Þriðjudaginn 11. febrúar 2014.
Nr. 97/2014.	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Sigmundur Hannesson hrl.)

Kærumál. Farbann.

Staðfestur var úrskurður héraðsdóms þar sem X var gert að sæta farbanni á grundvelli b. liðar 1. mgr. 95. gr. laga nr. 88/2008 um meðferð sakamála, sbr. 1. mgr. 100. gr. sömu laga.

Dómur Hæstaréttar

Mál þetta dæma hæstaréttardómararnir Þorgeir Örlygsson, Helgi I. Jónsson og Benedikt Bogason.

Varnaraðili skaut málinu til Hæstaréttar með kæru 7. febrúar 2014 sem barst réttinum ásamt kærumálsgögnum 10. sama mánaðar. Kærður er úrskurður Héraðsdóms Reykjavíkur 7. febrúar 2014 þar sem varnaraðila var gert að sæta farbanni allt til föstudagsins 7. mars 2014 klukkan 16. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi en til vara að farbanni verði markaður skemmri tími.

Sóknaraðili krefst staðfestingar hins kærða úrskurðar.

Eins og fram kemur í forsendum hins kærða úrskurðar er fram kominn rökstuddur grunur um að varnaraðili hafi gerst sekur um háttsemi sem varðað getur við 211. gr., sbr. 20. gr. eða 2. mgr. 218. gr. almennra hegningarlaga nr. 19/1940. Er fallist á með héraðsdómi að hætta sé á að varnaraðili, sem er breskur ríkisborgari og búsettur í Bretlandi, kunni að koma sér undan málsókn vegna brotsins. Samkvæmt því og með vísan til 1. mgr. 100. gr. laga nr. 88/2008 verður hinn kærði úrskurður  staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Reykjavíkur 7. febrúar 2014.

Lögreglustjórinn á höfuðborgarsvæðinu gerir þá kröfu að X, f. [...] 1977, verði bönnuð för frá Íslandi allt til föstudagsins 7. mars 2014 kl. 16:00

Í greinargerð lögreglu kemur fram að lögreglan hafi nú til rannsóknar stórfellda líkamsárás eða e.a. tilraun til manndráps, þar sem kærða er gefið að sök að hafa aðfaranótt fimmtudagsins 6. febrúar 2014, veist að A, f. [...] 1984, á gistiheimilinu [...], að [...]  í Reykjavík, brugðið hníf að hálsi hennar, stappað á andliti hennar og reynt að kyrkja hana, allt með þeim afleiðingum að hún hlaut skurð á hálsi og áverka í andlit. Lögreglu hafi borist tilkynning um líkamsárás í gistiheimilinu.  Er lögregla hafi komið á vettvang hafi hún hitt þar fyrir brotaþola sem skýrt hafi frá því að kærði hafi ráðist á sig, sett hníf að hálsi hennar og tekið hana hálstaki.  Hún kvaðst hafa öskrað á hjálp og þá hafi fólk komið henni til aðstoðar.  Kvað hún kærða hafa í kjölfarið yfirgefið gistiheimilið.  Hún kvaðst hafa komið til landsins með kærða, sem væri fyrrverandi kærasti hennar, fyrir um þremur tímum síðan og hafi þau ætlað að dvelja á landinu til sunnudagsins 9. febrúar nk.  Kvaðst A vera búin að panta flug til Bretlands og færi hún með fyrsta flugi um morguninn. Í íbúðinni hafi mátt finna blóð í rúmfötum og eyrnalokk í rúminu.  Hafi tæknideild lögreglu verið kölluð til sem lagt hafi hald á rúmfatnað, eyrnalokkinn og tvo hnífa sem fundust í íbúðinni. Um kl. 16:30 í gær hafi kærði verið handtekinn grunaður um árásina.  Nú fyrr í dag hafi A lagt fram formlega kæru á hendur kærða sbr. tölvubréf  Interpol í Manchester, og megi vænta yfirheyrsluskýrslu hennar, auk ljósmynda síðar í dag.

Í skýrslu sem tekin var af kærða í dag kemur fram að hann muni ekki eftir atvikum máls sökum ölvunar.

Lögreglustjóri vísar til þess að kærði sé undir rökstuddum grun um aðild að stórfelldri líkamsárás eða tilraun til manndráps.  Kærði, sem er breskur ríkisborgari, hafi takmörkuð tengsl við land og þjóð og því hætta á að hann kunni að koma sér úr landi og þannig undan málsmeðferð lögreglu.          Til að tryggja nærveru kærða á meðan mál hans er til meðferðar hjá lögreglu og e.a. dómstólum, sé þess krafist að kærði verði úrskurð­aður í farbann með vísan til b. liðar 1. mgr. 95. gr. og 1. mgr. 100. gr. laga um meðferð sakamála nr. 88/2008. 

Niðurstaða

Að mati dómsins liggur rökstuddur grunur um brot kærða gegn 211. gr. sbr. 20. gr. eða 2. mgr. 218. gr. almennra hegningarlaga nr. 19/1990. Fallist er á það með lögreglu að hætta sé á að kærði kunni að koma sér undan málsókn vegna brotsins. Með hliðsjón af framangreindu verður kærði úrskurðaður í farbann með heimild í tilgreindu ákvæði til föstudagsins 7. mars 2014 kl. 16:00.

Kolbrún Sævarsdóttir héraðsdómari kvað upp þennan úrskurð.

ÚRSKURÐARORÐ:

Kærða, X, f. [...] 1977, er bönnuð för frá Íslandi allt til föstudagsins 7. mars 2014 kl. 16:00.