Mánudaginn 28. apríl 2014.
Nr. 284/2014.	Ákæruvaldið (Kolbrún Benediktsdóttir saksóknari) gegn X (Sveinn Andri Sveinsson hrl.)

 

Kærumál. Gæsluvarðhald. 2. mgr. 95. gr. laga nr. 88/2008.

Staðfestur var úrskurður héraðsdóms þar sem X var gert að sæta gæsluvarðhaldi samkvæmt 2. mgr.  95. gr. laga nr. 88/2008 um meðferð sakamála.

 

Dómur Hæstaréttar

Mál þetta dæma hæstaréttardómararnir Viðar Már Matthíasson og Ólafur Börkur Þorvaldsson og Ingveldur Einarsdóttir settur hæstaréttardómari.

Varnaraðili skaut málinu til Hæstaréttar með kæru 23. apríl 2014 sem barst réttinum ásamt kærumálsgögnum 25. sama mánaðar. Kærður er úrskurður Héraðsdóms Reykjavíkur 23. apríl 2014, þar sem varnaraðila var gert að sæta áframhaldandi gæsluvarðhaldi allt til miðvikudagsins 18. júní 2014 klukkan 16.  Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess að hinn kærði úrskurður verði felldur úr gildi

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjavíkur 23. apríl 2014.

Ríkissaksóknari hefur krafist þess, með vísan til 2. mgr. 95. gr. laga nr. 88/2008 um meðferð sakamála, að X, kt. [...], verði gert að sæta áfram gæsluvarðhaldi meðan mál hans er til meðferðar fyrir Hæstarétti Íslands, þó eigi lengur en til miðvikudagsins 18. júní 2014 kl. 16:00.

Í greinargerð ríkissaksóknara kemur fram að með ákæru ríkissaksóknara dagsettri 23. júlí 2013 sé ákærða gefið að sök manndráp með því að hafa aðfaranótt þriðjudagsins 7. maí 2013, veist að A, á heimili hans í íbúð [...] að [...] á [...], og banað honum með því að stinga hann ítrekað með hnífí í brjóst, háls, andlit, höfuð, hægri handlegg og vinstra læri og hafi tvær hnífstungur gengið í hægra hjartahólf, allt með þeim afleiðingum að A hlaut bana af.  Er brot hans heimfært undir 211. gr. almennra hegningarlaga nr. 19/1940.

                Með dómi Héraðsdóms Austurlands í máli S-44/2013, uppkveðnum 23. október sl. hafi dómfelldi verið sakfelldur fyrir brotið og dæmdur í 16 ára fangelsi. Með yfirlýsingu dags. 8. þ.m. hafi hann lýst því yfir að hann hafi áfrýjað dóminum til Hæstaréttar. Áfrýjunarstefna hafi verið gefin út 14. s.m. og hafi málsgögn verið send Hæstarétti.  Verjandi ákærða hafi óskað eftir dómkvaðningu matsmanns í málinu og hafi fyrri beiðni hans þar um verið hafnað af héraðsdómi og kæru í kjölfarið vísað frá Hæstarétti. Ný matsbeiðni hafi verið samþykkt af héraðsdómi og síðar staðfest af Hæstarétti. Tveir dómkvaddir matsmenn hafi verið skipaðir af héraðsdómi Reykjavíkur 11. þ.m. og beri þeim að skila af sér matinu fyrir 1. júní n.k. Málið verði flutt í Hæstarétti þann 10. júní n.k.  Upphaflega hafi staðið til að málið yrði flutt í Hæstarétti 2. maí n.k. en vegna ágreinings um matið og matsmenn hafi því verið frestað um rúman mánuð. Engu að síður telji ákæruvaldið að sá dráttur geti á engan hátt orðið til þess að ákærði verði látinn laus úr gæsluvarðhaldi enda hann sjálfur sem hafi óskað eftir umbeðnu mati.

                Ákærði hafi sætt gæsluvarðhaldi frá 7. maí sl. og hafi hann sætt gæsluvarðhaldi á grundvelli 2. mgr. 95. gr. laga nr. 88/2008 frá 17. s.m.

                Með vísan til 2. mgr. 95. gr., sbr. 3. mgr. 97. gr. laga nr. 88/2008, með hliðsjón af alvarleika sakarefnis og á grundvelli dóms þyki nauðsynlegt vegna almannahagsmuna að dómfelldi sæti gæsluvarðhaldi á meðan mál hans sé til meðferðar fyrir Hæstarétti Íslands og endanlegur dómur fellur í máli hans.

Með dómi Héraðsdóms Austurlands uppkveðnum 23. október sl. var dómfelldi dæmdur í  16 ára fangelsi en frá refsivist hans skal draga gæsluvarðhald frá 7. maí sl. Með tilkynningu, dagsettri 8. nóvember sl., lýsti dómfelldi því yfir að hann áfrýjaði dóminum til Hæstaréttar. Áfrýjunarstefna var gefin út og hafa málsgögn verið send Hæstarétti Íslands.   Fyrirhugaður var flutningur málsins þar 2. maí nk. en því hefur verið frestað til 10. júní nk. þar eð dómkvaddir voru matsmenn 11. apríl sl. til að meta tiltekin atriði rannsóknar málsins. 

Samkvæmt 3. mgr. 97. gr. laga nr. 88/2008 lýkur gæsluvarðhaldi þegar héraðsdómur hefur verið kveðinn upp í málinu. Eftir kröfu ákæranda getur dómari þó úrskurðað að gæsluvarðhald skuli haldast meðan á áfrýjunarfresti samkvæmt 199. gr. laganna stendur, svo og meðan mál er til meðferðar fyrir Hæstarétti uns dómur er kveðinn upp. Dómfelldi hefur sætt gæsluvarðhaldi á grundvelli 2. mgr. 95. gr. laga 88/2008 á grundvelli framandgreinds dóms. Með vísun til framangreinds og með heimild í nefndri 3. mgr. 97. gr. laga nr. 88/2008 verður krafa ákæruvaldsins tekin til greina eins og í úrskurðarorði greinir.

Arngrímur Ísberg héraðsdómari kveður upp úrskurð þennan.

Ú R S K U R Ð A R O R Ð

Dómfelldi, X, kt. [...], skal áfram sæta gæsluvarðhaldi meðan mál hans er til meðferðar fyrir Hæstarétti Íslands, þó eigi lengur en til miðvikudagsins 18. júní 2014 kl. 16:00.