staðfestur.

 

Dómur Hæstaréttar.

Mál þetta dæma hæstaréttardómararnir Ólafur Börkur Þorvaldsson og Þorgeir Örlygsson og Helgi I. Jónsson settur hæstaréttardómari.

Varnaraðili skaut málinu til Hæstaréttar með kæru 11. apríl 2012, sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 11. apríl 2012, þar sem varnaraðila var gert að afplána 300 daga eftirstöðvar fangelsisrefsingar. Kæruheimild er í 2. mgr. 65. gr. laga nr. 49/2005 um fullnustu refsinga. Varnaraðili krefst þess að hafnað verði kröfu sóknaraðila um að varnaraðila verði gert að afplána eftirstöðvar fyrrnefndrar fangelsisrefsingar.

Sóknaraðili krefst staðfestingar hins kærða úrskurðar.

Fram er kominn sterkur grunur um að varnaraðili hafi, eftir að hann hlaut reynslulausn þá sem í hinum kærða úrskurði greinir, framið brot sem varðað geta sex ára fangelsi og þar með rofið skilyrði reynslulausnarinnar. Verður hinn kærði úrskurður því staðfestur.

Dómsorð:

      Hinn kærði úrskurður er staðfestur.   

                                                                           

Úrskurður Héraðsdóms Reykjaness 11. apríl 2012.

Með beiðni lögreglustjórans á höfuðborgarsvæðinu, dagsettri í dag, er þess krafist að Héraðsdómur Reykjaness úrskurði að X, [...], verði á grundvelli 2. mgr. 65. gr. laga nr. 49/2005 um fullnustu refsinga gert að sæta afplánun á 300 daga eftirstöðvum refsingar samkvæmt dómi Hæstaréttar frá 29. janúar 2009, sem honum var veitt með ákvörðun Fangelsismálastofnunnar um reynslulausn þann 19. janúar 2011.

Kærði mótmælir kröfunni.

Í greinargerð lögreglustjórans kemur fram að um kl. 18:30 í gærkvöldi, 10. apríl 2012, hafi lögregla fengið tilkynningu um tvo aðila í annarlegu ástandi á veitingastaðnum [...] í Reykjavík. Annar þeirra hafi verið kærði, X, en þegar lögregla hafi komið á vettvang hafi kærði staðið fyrir utan veitingastaðinn með íþróttatösku sem hann kvaðst eiga. Í töskunni hafi verið ýmsar tegundir lyfja, poki með skartgripum, fatnaður og tvö stór blekhylki í prentara. Kærði hafi verið handtekinn og færður á lögreglustöð. Lögregla hafi kærða grunaðan um nokkur þjófnaðarbrot, vopnalagabrot, fíkniefnalagabrot og nytjastuld sem framin hafi verið er kærði hafi verið á reynslulausn. Þá hafi kærði játað aðild sína að sumum þessara brota. Um sé að ræða:

Mál lögreglu nr. 007-2011-35890. Í málinu sé kærði sterklega grunaður um innbrot í bifreiðina [...], sem hafi staðið kyrrstæð við [...] í Reykjavík, 11. júní 2011 og að hafa m.a. stolið þaðan svartri kvenmannskápu og svörtum iPod. Við skýrslutöku kvaðst kærði ekki muna eftir þessu atviki en kærði var handtekinn í tengslum við mál nr. 007-2011-35877 og í fórum hans hafi fundist kaupsamningur um bifreiðina [...], þar sem fram komi nafn eiganda bifreiðarinnar, svört kvenmannskápa og svartur iPod sem einnig hafi verið merktur eiganda bifreiðarinnar.

Mál lögreglu nr. 007-2011-35877. Í málinu játi kærði vörslur á 5,42 g af amfetamíni og kylfu sem hafi fundist á honum við leit við [...] í Hafnarfirði 12. júní 2011.

Mál lögreglu nr. 007-2011-38299. Í málinu játi kærði að hafa brotist inn á heimili [...] í Hafnarfirði, 21. júní 2011 og að hafa m.a. stolið þaðan tölvu og blóðþrýstingsmæli.

Mál lögreglu nr. 007-2011-65991. Í málinu játi kærði vörslur á 0,81 g af amfetamíni og vörslur á hnífi að [...] í Hafnarfirði 6. nóvember 2011.

Mál lögreglu nr. 007-2011-73002. Í málinu sé kærði sterklega grunaður um hegningarlagabrot í félagi við nafngreindan aðila með því að hafa á tímabilinu 4. – 9. desember 2011 millifært alls 151.000 krónur af reikningi í eigu annars manns en kærði hafi fengið heimild hjá eiganda reikningsins um að millifæra 31.000 krónur sem eigandi reikningsins hafi skuldaði kærða. Kærði neiti sök í málinu en málið sé til rannsóknar.

Mál lögreglu nr. 007-2012-19044. Í málinu sé kærði sterklega grunaður um að hafa, í félagi við nafngreindan aðila, í heimildarleysi tekið bifreiðina [...] að [...] í Hafnarfirði 5. apríl 2012. Kærði neiti sök og kveðst í skýrslutöku hjá lögreglu hafa fengið bifreiðina að láni hjá skráðum eiganda hennar. Málið sé til rannsóknar.

