Fimmtudaginn 13. desember 2013.
Nr. 734/2012.	Lögreglustjórinn á höfuðborgarsvæðinu (Jón H.B. Snorrason saksóknari) gegn X (Hólmgeir Elías Flosason hdl.)

 

Kærumál. Gæsluvarðhald. C. liður 1. mgr. 95. gr. laga nr. 88/2008.

Úrskurður héraðsdóms um að X skyldi gert að sæta gæsluvarðhaldi, á grundvelli c. liðar 1. mgr. 95. gr. laga nr. 88/2008 um meðferð sakamála, var staðfestur.

 

Dómur Hæstaréttar.

Mál þetta dæma hæstaréttardómararnir Greta Baldursdóttir, Benedikt Bogason og Helgi I. Jónsson. 

Varnaraðili skaut málinu til Hæstaréttar með kæru 11. desember 2012 sem barst réttinum ásamt kærumálsgögnum 12. sama mánaðar. Kærður er úrskurður Héraðsdóms Reykjavíkur 11. desember 2012, þar sem varnaraðila var gert að sæta áfram gæsluvarðhaldi uns dómur gengur í máli hans, en þó eigi lengur en til þriðjudagsins 8. janúar 2013 klukkan 16. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðhaldi verði markaður skemmri tími.

Sóknaraðili krefst staðfestingar hins kærða úrskurðar.

Með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

 

Úrskurður Héraðsdóms Reykjavíkur 11. desember 2012.

Lögreglustjórinn á höfuðborgarsvæðinu hefur krafist þess að Héraðsdómur Reykjavíkur úrskurði að X, kt. [...] verði gert að sæta áframhaldandi gæsluvarðhaldi uns dómur fellur í máli hans en þó eigi lengur en til þriðjudagsins 8. janúar 2013, kl. 16.00, á grundvelli c.-liðar 1. mgr. 95. laga um meðferð sakamála nr. 88, 2008.

Í greinargerð lögreglustjórans á höfuðborgarsvæðinu kemur fram að með úrskurði Héraðsdóms Reykjavíkur frá 13. nóvember sl. hafi ákærða verið gert að sæta gæsluvarðhaldi til dagsins í dag. Ákærða hafi með úrskurði Héraðsdóms Reykjavíkur frá 16. október sl., sem staðfestur hafi verið með dómi Hæstaréttar Íslands, verið gert að sæta gæsluvarðhaldi til 13. nóvember, kl. 15.00 á grundvelli síbrota, sbr. c-liðar 1. mgr. 95. gr. sakamálalaga, en ákærða hafi með úrskurði Héraðsdóms frá 18. september verið gert að sæta gæsluvarðhaldi til 16. október á grundvelli síbrota, sbr. c.- lið 1. mgr. 95. gr. sakamálalalaga.

Gefnar hafi verið út tvær ákærur hendur ákærða, annarsvegar ákæra Ríkissaksóknara, dagsett 16. október 2012, vegna ráns og húsbrots hinn 5. júlí 2012,  þar sem ákærði ásamt tveimur meðákærðu, sé gefið að sök að hafa rænt aðila með því að sparka upp útidyrahurð á heimili manns og neytt hann með ofbeldi og hótunum til að taka pening úr banka og hins vegar ákæra Lögreglustjórans á höfuðborgarsvæðinu, dagsett 8. nóvember sl., þar sem ákærði sé ákærður fyrir fjölda auðgunarbrota í félagi við aðra, þjófnað, hylmingu, eignaspjöll, nytjastuld, brot á lögreglulögum og fíkniefnalagabrot. Um sé að ræða innbrot, meðal annars stórfelldan þjófnað úr Jarðböðunum í Mývatnssveit 6. ágúst sl. húsbrot og rán í Hamraborg 5. júlí sl., og stórfelld eignaspjöll með því að hafa lagt eld að bifreið 6. september sl. við Hvaleyrarbraut í Hafnarfirði, auk annarra auðgunarbrota. Mál ákærða ásamt meðákærðu hafi verið þingfest við Héraðsdóm Reykjavíkur 9. nóvember sl., og hafi málið verið tekið fyrir hinn 12. nóvember sl., þar sem ákærði hafi lýst afstöðu sinni til ákæruskjalanna og aðrir meðákærðu einnig. Ákærði hafi neitað sök vegna brota, sem lýst sé í ákæruskjali Ríkissaksóknara frá 16. október sl. og hluta af ákæruliðum í ákæruskjali lögreglustjóra frá 8. nóv. sl. Aðalmeðferð hafi verið áætluð 7. janúar nk.  en málið hafi verið endurúthlutað í dómnum og einnig muni einn af ákærðu skila greinargerð.

Áærði sé nú undir sterkum grun vegna brota á 244., 254., 252., 231. gr. 2. mgr. 257. gr., almennra hegningarlaga nr. 19, 1940,  2., sbr. 5. og 6. laga  um ávana- og fíkniefni nr. 65, 1974, lögreglulög einkum 21., sbr. 36. gr., og 6. gr.  laga um lögreglusamþykktir nr. 36, 1988. Brotaferill ákærða hafi verið samfelldur frá maílokum og fram til 17. september sl., er ákærði hafi verið handtekinn. 

