Föstudaginn 3. maí 2013.
Nr. 301/2013.	Lögreglustjórinn á höfuðborgarsvæðinu (Jón H. B. Snorrason saksóknari) gegn X (Brynjólfur Eyvindsson hdl.)

Kærumál. Gæsluvarðhald. B. liður 1. mgr. 95 gr. laga nr. 88/2008. Framsal sakamanna.

Staðfest var niðurstaða héraðsdóms um að X skyldi gert að sæta áframhaldandi gæsluvarðhaldi á grundvelli b. liðar 1. mgr. 95. gr. laga nr. 88/2008 um meðferð sakamála og 15. gr. laga nr. 13/1984 um framsal sakamanna og aðra aðstoð í sakamálum.

Dómur Hæstaréttar.

Mál þetta dæma hæstaréttardómararnir Eiríkur Tómasson og Greta Baldursdóttir og Ingveldur Einarsdóttir settur hæstaréttardómari.

Varnaraðili skaut málinu til Hæstaréttar með kæru 30. apríl 2013 sem barst réttinum ásamt kærumálsgögnum 2. maí sama ár. Kærður er úrskurður Héraðsdóms Reykjavíkur 30. apríl 2013 þar sem varnaraðila var gert að sæta áfram gæsluvarðhaldi á meðan framsalsmál hans er til meðferðar, þó eigi lengur en til þriðjudagsins 14. maí 2013 klukkan 16. Kæruheimild er í 24. gr. laga nr. 13/1984 um framsal sakamanna og aðra aðstoð í sakamálum. Varnaraðili krefst þess að hinn kærði úrskurður verði felldur úr gildi.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Reykjavíkur 30. apríl 2013.

Lögreglustjórinn á höfuðborgarsvæðinu hefur krafist þess að Héraðsdómur Reykjavíkur úrskurði að X, fæddum [...], verði gert að sæta áframhaldandi gæsluvarðhaldi á meðan að framsalsmál hans er til meðferðar hjá íslenskum stjórnvöldum, þó eigi lengur en til þriðjudagsins 14. maí 2013 kl. 16:00.

                Í greinargerð lögreglu kemur fram að lögreglan á höfuðborgarsvæðinu hafi fengið tilkynningu frá Lögreglustjóranum á Suðurnesjum um að för X og tveggja félaga hans hafi verið stöðvuð í tollinum. Við leit á mönnunum hafi komið í ljós segull sérstakrar gerðar en notkun slíkra segla sé þekkt hjá afbrotamönnum við að gera þjófavarnir, á lausamunum í verslunum, óvirkar. Mönnunum hafi verið hleypt inn í landið og hafi þeir sagst ætla að dvelja á nánar tilgreindu gistihúsi í Reykjavík. Við nánari skoðun hafi komið í ljós að X sé eftirlýstur af hálfu Interpol vegna tveggja alvarlegra afbrota á Kýpur.

Í fyrsta lagi sé X grunaður um innbrot og þjófnað, í félagi, í skartgripaverslunina ELENA KLEOVOULOU LTD í Nikósía sem framið hafi verið milli kl. 13:30 til 08:30 dagana 2. og 3. maí 2012. Í innbrotinu hafi verið teknir skartgripir að andvirði EUR 200.000 (ISK 32.000.000).

Í öðru lagi þá sé X grunaður um að hafa, í félagi við annan, þann 4. maí 2012 ráðist með ofbeldi að verslunarstjóra stórmarkaðarins ELOMAS í Latsía, úthverfi af borginni Nikósía, í þeim tilgangi að ræna hann. Í ráninu hafi verið komist yfir uppgjör verslunarinnar að fjárhæð EUR 17.205 (ISK 2.750.000). Fórnarlambið hafi verið illa leikið í kjölfar ofbeldisins og hafi þurft að leggjast inn á sjúkrahús til frekari meðferðar.

Interpol hafi krafist þess af viðkomandi lögregluyfirvöldum að X verði handtekinn þar sem að farið verði fram á framsal á hendur honum en hann sé grunaður um brot gegn eftirfarandi ákvæðum 154. kafla Kýpversku hegningarlaganna: A. 371. gr. (samblástur um þátttöku í glæpsamlegu athæfi), B. 282. og 283. gr. (rán), C. 291. og a-liður 294., 1. mgr. 255. og 262. gr. (Innbrot og þjófnaður), D. 231. gr. (valdið skaða). Samkvæmt íslenskum refsilögum virðist heimfærsla verknaðanna a.m.k. eiga undir 2. mgr. 244. gr. og 252. gr. almennra hegningarlaga nr. 19/1940.

