Dómur Hæstaréttar.

Mál þetta dæma hæstaréttardómararnir Greta Baldursdóttir og Helgi. I. Jónsson og Ingveldur Einarsdóttir settur hæstaréttardómari.

Varnaraðili skaut málinu til Hæstaréttar með kæru 6. október 2015, sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 6. október 2015, þar sem varnaraðila var gert að sæta áfram gæsluvarðhaldi  til þriðjudagsins 13. október 2015 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi en til vara að honum verði ekki gert að sæta einangrun meðan á gæsluvarðhaldi stendur.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Reykjaness 6. október 2015.

Lögreglustjórinn á höfuðborgarsvæðinu hefur í dag krafist þess með vísan til a-liðar 1. mgr. 95. gr. og b-liðar 1. mgr. 99. gr. laga um meðferð sakamála nr. 88/2008, að kærða, X, kt. [...], verði áfram gert að sæta gæsluvarðhaldi allt til þriðjudagsins 20. október nk., kl. 16.  Þá er þess krafist að kærða verði gert að sæta einangrun meðan á gæsluvarðhaldinu stendur.

Kærði mótmælir kröfu lögreglustjóra og krefst þess aðallega að henni verði hafnað, en til vara að gæsluvarðhaldi verði markaður skemmri tími.

I

Í greinargerð lögreglustjóra segir meðal annars að lögreglustjórinn á höfuðborgarsvæðinu hafi til rannsóknar stórfellt fíkniefnalagabrot er varði innflutning á sterkum fíkniefnum hingað til lands.

Þann 22. september sl. kom meðkærði, Y, hingað til lands ásamt erlendri konu á bifreiðinni [...] með ferjunni Norrænu. Lögreglan hafði eftirlit með bifreiðinni þar sem henni var ekið til Reykjavíkur og þaðan til Keflavíkur á tímabilinu 22. – 25. september. Föstudaginn 25. september fór Y  með flugi frá Íslandi, en hann skildi bifreiðina eftir á bifreiðastæði við Keflavíkurflugvöll. Y kom aftur til landsins þann 28. september og sótti bifreiðina. Kærði, X kom einnig með flugi til landsins þennan sama dag og óku þeir á sitt hvorri bifreiðinni sem leið lá inn í [...] á [...] að gistiheimili við [...] í [...]. Þar hitti hann meðkærða Y og voru þeir báðir handteknir af lögreglu stuttu eftir komu þeirra í húsnæðið.  Bifreiðin sem meðkærði Y ók var haldlögð af lögreglu og við leit í henni fannst mikið magn af sterkum fíkniefnum sem voru vel falin í bifreiðinni.

X neitaði sök við fyrstu skýrslutöku hjá lögreglu. X hefur nú játað það að hafa tekið þátt í því að flytja inn ofangreinda bifreið en hann kvaðst ekki hafa vitað að í bifreiðinni væru falin fíkniefni. X hefur lýst fyrir lögreglu hvernig skipulagningu innflutningsins var háttað og að hann hafi áður tekið þátt í sambærilegum innflutningi. Nánar varðandi framburð kærða er vísað í gögn málsins.

Kærði er undir rökstuddum grun um aðild að innflutningi á miklu magni af sterkum fíkniefnum hingað til lands, en lögreglan telur að fleiri aðilar tengist málinu sem taka þarf skýrslu af. Ljóst er að fíkniefnin voru ætluð til sölu og dreifingar hér á landi. Framburðir kærðu sem lögreglan hefur í haldi ber ekki saman og er mikilvægt á þessu stigi máls að geta borið framburði annarra og gögn sjálfstætt undir kærða á meðan hann sætir gæsluvarðhaldi. Lögreglan vinnur að rannsókn málsins og er talin brýn nauðsyn á því að kærði sæti gæsluvarðhaldi á þessu stigi máls þar sem ljóst er að ef kærði gengur laus þá getur hann sett sig í samband við meinta samverkamenn sem ganga lausir eða þeir sett sig í samband við hann. Þá getur kærði einnig komið undan gögnum með sönnunargildi sem lögreglan hefur ekki lagt hald á nú þegar. Þykir þannig brýnt að vernda rannsóknarhagmuni á þessu stigi málsins.

Með vísan til framangreinds, framlagðra gagna og a-liðar 1. mgr. 95. gr. laga um meðferð sakamála nr. 88/2008 og til að sæta einangrun samkvæmt b. lið 1. mgr. 99. gr. sömu laga, er þess krafist að krafan nái fram að ganga eins og hún er sett fram.

II

Með vísan til alls framanritaðs, svo og gagna málsins, er fallist á það með lögreglustjóra að kærði sé undir rökstuddum grun um að hafa framið brot sem fangelsisrefsing liggur við.

Málið er umfangsmikið og enn á byrjunarstigum en í fullum gangi samkvæmt gögnum málsins. Ætla verður lögreglu nokkuð svigrúm til rannsóknarinnar, meðal annars til þess að kanna möguleg tengsl kærða við vitorðsmenn, bæði hér á landi og erlendis. Gangi kærði laus má ætla að hann muni torvelda rannsókn málsins með því að afmá merki eftir brot, skjóta undan munum ellegar hafa áhrif á samseka eða vitni. Samkvæmt þessu telst skilyrðum a-liðar 1. mgr. 95. gr. laga nr. 88/2008 um meðferð sakamála fullnægt til þess að kærða verði gert að sæta gæsluvarðhaldi. Er krafa lögreglustjóra því tekin til greina eins og hún er sett fram og nánar greinir í úrskurðarorði. 

Með vísan til framangreinds er jafnframt fallist á kröfu um að kærða verði gert að sæta einangrun meðan á gæsluvarðhaldsvist hans stendur, sbr. b-lið 1. mgr. 99. gr. laga nr. 88/2008 um meðferð sakamála.

Úrskurð þennan kveður upp Bogi Hjálmtýsson héraðsdómari.

Ú r s k u r ð a r o r ð :

Kærði, X, fæddur [...] 1961, skal sæta gæsluvarðhaldi allt til þriðjudagsins 13. október nk., kl. 16:00.

Kærða er gert að sæta einangrun á meðan á gæsluvarðhaldinu stendur.