Þriðjudaginn 8. janúar 2013.
Nr. 7/2013.	Lögreglustjórinn á Suðurnesjum (Óli Ásgeir Hermannsson fulltrúi) gegn X (Bjarni Hauksson hrl.)

 

Kærumál. Gæsluvarðhald. A. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar

Mál þetta dæma hæstaréttardómararnir Eiríkur Tómasson, Greta Baldursdóttir og Þorgeir Örlygsson.

Varnaraðili skaut málinu til Hæstaréttar með kæru 4. janúar 2013, sem barst réttinum ásamt kærumálsgögnum 7. sama mánaðar. Kærður er úrskurður Héraðsdóms Reykjaness 3. janúar 2013 þar sem varnaraðila var gert að sæta gæsluvarðhaldi til fimmtudagsins 17. janúar 2013 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjaness 3. janúar 2013.

                Lögreglustjórinn á Suðurnesjum hefur krafist þess fyrir dóminum í dag að kærði X, f. [...], verði með úrskurði gert að sæta gæsluvarðhaldi allt til fimmtudagsins 17. janúar 2013, kl. 16:00, og að á þeim tíma verði kærða gert að sæta einangrun.

                Í greinargerð lögreglustjórans á Suðurnesjum segir að embættinu hafi borist tilkynning frá tollgæslunni í Flugstöð Leifs Eiríkssonar 2. janúar 2013 þess efnis að kærði hefði verið stöðvaður á tollhliði vegna gruns um að hann hefði fíkniefni falin í fórum sínum við komu til landsins með flugi frá Varsjá í Póllandi. Við leit tollvarða í farangri kærða hefðu fundist þrjár dósir af barnapúðri og hefði grunur vaknað hjá tollvörðum um að dósirnar innihéldu fíkniefni. Við skoðun í Itemiser greiningarvél tollgæslunnar hefði efnið gefið svörun sem amfetamín.

Í greinargerð lögreglustjóra segir að efnið hafi verið rannsakað hjá tæknideild lögreglustjórans á höfuðborgarsvæðinu þar sem niðurstaðan hafi verið sú að um væri að ræða um 2.002 g af meintu amfetamíni. Þá segir að efnið verði sent til rannsóknar hjá rannsóknarstofnun Háskóla Íslands og að beðið væri niðurstöðu þeirrar rannsóknar.

Þá segir í greinargerðinni að kærði hafi verið yfirheyrður vegna málsins. Hafi hann borið um að hafa verið að koma með barnadót frá Póllandi að beiðni vinar síns, en dótið hefði hann átt að afhenda öðrum manni búsettum á Íslandi. Kærði hafi tjáð lögreglu að hann hefði ekki vitað að í dósunum, sem hann kom með til landsins, væru fíkniefni. Þá hafi kærði tjá lögreglu að hann hefði komið til Íslands í atvinnuleit.

Í greinargerðinni segir að rannsókn málsins sé frumstigi. Verið sé að rannsaka aðdraganda að ferð kærða til landsins og tengsl hans við hugsanlega vitorðsmenn á Íslandi og/eða erlendis. Þá sé verið er að afla upplýsinga frá fjarskiptafyrirtækjum og fjármálastofnunum, auk annarra upplýsinga sem lögregla telji að séu mikilvægar vegna rannsóknar málsins. Telji lögreglan að þau fíkniefni sem kærði hafi komið með til landsins bendi til þess að efnin hafi verið ætluð til sölu og dreifingar og að háttsemi hans kunni að varða við ákvæði 173. gr. a almennra hegningarlaga nr. 19/1940 og ákvæði laga nr. 65/1974 um ávana- og fíkniefni. Lögregla telji að ætla megi að kærði kunni að torvelda rannsókn málsins og hafa áhrif á samseka gangi hann laus. Þá telji lögregla einnig hættu á að kærði verði beittur þrýstingi og að reynt verði að hafa áhrif á hann af hálfu samverkamanna kærða, gangi hann laus á meðan rannsókn málsins fer fram.

                Þess sé krafist að kærða verði gert að sæta einangrun í gæsluvarðhaldinu samkvæmt b-lið 1. mgr. 99. gr. laga nr. 88, 2008.

                Með vísan til alls framangreinds, rannsóknarhagsmuna, a-liðar 1. mgr. 95. gr. laga nr. 88/2008 um meðferð sakamála, 173. gr.a almennra hegningarlaga nr. 19/1940 og laga nr. 65/1974 um ávana og fíkniefni telji lögreglustjóri brýna rannsóknarhagsmuni standa til þess að kærða verði gert að sæta gæsluvarðhaldi allt til fimmtudagsins 17. janúar 2013 og að kærði sæti einangrun á þeim tíma.

Eins og rakið hefur er kærði undir rökstuddum grun um brot sem varðað getur fangelsisrefsingu. Haldi kærði óskertu frelsi sínu gæti hann torveldað rannsókn málsins, s.s. með því að koma sönnunargögnum undan eða hafa áhrif á samseka eða vitni. Með vísan til a-liðar 1. mgr. 95. gr. og b-liðar 1. mgr. 99. gr. laga nr. 88/2008, um meðferð sakamála, er því fallist á kröfu lögreglustjóra eins og hún er fram sett og nánar greinir í úrskurðarorði.

                Ragnheiður Bragadóttir héraðsdómari kveður upp úrskurð þennan.

Úrskurðarorð:

                Kærða, X, sæti gæsluvarðhaldi allt til fimmtudagsins 17. janúar 2013, kl. 16:00.

                Kærði sæti einangrun meðan á gæsluvarðhaldinu stendur.