Við meintum afbrotum liggi að hámarki lífstíðarfangelsi samkvæmt kýpverskum refsilögum. Þann 27. mars sl. hafi verið tekin skýrsla af X og kvaðst hann hafa verið á Kýpur í um þriggja vikna skeið í apríl og maí í fyrra. Hann hafi neitað afbrotunum en kvaðst hafa verið þar ásamt nánar tilgreindum manni sem gögn málsins beri með sér að sé einnig grunaður um verknaðina. Jafnframt kannist X við að hafa búið í Latsia. Spurður út í sakaferil sinn kveðst hann vera með hreina sakarskrá en sagðist þó hafa ,,flækst” inn í vændismál á Spáni og hafi þurft að sæta tveggja mánaða skilorðsbundinni fangelsisrefsingu af þeim sökum.

X hafi þann 27. mars sl. verið úrskurðaður í þriggja vikna gæsluvarðhald samkvæmt úrskurði Héraðsdóm Reykjavíkur nr. R-121/2013. Alþjóðadeild Ríkislögreglustjórans hafi tilkynnt Interpol og kýpverskum yfirvöldum um handtöku X. Í kjölfar þess að framsalsbeiðni hafi borist innanríkisráðneytinu hafi verið farið fram á þriggja vikna áframhaldandi gæsluvarðhald á hendur X sem fallist hafi verið á samkvæmt úrskurði Héraðsdóms Reykjavíkur nr. R-141/2013. Af hálfu lögmanns varnaraðila hafi úrskurðurinn verið kærður til Hæstaréttar, sbr. mál nr. 269/2013, sem hafi staðfest niðurstöðu héraðsdóms en markaði gæsluvarðhaldinu skemmri tíma eða til 1. maí n.k. Með ákvörðun innanríkisráðneytisins dags. 30. apríl hafi verið fallist á framsalsbeiðni Kýpverskra yfirvalda. Þann sama dag hafi ákvörðunin verið kynnt varnaraðila sem kveðst ætla að láta reyna á lögmæti hennar fyrir dómstólum.

X, sem sé rúmenskur ríkisborgari, hafi takmörkuð tengsl við land og þjóð og því hætta á að hann kunni að koma sér úr landi og þannig undan málsmeðferð lögregluyfirvalda. Til að tryggja nærveru X meðan framsalsmál hans sé til meðferðar hjá íslenskum stjórn­völdum og með hliðsjón af alvarleika sakargiftanna, er þess krafist, að hann verði úrskurð­aður í gæsluvarðhald með vísan til 15. gr. laga um framsal sakamanna og aðra aðstoð í sakamálum nr. 13/1984, sbr. b-liðar 1. mgr. 95 gr. laga um meðferð sakamála nr. 88/2008. um meðferð sakamála nr. 88/2008. 

         Niðurstaða:

         Samkvæmt gögnum málsins hafa yfirvöld á Kýpur, með erindi mótteknu af innanríkisráðuneytinu 17. apríl sl. krafist framsals varnaraðila, sem er rúmenskur ríkisborgari. Er hann grunaður um aðild að annars vegar innbroti í skartgripaverslun, þar sem verðmæti þýfisins var um 200.000 evrur, og hins vegar að ráni þar sem brotaþoli var beittur harkalegu ofbeldi. Með ákvörðun innanríkisráðneytisins, dags. 30. apríl sl., hafi verið fallist á framsalsbeiðni Kýpverskra yfirvalda. Þann sama dag hafi ákvörðunin verið kynnt varnaraðila sem ætlar að láta reyna á lögmæti hennar fyrir dómstólum.

Varnaraðili, sem hefur afar takmörkuð tengsl við Ísland, var handtekinn fljótlega eftir komuna til landsins ásamt tveimur félögum sínum og sögðust þeir ætla að dvelja á gistihúsi í Reykjavík. Í fórum mannanna fannst segull sem hægt er að nota til að gera þjófavarnir óvirkar. Fallist verður á með lögreglustjóra að skilyrðum b-liðar 1. mgr. 95. gr. laga nr. 88/2008 fyrir gæsluvarðhaldi yfir varnaraðila sé fullnægt, enda má ætla að hann muni reyna að komast úr landi meðan mál hans er til meðferðar hér á landi. Þau brot sem varnaraðili er grunaður um eru alvarleg, en samkvæmt fyrirliggjandi gögnum er hámarksrefsing við þeim samkvæmt kýpverskum hegningarlögum lífstíðarfangelsi. Þykja ekki efni til að varnaraðili sæti farbanni í stað gæsluvarðhalds. Með vísan til framangreinds verður krafa lögreglustjórans á höfuðborgarsvæðinu tekin til greina og ákveðið, með heimild í 15. gr. laga nr. 13/1984 um framsal sakamanna og aðra aðstoð í sakamálum og b-lið 1. mgr. 95. gr. laga um meðferð sakamála, að varnaraðili sæti áfram gæsluvarðhaldi, eins og nánar greinir í úrskurðarorði.

         Þorgerður Erlendsdóttir héraðsdómari kveður upp þennan úrskurð.

Ú R S K U R Ð A R O R Ð

Varnaraðili, X, skal sæta áframhaldandi gæsluvarðhaldi á meðan framsalsmál hans er til meðferðar hjá íslenskum stjórnvöldum, þó eigi lengur en til þriðjudagsins 14. maí 2013, kl. 16:00.