Miðvikudaginn 18. apríl 2012.
Nr. 254/2012:	Lögreglustjórinn á höfuðborgarsvæðinu (Jón H.B Snorrason saksóknari) gegn X (Björgvin Halldór Björnsson hdl.)

 

Kærumál. Gæsluvarðhald. A. liður 1. mgr. 95. gr. laga nr. 88/2008.

Úrskurður héraðsdóms um að X skyldi sæta gæsluvarðhaldi, á grundvelli a. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Árni Kolbeinsson og Þorgeir Örlygsson og Helgi I. Jónsson settur hæstaréttardómari.

Varnaraðili skaut málinu til Hæstaréttar með kæru 16. apríl 2012 sem barst réttinum ásamt kærumálsgögnum degi síðar. Kærður er úrskurður Héraðsdóms Reykjavíkur 16. apríl 2012, þar sem varnaraðila var gert að sæta gæsluvarðhaldi allt til mánudagsins 23. apríl 2012 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að honum verði gert að sæta farbanni. Að því frágengnu krefst hann þess að gæsluvarðhaldi verði markaður skemmri tími og einangrun aflétt.

Sóknaraðili krefst staðfestingar hins kærða úrskurðar.

Með vísan til forsendan hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

                                                                 

Úrskurður Héraðsdóms Reykjavíkur 16. apríl 2012.

Í greinargerð Lögreglustjórans á höfuðborgarsvæðinu kemur fram að í gærmorgun hafi þrír Pólverjar verið handteknir grunaðir um stórfelldan innflutning á fíkniefnum.  Hafi þeir allir komið hingað til lands í gær með sama flugi frá [...] í Póllandi.  Í farangri þeirra allra hafi fundist samskonar ílát, þ.e. sjampóbrúsar, bodylotionbrúsi og raksápa, sem haft hafi að geyma amfetamín, samtals um 10 kíló með umbúðum. Hafi einn hinna handteknu verið stöðvaður við tollskoðun á Keflavíkurflugvelli, en hinir tveir hafi verið handteknir í leigubifreið á [...] í [...].

Framburðir þeirra séu á þann veg að þeir hafi fengið afhentar töskur í [...] og hafi þeir átt að afhenda þær óþekktum manni við [...] í [...].  Kváðust þeir hafa haft vitneskju um að fíkniefni væru í töskunum, en ekki vitað magn þeirra eða tegund.

Í fórum annars mannsins sem handtekinn hafi verið í leigubifreiðinni hafi fundist farsími sem hafi haft að geyma SMS-skeyti með heimilisfangi kærða, X, “[...]”.  Kveðst hann hafa sýnt leigubifreiðastjóranum skeytið og óskað eftir að láta aka sér og samferðamanni sínum þangað skömmu áður en lögregla hafi stöðvað leigubifreiðina, en áður hafi þeir óskað eftir að verða ekið að [...] í [...].

Þá hafi lögregla í gær rætt við leigubílstjóra sem kvaðst hafa tekið Pólverja upp í bifreið sína við Keflavíkurflugvöll í gærmorgun.  Pólverjinn hafi óskað eftir því að sér yrði ekið að [...] í [...].  Eftir um fimm mínútna akstur hafi Pólverjinn fengið SMS-skeyti, hann hafi sýnt bílstjóranum skeytið, þar sem á stóð “[...]”, og óskað eftir að þangað yrði ekið.  Bílstjórinn kveðst hafa ekið manninum að [...] og þar séð hann fara inn í húsið.  Aðspurður kvað hann manninn hafa haft eina tösku meðferðis.

Í gær var kærði X handtekinn grunaður um aðild að innflutningi efnanna.  Eins og fram kemur í meðfylgjandi upplýsingaskýrslu lögreglu, dags. 10. apríl sl., hafi lögreglan haft til rannsóknar hóp Pólverja hér á landi sem taldir séu standa fyrir innflutningi fíkniefna hingað til lands, sé kærði X undir grun um að tengjast þessum hópi Pólverja.

Í skýrslutöku nú fyrr í dag hafi kærði X neitað allri aðild að málinu.

Rannsókn málsins sé á frumstigi, en málið sé talið tengjast vel skipulögðum og umfangmiklum innflutningi á fíkniefnum hingað til lands. Ljóst sé að málið sé umfangsmikið og taka þurfi frekari skýrslur af kærða, meðkærðu og ætluðum samsekum kærða hér á landi. Í ljósi þess að rannsókn málsins sé á viðkvæmu stigi sé afar brýnt að krafan verði tekin til greina, þannig að kærði fái ekki tækifæri til að  torvelda rannsókninni, s.s. með því að hafa áhrif á aðra samseka eða vitni. 

Með vísan til framangreinds, framlagðra gagna og a.-liðar 1. mgr. 95. gr. og b.- liðar 1. mgr. 99. gr. laga nr. 88/2008 um meðferð sakamálamála er þess krafist að krafan nái fram að ganga.

Fallist er á að fram sé kominn rökstuddur grunur um að kærði hafi í félagi við aðra framið brot gegn 173. gr. a almennra hegningarlaga nr. 19/1940, ásamt síðari breytingum, sem varðað getur fangelsisrefsingu og að augljósir rannsóknarhagsmunir séu í húfi, en rannsókn málsins er á frumstigi. Kærði er erlendur ríkisborgari með lítil tengsl við landið.  Samkvæmt framansögðu er því fullnægt skilyrðum a- liðar 1. mgr. 95. gr. laga nr. 88/2008, um meðferð sakamála.  Hins vegar þykir rétt að marka gæsluvarðhaldinu skemmri tíma, eða til 23. apríl nk. kl. 16.00.  Verður því orðið við kröfunni, eins og hún er fram sett og nánar greinir í úrskurðarorði. Í ljósi rannsóknarhagsmuna og brots þess sem kærði er grunaður um að hafa framið í félagi við aðra, er fallist á að kærði sæti takmörkunum á gæslunni, eins og krafist er, samkvæmt b-lið 1. mgr. 99. gr. laga nr. 88/2008. 

Hervör Þorvaldsdóttir héraðsdómari kveður upp úrskurð þennan.

Ú R S K U R Ð A R O R Ð :

Kærði, X, kt. [...], skal sæta gæsluvarðhaldi allt til mánudagsins 23. apríl  nk. kl. 16.  Kærði skal að sæta einangrun á meðan á gæsluvarðhaldinu stendur.