Dómur Hæstaréttar.

Mál þetta dæma hæstaréttardómararnir Helgi I. Jónsson og Benedikt Bogason og Ingveldur Einarsdóttir settur hæstaréttardómari.

Varnaraðili skaut málinu til Hæstaréttar með kæru 27. október 2015, sem barst réttinum ásamt kærumálsgögnum 29. sama mánaðar. Kærður er úrskurður Héraðsdóms Reykjaness 27. október 2015, þar sem varnaraðila var gert að sæta áfram gæsluvarðhaldi allt til þriðjudagsins 10. nóvember 2015 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Reykjaness 27. október 2015.

Lögreglustjórinn á höfuðborgarsvæðinu hefur í dag krafist þess að kærða, X, kt. [...], verði áfram gert að sæta gæsluvarðhaldi allt til þriðjudagsins 10. nóvember nk. kl. 16.00. Þá er þess krafist að kærða verði gert að sæta einangrun á meðan á gæsluvarðhaldinu stendur.

Í greinargerð lögreglustjórans á höfuðborgarsvæðinu segir að lögreglan hafi nú til rannsóknar stórfellt fíkniefnalagabrot er varði innflutning á sterkum fíkniefnum hingað til lands.

Hinn 28. september hafi lögreglan lagt hald á mikið magn af sterkum fíkniefnum sem fundist hafi í bifreið sem staðsett hafi verið við gistiheimili að [...] í [...] á [...]. Tveir erlendir menn hafi verið handteknir í gistiheimilinu grunaðir um aðild að innflutningi fíkniefnanna hingað til lands. Lögreglan hafi haft eftirlit með umræddri bifreið í nokkra daga. Við það eftirlit hafi lögreglan ítrekað orðið vör við aðra bifreið sem virst hafi fylgja hinni bifreiðinni eftir. Við frekari skoðun lögreglu hafi komið í ljós að um hafi verið að ræða bílaleigubifreiðir sem meðkærði Y hafi verið skráður leigutaki að. Þá hafi lögreglan einnig borið kennsl á kærða X í bifreiðinni. Kærði hafi verið handtekinn þennan sama dag ásamt fleirum og sæti nú gæsluvarðhaldi í þágu rannsóknar málsins.

Við skoðun á þeim gögnum sem haldlögð hafi verið í málinu hafi margt komið fram sem styrki grun lögreglu um aðild kærða að innflutningnum. Til dæmis hafi fundist við skoðun á myndavél kærða minniskort sem notað hafi verið í farsíma hans. Á því korti hafi fundist myndir frá því fyrr í sumar af ferjunni [...] áður en henni var lagt að bryggju og myndir sem sýni akstur bifreiða frá [...], sem og umhverfið í kringum skipið. Í bifreið kærða hafi og fundist kassi utan af farsíma sem meðkærði Y hafi verið með við handtöku, en lögreglan ætli að sá sími hafi verið notaður í samskiptum við ætlaða samverkamenn í [...]. Í bifreið kærða hafi einnig fundist blað þar sem fram komi upplýsingar sem lögreglan telji tengjast ofangreindum innflutningi fíkniefna til landsins. Með heimild héraðsdóms Reykjaness hafi lögregla skoðað síma og fjármálagögn kærða. Við þá skoðun hafi margt komið fram sem styrki grun lögreglu. Ljóst sé að kærði hafi yfir nokkru fjármagni að ráða og að mikið fjármagn virðist hafa farið á milli kærða og meðkærða Y hér á landi og erlendis.

Í greingerð lögreglustjóra segir að kærði hafi neitað sök við skýrslutöku hjá lögreglu. Framburður kærða komi ekki heim og saman við þau gögn sem lögregla hafi undir höndum, framburð meðkærðu og vitna. Við rannsókn málsins hafi nú komið fram að erlendir aðilar hafi tekið þátt í skipulagningu innflutningsins og hafi þeir verið í samskiptum eða í samstarfi við menn hér á landi sem fylgst hafi með ferðum bifreiðarinnar. Lögreglan vinni nú einnig að málinu í samstarfi við [...] yfirvöld og leiti lögreglan nú að ætluðum samverkamönum erlendis. Þá sé einnig unnið að því að afla gagna erlendis frá.