Mál lögreglu nr. 007-2012-18934. Í málinu sé kærði sterklega grunaður um að hafa brotist inn í íbúðarhús að [...] í Garðabæ 5. apríl 2012 og stolið þaðan m.a. þremur Apple fartölvum og Rolex úri úr gulli. Kærði hafi játað sök við skýrslutökur hjá lögreglu en málið sé enn til rannsóknar.

Mál lögreglu nr. 007-2012-19407. Í málinu sé kærði sterklega grunaður um að hafa í félagi við nafngreindan aðila brotist inn í íbúð að [...] í Hafnarfirði 9. apríl 2012 og m.a. stolið tveimur fartölvum og sjónvarpsflakkara. Í skýrslutöku hjá lögreglu hafi kærði játað aðild sína með þeim hætti að hann hafi ekið aðilanum sem hafi verið með honum að [...] og sagt honum númer íbúðarinnar. Aðilinn sem hafi verið með honum hafi síðan komið út með ,,raftækjadrasl”. Að öðru leyti hafi kærði ekki tjáð sig um atvik máls. Málið sé til rannsóknar.

Að mati lögreglu hafi kærði nú rofið gróflega almennt skilyrði reynslulausnar sinnar enda liggi fyrir sterkur grunur  um að kærði hafi gerst sekur um brot sem geti varðað allt að 6 ára fangelsi, sbr. 244. gr. og 259. gr. almennra hegningarlaga nr. 19/1940 og 2., sbr. 5. og 6. gr. laga um ávana- og fíkniefni nr. 65/1974. Kærða hafi verið veitt reynslulausn 19. janúar 2011 skilorðsbundið í 2 ár á 300 daga eftirstöðvum 2 ára og 6 mánaða fangelsisrefsingar samkvæmt dómi Hæstaréttar, uppkveðnum 29. janúar 2009, að frádreginni 6 daga gæsluvarðhaldsvist.

Kærði, X, sé undir sterkum grun um brot gegn 244. og 259. gr. almennra hegningarlaga nr. 19/1940 og 2., sbr. 5. og 6. gr. laga um ávana- og fíkniefni nr. 65/1974. Með vísan til framanritaðs, framlagðra gagna og loks með vísan til 2. mgr. 65. gr. laga nr. 49/2005 um fullnustu refsinga, er þess farið á leit að krafan verði tekin til greina eins og hún er sett fram.       

Kærði hefur mótmælt framkominni kröfu lögreglustjóra um að honum verði gert að afplána framangreindar eftirstöðvar fangelsisrefsingar og hefur krafist þess að henni verði hafnað. Lögmaður kærða krefst málsvarnarlauna sér til handa.

Í bréfi Fangelsismálastofnunar ríkisins til lögreglustjórans á höfuðborgarsvæðinu, dagsettu í dag, kemur fram að kærða hafi hinn 19. janúar 2011 verið veitt reynslulausn skilorðsbundið í tvö ár á 300 daga eftirstöðvum 2 ára og 6 mánaða fangelsisrefsingar samkvæmt dómi Hæstaréttar Íslands frá 29. janúar 2009. Samkvæmt 3. mgr. 57. gr. almennra hegningarlaga nr. 19/1940 er reynslulausn bundin því almenna skilyrði að viðkomandi gerist ekki sekur um nýtt brot á skilorðstímanum. Samkvæmt 2. mgr. 65. gr. laga nr. 49/2005 um fullnustu refsinga getur dómstóll úrskurðað að maður, sem hlotið hefur reynslulausn, skuli afplána eftirstöðvar refsingar ef hann á reynslutíma rýfur gróflega almenn skilyrði reynslulausnar, enda liggi fyrir sterkur grunur um að hann hafi framið nýtt brot sem varðað getur sex ára fangelsi eða að brotið varði við 1. mgr. 218. gr. almennra hegningarlaga.

Að öllu framanrituðu virtu, svo og gögnum málsins að öðru leyti, verður að fallast á það með lögreglustjóra að fyrir liggi sterkur grunur um að kærði hafi gerst sekur um brot sem varðað geta sex ára fangelsi, og hafi þannig rofið gróflega skilyrði reynslulausnar. Eru því uppfyllt skilyrði 2. mgr. 65. gr. laga nr. 49/2005 um fullnustu refsinga og er fallist á kröfu lögreglustjóra eins og hún er fram sett og nánar greinir í úrskurðarorði. Málsvarnarlaun skipuðum verjanda til handa úrskurðast ekki.

Jón Höskuldsson héraðsdómari kveður upp úrskurð þennan.

Úrskurðarorð

Kærði, X, afpláni 300 daga eftirstöðvar refsingar samkvæmt dómi Hæstaréttar nr. 93/2009 frá 29. janúar 2009, sem honum var veitt reynslulausn á með ákvörðun Fangelsismálastofnunar 19. janúar 2011.

Málsvarnarlaun úrskurðast ekki.