Með vísan til brotaferils ákærða á undanförnum vikum, sé það mat lögreglustjóra að yfirgnæfandi líkur séu á því að ákærði muni halda áfram brotastarfsemi fari hann frjáls ferða sinna og það sé brýnt fyrir lögreglu að geta lokið þessum málum á ákærða fyrir dómi. Það sé mat lögreglu að sakborningur muni ekki fá skilorðsbundinn dóm, nema þá að hluta,  vegna fjölda málanna og alvarleika brotanna. Ákæruvaldið muni nú hraða málum hans eins og kostur sé fyrir Héraðsdómi Reykjavíkur.

Ákærði hafi hinn 10. júlí sl.hlotið 3. mánaða fangelsisdóm skilorðsbundinn  fyrir þjófnað, gripdeild og  nytjastuld, ásamt fleiri aðilum, en brotaferill ákærða hafi verið samfelldur frá því að dómur féll á hendur honum hinn 10. júlí sl. Nú sé ákærði grunaður um ýmis auðgunarbrot, rán, húsbrot, þjófnað, hylmingu, stórfelld eignaspjöll og fleira og sé það mat lögreglu að nauðsynlegt sé að stöðva frekari afbrot og reyna ljúka málum á ákærða.

Ákærði sé nú undir sterkum grun um nokkur alvarleg hegningarlagabrot, rán, húsbrot, stórfelld eignaspjöll, stórfelldan þjófnað, hylmingu, fíkniefnalagbrot, lögreglulagabrot og sé það mat lögreglustjóra að yfirgnæfandi líkur séu á því að ákærði muni halda áfram brotastarfsemi fari hann frjáls ferða sinna og það sé brýnt fyrir lögreglu að ákærði sæti gæsluvarðhaldi uns málum hans er lokið fyrir héraðsdómi og mun ákæruvaldið hraða málum hans sem kostur sé. 

Ákærði sé nú undir sterkum grun um vegna brota á 252. gr.,  231., 244., 254. gr.,  2. mgr. 257. gr. almennra hegningarlaga, fíkniefnalögum og lögreglulögum. Brotaferill ákærða hafi verið samfelldur frá maílokum og fram í september sl., er ákærði hafi verið handtekinn. Við yfirheyrslu hafi ákærði sagst vera án atvinnu og virðist því vera að ákærði framfleyti sér með afbrotum, en ákærði sé með tengsl við glæpasamtökin A samkvæmt gögnum lögreglu.

Með vísan til framangreinds, framlagðra gagna og  c.-liðar 1. mgr. 95. gr. laga 88, 2008 um meðferð sakamála sé þess krafist að krafan nái fram að ganga eins og hún er sett fram.

Ákærði hefur setið í gæsluvarðhaldi frá 18. september sl., á grundvelli c-liðar 1. mgr. 95. gr. laga nr. 88/2008, um meðferð sakamála.  Samkvæmt gögnum málsins er ákærði undir rökstuddum grun um að hafa gerst sekur um fjölmörg hegningarlagabrot, svo sem rán, húsbrot, auðgunarbrot, þjófnað, hylmingu og  stórfelld eignaspjöll, brot gegn lögreglulögum og lögum um ávana- og fíkniefni.  Samkvæmt sakavottorði ákærða hefur hann frá því í desember 2011 tvisvar hlotið dóm, þar sem refsingu hefur verið frestað skilorðsbundið, m.a. vegna hegningarlagabrota.  Hinn 10. júlí sl. var ákærði dæmdur í þriggja mánaða skilorðsbundið fangelsi og benda framlögð gögn til þess að hann hafi rofið það skilorð og verið í samfelldri brotastarfsemi fram til þess að honum var gert að sæta gæsluvarðhaldi, eins og að framan greinir.  Tvær ákærur hafa nú verið gefnar út á hendur ákærða vegna fyrrgreindra brota.   Málin hafa verið þingfest á hendur ákærða, og er ætlunin að aðalmeðferð fari fram í byrjun janúar.  Með vísan til greinargerðar lögreglu og rannsóknargagna málsins þykir kominn fram rökstuddur grunur um að ákærði hafi gerst sekur um háttsemi sem fangelsisrefsing liggur við, að ætla megi að ákærði muni halda áfram brotum, fari hann frjáls ferða sinna, auk þess sem rökstuddur grunur er um að hann hafi rofið skilorð dómsins frá 10. júlí sl.  Því er fallist á með lögreglustjóra að skilyrði  c.-liðar 1. mgr. 95. gr. laga 88, 2008 séu uppfyllt. Er krafa um gæsluvarðahald því tekin til greina eins og nánar greinir í úrskurðarorði, en ekki þykja efni til að marka varðhaldinu skemmri tíma en krafist er.

Hervör Þorvaldsdóttir héraðsdómari kveður upp þennan úrskurð.

Ú R S K U R Ð A R O R Ð:

Ákærði X, kt. [...] skal sæta áframhaldandi gæsluvarðhaldi uns dómur fellur í máli hans en þó eigi lengur en til þriðjudagsins 8. janúar 2013, kl. 16.00.