Kærði hafi sætt gæsluvarðhaldi í þágu rannsóknar málsins frá 29. september sl., sbr. úrskurði Héraðsdóms Reykjaness í málum nr. R-[...]/2015, R-[...]/2015 og R-[...]/2015, sem allir hafi verið staðfestir með dómum Hæstaréttar, þ.e. í málum nr. [...]/2015, nr. [...]/2015 og nr. [...]/2015.

Í ljósi framangreinds og þeirra gagna sem lögreglan hafi aflað sé kærði undir rökstuddum grun um aðild að innflutningi á miklu magni af sterkum fíkniefnum hingað til lands. Ljóst sé að fíkniefnin hafi verið ætluð til sölu og dreifingar hér á landi og hafi lögreglan upplýsingar um það að fleiri aðilar tengist málinu. Lögreglan vinni að rannsókn málsins í samstarfi við [...] yfirvöld og sé talin brýn nauðsyn á því að kærði sæti áfram gæsluvarðhaldi á þessu stigi máls þar sem ljóst sé að kærði geti sett sig í samband við meinta samverkamenn gangi hann laus eða þeir sett sig í samband við hann. Þá geti kærði einnig komið undan sönnunargögnum sem lögreglan hafi ekki lagt hald á nú þegar.

Með vísan til framangreinds, framlagðra gagna og a-liðar 1. mgr. 95. gr. laga um meðferð sakamála nr. 88/2008 og b-liðar 1. mgr. 99. gr., sbr. 2. mgr. 98. gr. sömu laga, sé þess krafist að krafan nái fram að ganga eins og hún er sett fram.

Af gögnum málsins verður ráðið að kærði sé undir rökstuddum grun um aðild að innflutningi á miklu magni af hættulegum fíkniefnum hingað til lands og þar með gerst brotlegur við 2. mgr. 173. gr. a. almennra hegningarlaga nr. 19/1940. Slíkt brot getur varðað allt að 12 ára fangelsi. Rannsókn málsins er vel á veg komin, en eftir er þó að rannsaka frekar þátt ætlaðra samverkamanna kærða í brotinu, en upplýsingar um þá hafa komið fram á síðari stigum rannsóknarinnar. Er uppi rökstuddur grunur um aðild þeirra að brotinu. Um er að ræða [...] ríkisborgara og vinnur lögregla að rannsókn á þætti þeirra í samstarfi við [...] yfirvöld. Með bréfum dagsettum 2., 15. og 21. október sl. óskaði lögregla eftir aðstoð [...]yfirvalda við öflun sönnunargagna þar í landi, sem og handtöku fjögurra nafngreindra einstaklinga, tveggja sakborninga og tveggja vitna, í því skyni að færa þá til yfirheyrslu og gera húsleit á heimili sakborninganna. Hinn 22. október sl. barst svar frá [...] yfirvöldum við fyrsta bréfinu þar sem tilkynnt er að beiðnin hafi verið tekin til afgreiðslu.

Hætta þykir á að kærði muni torvelda rannsókn málsins með því að hafa áhrif á ætlaða samverkamenn sína og vitni í [...] fari hann frjáls ferða sinna. Er því fullnægt skilyrðum a-liðar 1. mgr. 95. gr. laga nr. 88/2008 til að fallast megi á kröfu sóknaraðila um að kærða verði gert að sæta áfram gæsluvarðhaldi.

Kærði hefur sætt einangrun í gæsluvarðhaldinu frá 29. september sl. eða í fjórar vikur. Til verndar rannsóknarhagsmunum þykir brýnt að skýrslur verði teknar af ætluðum samverkamönnum og vitnum í [...] áður en einangrun kærða verður aflétt. Með heimild í 2. mgr. 98. gr. laga nr. 88/2008 er því fallist á að kærði sæti enn um sinn einangrun í gæsluvarðhaldinu, en eins og áður greinir getur brot það sem kærði er sakaður um varðað meira en 10 ára fangelsi.

Með vísan til framangreinds er fallist á kröfu sóknaraðila um að kærða verði gert að sæta áfram gæsluvarðhaldi og einangrun eins og krafist er og nánar greinir í úrskurðarorði.

                Úrskurð þennan kveður upp Ragnheiður Bragadóttir héraðsdómari.

Úrskurðarorð:

                Kærði, X, skal sæta gæsluvarðhaldi allt til þriðjudagsins 10. nóvember 2015, kl. 16.00.

                Kærði sæti einangrun meðan á gæsluvarðhaldinu stendur.