Föstudaginn 31. maí 2002.
Nr. 253/2002.	Sýslumaðurinn á Keflavíkurflugvelli (Sævar Lýðsson fulltrúi) gegn X (Ásbjörn Jónsson hdl.)

 

Kærumál. Farbann.

Hæstiréttur staðfesti úrskurð héraðsdóms um að X skyldi sæta farbanni á grundvelli 110. gr. laga nr. 19/1991 um meðferð opinberra mála.

 

Dómur Hæstaréttar.

Mál þetta dæma hæstaréttardómararnir Gunnlaugur Claessen, Árni Kolbeinsson og Ingibjörg Benediktsdóttir.

Varnaraðili skaut málinu til Hæstaréttar með kæru 29. maí 2002, sem barst réttinum ásamt kærumálsgögnum degi síðar. Kærður er úrskurður Héraðsdóms Reykjaness 28. maí 2002, þar sem varnaraðila var gert að sæta farbanni allt til föstudagsins 28. júní nk. kl. 16. Kæruheimild er í 1. mgr. 142. gr. laga nr. 19/1991 um meðferð opinberra mála. Varnaraðili krefst þess að hinn kærði úrskurður verði felldur úr gildi, en til vara að farbanninu verði markaður skemmri tími.

Sóknaraðili krefst þess að úrskurður héraðsdómara verði staðfestur.

Í greinargerð sóknaraðila til Hæstaréttar kemur fram að ákæra var gefin út á hendur varnaraðila 29. þessa mánaðar og verður málið þingfest í dag í Héraðsdómi Reykjaness. Að þessu virtu og að öðru leyti með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

 

Úrskurður Héraðsdóms Reykjaness 28. maí 2002.

Sýslumaðurinn á Keflavíkurflugvelli krafðist þess fyrir dómi í dag að kærða, X, albönskum ríkisborgara, [...] verði með úrskurði gert að sæta áframhaldandi farbanni til kl. 16:00 föstudaginn 28. júní 2002.

Kærði mótmælir fram kominni kröfu. Af hans hálfu er þess aðallega krafist að farbannskröfunni verði hafnað, en til vara að farbanninu verði markaður mun skemmri tími en krafist er.

Kröfu sína styður sýslumaður við 5. tl. 2. mgr. og 4. mgr. 17. gr. laga um eftirlit með útlendingum nr. 45/1965, sbr. lög nr. 25/2000, 8. gr.

Málavextir eru þeir að kærði kom til landsins með flugi frá Amsterdam miðvikudaginn 8. maí 2002. Við tollleit hjá honum fundust tvö fölsuð slóvensk vegabréf, annað útgefið í Ljublana 27. maí 1993 á [...]og hitt útgefið í Ljubljana þann sama dag á [...].  Í vegabréfum beggja eru myndir og nöfn fjögurra barna. Við rannsókn lögreglu hefur komið í ljós að vegabréfin eru fölsuð á þann hátt að skipt hefur verið um myndir á þeim sem vegabréfin voru gefin út á og nöfnum tveggja barna bætt inn í vegabréfin.  Einnig fundust tvö fölsuð ökuskírteini útgefin á sömu aðila 23. nóvember í Ljubljana.  Kærði hafði meðferðis við komuna til landsins umtalsverða fjármuni eða 3.800 evrur, 330 bandaríkjadali og 5.000 albönsk lek.  Þá  fannst í farangri hans notaður og nýr kven- og barnafatnaður sem virðist hafa verið keyptur samkvæmt innkaupalista, sem einnig var í ferðatösku kærða. Með úrskurði Héraðsdóms Reykjaness 14. maí s.l. var kærði úrskurðaður í farbann til dagsins í dag kl. 16:00.

Sýslumaður kveður rannsókn málsins að mestu lokið. Kærði sé grunaður um í hagnaðarskyni að hjálpa útlendingum til að dvelja ólöglega hér á landi. Fólkið sem myndirnar séu af í vegabréfunum sé nú fundið hér á landi. Það hafi komið til landsins 30. apríl s.l. frá Amsterdam. Þar sé um að ræða [...], allt albanska ríkisborgara. Þau hafi ekki getað sýnt fram á að þau séu með löglega dvalarheimild hér á landi. [...] og [...] hafi játað að hafa átt von á fölsuðum vegabréfum og fatnaði til landsins. Þau hafi nú sótt um hæli hér á landi. Rannsóknin hafi leitt í ljós að undirbúningur og skipulag meints brots kærða sé þess eðlis að hér sé um skipulega brotastarfsemi að ræða. Nauðsynlegt sé að tryggja nærveru kærða hér á landi svo ljúka megi máli hans fyrir dómi.

Um lagarök vísar sýslumaður til b-liðar 103. gr. og 110. gr. laga um meðferð opinberra mála nr. 19/1991.

Kærði gaf skýrslu fyrir dómi þegar krafa kom fram um gæsluvarðhald og einnig þegar farbannskrafan var tekin fyrir 14. þessa mánaðar. Sagði kærði að hann væri kominn hingað sem ferðamaður í fríi og þekkti engan hér á landi. Kærði lýsti sig saklausan af þeirri háttsemi sem hann er grunaður um að hafa framið fyrir dóminum í dag. Frásögn kærða af því hvernig vegabréfin lentu í hans fórum þykir einkar ótrúverðug og komið hefur í ljós að vegabréfin hafa verið tilkynnt glötuð. Á dómþinginu í dag var upplýst, að fólk með albönsk vegabréf þurfi áritun í þau til þess að mega koma inn á Schengen svæðið. Fólk með slóvensk vegabréf þurfi ekki slíka áritun.

Kærði liggur undir rökstuddum grun um að hafa brotið gegn 5. tl. 2. mgr. og 4. mgr. laga um eftirlit með útlendingum nr. 45/1965, sbr. lög nr. 25/2000, en það getur varðað hann fangelsisrefsingu. Kærði er erlendur ríkisborgari, stundar ekki atvinnu á Íslandi og hefur engin tengsl við landið. Ber að fallast á það með sýslumanni að nauðsynlegt sé að tryggja nærveru kærða meðan máli hans er ólokið fyrir dómi, en sýslumaður upplýsti á dómþinginu í dag, að ákæra yrði gefin út á hendur kærða á morgun vegna þess sakarefnis sem hér er til umfjöllunar. Samkvæmt þessu verður kærða bönnuð för úr landi meðan máli hans er ólokið, en þó eigi lengur en til föstudagsins 28. júní 2002 kl. 16:00.

Finnbogi H. Alexandersson héraðsdómari kvað upp úrskurðinn.

ÚRSKURÐARORÐ:

Kærða, X, er bönnuð för úr landi meðan máli hans er ólokið en þó eigi lengur en til föstudagsins 28. júní nk. klukkan 16:00.