Föstudaginn 15. maí 2009.
Nr. 242/2009.	Lögreglustjórinn á höfuðborgarsvæðinu (Anna Barbara Andradóttir, fulltrúi) gegn X (Sveinn Andri Sveinsson hrl.)

 

Kærumál. Farbann.

Hæstiréttur staðfesti úrskurð héraðsdóms um að X skyldi sæta áfram farbanni á grundvelli 1. mgr. 100. gr. laga nr. 88/2008, sbr. b. lið 1. mgr. 95. gr. sömu laga.

 

Dómur Hæstaréttar.

Mál þetta dæma hæstaréttardómararnir Ólafur Börkur Þorvaldsson, Hjördís Hákonardóttir og Jón Steinar Gunnlaugsson. 

Varnaraðili skaut málinu til Hæstaréttar með kæru 12. maí 2009, sem barst réttinum ásamt kærumálsgögnum 14. sama mánaðar. Kærður er úrskurður Héraðsdóms Reykjaness 12. maí 2009, þar sem varnaraðila var gert að sæta farbanni allt til miðvikudagsins 10. júní 2009 klukkan 24. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi en til vara að farbanni verði markaður skemmri tími.

Sóknaraðili krefst þess að hinn kærði úrskurður verði staðfestur.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjaness 12. maí 2009.

Lögreglustjórinn á höfuðborgarsvæðinu hefur krafist þess að X, kt. [...], verði bönnuð för frá Íslandi, allt til og með miðvikudeginum 10. júní 2009.

Kærða hefur mótmælt kröfu lögreglustjóra um farbann og krefst þess til vara að farbanninu verði markaður skemmri tími.

Í greinargerð með kröfu lögreglustjóra kemur fram, að hann hafi haft til rannsóknar milligöngu ákærðu um vændi, þ.e. að hún hafi flutt til Íslands stúlkur, sem hún hafi síðan haft milligöngu um að stundi vændi og taki hluta þóknunar sem greidd sé fyrir. Við rannsókn málsins hafi stúlkur borið um að þær hafi starfað við vændi á vegum kærðu og hún fengið hluta þóknunar fyrir.

Þann 12. febrúar sl. hefði kærða farið til Hollands með kærasta sínum og hefði lögreglu borist upplýsingar um að þau hygðust koma með mikið magn fíkniefna til baka úr ferðinni. Kærða hefði komið aftur til Íslands fyrr en áætlað var en kærasti hennar hefði verið handtekinn í Amsterdam fyrir innflutning til Hollands á 12 kg af kókaíni. Kærða hefði í kjölfarið verið úrskurðuð í gæsluvarðhald á grundvelli fíkniefnamálsins og milligöngu um vændi. Frá þeim tíma hafi rannsókn lögreglu einnig beinst að ætluðum stórfelldum fíkniefnabrotum kærðu. Hafi fólk, sem talið er hafa komið hingað til lands á vegum kærðu, verið handtekið við komuna hingað með fíkniefni innvortis, samtals um það bil 400-500 g af kókaíni, og hafi það fengið dóma fyrir innflutning efnanna. Lögregla hafi upplýsingar um tengsl kærðu við þetta fólk og ferðir þess hingað til lands. Flutningur efnanna teljist tengjast umfangsmeiri fíkniefnabrotum sem séu til rannsóknar.

Kærða hafi nú sætt gæsluvarðhaldi frá 30. apríl sl. en rannsókn lögreglu miði að því að finna ætlaða samverkamenn hennar, yfirheyra þá og vitni og rannsaka hvernig staðið var að skipulagningu og fjármögnun ætlaðra brota.

Lögregla kveður rökstuddan grun um að kærða hefi milligöngu um vændi og aðild að stórfelldu fíkniefnabroti. Kærða sé íslenskur ríkisborgari en hún hafi takmörkuð tengsl við landið auk þess sem fjölskylda hennar búi erlendis og kærasti hennar sæti nú gæsluvarðhaldi í Amsterdam. Nauðsynlegt sé að tryggja nærveru kærðu hér á landi til þess að hún geti ekki komið sér undan frekari rannsókn málsins, mögulegri saksókn og málsmeðferð fyrir dómi. Sé því nauðsynlegt að kærða sæti farbanni meðan á meðferð þessa máls standi.

Lögregla kveðst rannsaka ætluð brot kærðu gegn 173. gr. a og 206. gr. almennra hegningarlaga nr. 19/1940 en fyrrgreinda brotið geti varðað allt að 12 ára fangelsi. Með vísan til framangreinds, framlagðra gagna og b-liðar 95. gr., sbr. 1. mgr. 100. gr. sakamálalaga nr. 88/2008 sé þess beiðst að ofangreind krafa nái fram að ganga.

Með vísan til gagna málsins og þess sem að framan er rakið, þykir fram kominn rökstuddur grunur um að kærða hafi framið þau brot sem henni eru gefin að sök og eru þau stórfelld og rannsókn þeirra umfangsmikil. Fyrir liggur að kærða er íslenskur ríkisborgari en hins vegar á hún ekki fjölskyldu hér á landi. Ekki verður séð að hún hafi þau tengsl við landið, sem séu líkleg til að valda því að hún fari ekki af landi brott eða komi sér ekki undan saksókn. Ljóst er að rannsókn máls þessa er ekki lokið og er fallist á það með lögreglustjóranum að brottför kærðu af landi brott gæti torveldað frekari rannsókn og að nauðsynlegt sé að tryggja nærveru kærðu á meðan mál hennar er til meðferðar hér á landi.

Þegar rannsóknargögn málsins eru virt og litið til þess sem að framan er rakið teljast vera skilyrði til að neyta heimildar í 100. gr., sbr. b-lið 95. gr. sakamálalaga nr. 88/2008 til að banna kærðu brottför af landinu. Er ekkert komið fram í málinu sem  allt til kl. 24:00 miðvikudaginn 10. júní 2009.

Arnfríður Einarsdóttir héraðsdómari kvað upp úrskurðinn.

Úrskurðarorð

Kærðu, X, er bönnuð för frá Íslandi, allt til kl. 24:00 miðvikudaginn 10. júní 2009.