Fimmtudaginn 29. júní 2006.
Nr. 342/2006.	Ríkislögreglustjóri (Jón H. Snorrason saksóknari) gegn X (Bjarni Hauksson hdl.)

 

Kærumál. Gæsluvarðhald. A. liður 1. mgr. 103. gr. laga nr. 19/1991.

Úrskurður héraðsdóms um að X skyldi sæta gæsluvarðhaldi á grundvelli a. liðar 1. mgr. 103. gr. laga nr. 19/1991 um meðferð opinberra mála var staðfestur.

 

Dómur Hæstaréttar.

Mál þetta dæma hæstaréttardómararnir Ingibjörg Benediktsdóttir, Hjördís Hákonardóttir og Jón Steinar Gunnlaugsson.

Varnaraðili skaut málinu til Hæstaréttar með kæru 27. júní 2006, sem barst réttinum ásamt kærumálsgögnum 28. sama mánaðar. Kærður er úrskurður Héraðsdóms Reykjavíkur 27. júní 2006, þar sem varnaraðila var gert að sæta gæsluvarðhaldi allt til föstudagsins 7. júlí 2006 kl. 16. Kæruheimild er í 1. mgr. 142. gr. laga nr. 19/1991 um meðferð opinberra mála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst þess að hinn kærði úrskurður verði staðfestur.

Samkvæmt gögnum málsins hafa á árunum 2002 til 2006 verið greiddar meira en 10 milljónir króna úr sjóðum Tryggingastofnunar ríkisins inn á bankareikning í eigu varnaraðila. Hún hefur neitað að henni hafi verið ljóst að féð hafi verið illa fengið. Einn þeirra, sem hafa verið yfirheyrðir vegna málsins, hefur borið að varnaraðili hafi beðið sig um að taka við greiðslum frá Tryggingastofnun ríkisins inn á reikning sinn og millifæra þær síðan yfir á reikning í eigu sambúðarmanns varnaraðila. Með hliðsjón af þessu og að öðru leyti með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

 

Úrskurður Héraðsdóms Reykjavíkur 27. júní 2006.

Ríkislögreglustjóri hefur krafist þess að X, [...], verði gert að sæta gæsluvarðhaldi í 10 daga eða til föstudagsins 7. júlí n.k. klukkan 16.00. 

Kærða mótmælir kröfunni, en krefst þess til vara að varðhaldinu verði markaður skemmri tími. 

A var í gærdag úrskurðuð til að sæta gæsluvarðhaldi vegna gruns um fjárdrátt eða fjársvik gagnvart Tryggingastofnun ríkisins.  Er hún undir grun um að hafa náð með óréttmætum hætti allt að 75 milljónum króna frá stofnuninni frá árinu 2002. 

Kærða X hefur fyrir dómi játað að fé hafi verið lagt inn á reikning hennar, sumt af því hafi hún millifært til A, en sumt hafi hún látið son hennar, B fá.  Hún vill ekki gangast við því að hafa vitað að hér væri illa fengið fé á ferð. 

Kærða er undir rökstuddum grun um aðild að fjársvikum eða fjárdrætti, hugsanlega hylmingu.  Brot hafa verið framin á löngum tíma og eru umtalsverðir fjármunir taldir hafa verið sviknir af stofnuninni.  Nauðsynlegt er að hindra að kærða geti haft áhrif á aðra sem málinu kunna að tengjast, en rannsókn er á frumstigi.  Verður henni gert, samkvæmt a-lið 1. mgr. 103. gr. laga nr. 19/1991, að sæta gæsluvarhaldi.  Er varðhaldinu markaður hæfilegur tími í samræmi við kröfugerð lögreglu. 

Jón Finnbjörnsson héraðsdómari kvað upp úrskurðinn.

Úrskurðarorð:

Kærða, X, [...], sæti gæsluvarðhaldi allt til föstudagsins 7. júlí nk. kl. 16.00.