Miðvikudaginn 18. apríl 2012.
Nr. 243/2012.	Ákæruvaldið (Hulda Elsa Björgvinsdóttir saksóknari) gegn X (Guðmundur St. Ragnarsson hdl.) Y (Oddgeir Einarsson hdl.) Z (Teitur Björn Einarsson hdl.) Þ og (Björgvin Halldór Björnsson hdl.) Æ (Arnar Þór Stefánsson hrl.)

 

Kærumál. Vitni. Þinghald. Kæruheimild.

Staðfestur var úrskurður héraðsdóms um að sakborningunum X, Y, Z, Þ og Æ skyldi gert að víkja úr þinghaldi á meðan brotaþoli gæfi skýrslu í málinu.

 

Dómur Hæstaréttar.

Mál þetta dæma hæstaréttardómararnir Árni Kolbeinsson, Greta Baldursdóttir og Jón Steinar Gunnlaugsson.

Varnaraðilinn Æ skaut málinu til Hæstaréttar með kæru 11. apríl 2012, varnaraðilinn Þ með kæru 12. sama mánaðar og varnaraðilarnir Z, Y og X með kærum 13. sama mánaðar. Kærður er úrskurður Héraðsdóms Reykjaness 11. apríl 2012 þar sem varnaraðilum, auk meðákærða Ö, var gert að víkja úr þinghaldi meðan brotaþoli gefur skýrslu í máli ákæruvaldsins á hendur þeim. Kæruheimild er í n. lið 1. mgr. 192. gr. laga nr. 88/2008 um meðferð sakamála. Varnaraðilar krefjast þess að hinn kærði úrskurður verði felldur úr gildi. Varnaraðilinn X gerir jafnframt þá kröfu með vísan til p. liðar 192. gr. laga nr. 88/2008 að „úrskurður eða ákvörðun ... um að heimila framlagningu skýrslu Europol á ensku verði felldur úr gildi og framlagningu gagnsins, án þýðingar, verði synjað.“

Sóknaraðili krefst staðfestingar hins kærða úrskurðar.

Í hinum kærða úrskurði er einungis tekin afstaða til þess hvort varnaraðilar skuli víkja úr þinghaldi meðan brotaþoli gefur skýrslu í málinu. Ekki er í úrskurðinum tekin afstaða til mótmæla við framlagningu skýrslu Europol á ensku heldur tók héraðsdómari ákvörðun með bókun í þingbók að ekki væri þörf á að leggja skýrsluna fram í íslenskri þýðingu. Ekki er í lögum að finna heimild til að kæra þá ákvörðun til Hæstaréttar. Þegar af þeirri ástæðu verður kröfu varnaraðila X, sem lýtur að framlagningu skýrslunnar, vísað frá Hæstarétti.

Með vísan til forsendna hins kærða úrskurðar verður hann staðfestur

Dómsorð:

Hinn kærði úrskurður er staðfestur.

Kröfu varnaraðila, X, um að felld verði úr gildi ákvörðun um að heimila framlagningu skýrslu Europol á ensku, er vísað frá Hæstarétti.

                                                                           

 

Úrskurður Héraðsdóms Reykjaness 11. apríl 2012.

Við fyrirtöku málsins í dag krafðist réttargæslumaður brotaþola, Steinbergur Finnbogason hdl., þess að ákærðu verði gert að víkja úr þinghaldi á meðan brotaþoli gefur skýrslu við aðalmeðferð málsins með vísan til 1. mgr. 123. gr. laga nr. 88/2008 um meðferð sakamála.

Sækjandi lýsti því yfir að ákæruvaldið tæki undir framangreinda kröfu réttargæslumanns enda verði séð til þess að ákærðu geti fylgst með skýrslutökunni um leið og hún fer fram, sbr. 3. mgr. 123. gr. laga nr. 88/2008 um meðferð sakamála. Jafnframt benti sækjandi á að fram kæmi í skýrslu [A] sálfræðings, að það myndi verða brotaþola þungbært að gefa skýrslu að ákærðu viðstöddum og að nærvera þeirra gæti haft áhrif á vitnisburð brotaþola.

Á meðal gagna málsins er vottorð [A] sálfræðings, en hún hefur haft brotaþola til meðferðar frá 23. desember sl. Í vottorðinu segir að atvik málsins hafi haft víðtæk og alvarleg áhrif á brotaþola og að hún þjáist af alvarlegri áfallastreituröskun og þunglyndi vegna árásarinnar. Þá segir í vottorðinu að þurfi brotaþoli að gefa skýrslu í nærveru ætlaðra gerenda séu raunverulegar líkur á því að hún muni upplifa ofsakvíðakast, sem skerða myndi getu hennar til að greina frá reynslu sinni.

Með vísan til framangreinds, annarra gagna málsins og rökstuðnings réttargæslumanns og sækjanda fyrir kröfunni, er fallist á að málið sé þess eðlis að telja verði að það geti orðið brotaþola sérstaklega þungbært að gefa skýrslu í málinu að sakborningum viðstöddum. Með vísan til 1. mgr. 123. gr. laga nr. 88/2008 um meðferð sakamála er því fallist á að nærvera ákærðu geti orðið vitninu sérstaklega til íþyngingar og haft áhrif á framburð þess. Krafan er því tekin til greina eins og hún er fram sett, enda verður séð til þess að ákærðu geti fylgst með skýrslutöku um leið og hún fer fram, svo og að ákærðu geti lagt spurningar fyrir brotaþola, sbr. 3. mgr. 123. gr. laga nr. 88/2008 um meðferð sakamála.

Ragnheiður Bragadóttir héraðsdómari kveður upp úrskurð þennan.

Úrskurðarorð

Ákærðu skulu víkja úr þinghaldi á meðan brotaþoli gefur skýrslu í málinu.