Þriðjudaginn 18. nóvember 2014.
Nr. 733/2014.	Lögreglustjórinn á höfuðborgarsvæðinu (Karl Ingi Vilbergsson aðstoðarsaksóknari) gegn X (Einar Ingimundarson hdl.)

Kærumál. Gæsluvarðhald. A. liður 1. mgr. 95. gr. laga nr. 88/2008.

Staðfestur var úrskurður héraðsdóms um að X skyldi sæta gæsluvarðhaldi á grundvelli a. liðar 1. mgr. 95. gr. laga nr. 88/2008 um meðferð sakamála.

Dómur Hæstaréttar.

Mál þetta dæma hæstaréttardómararnir Helgi I. Jónsson og Benedikt Bogason og Guðrún Erlendsdóttir settur hæstaréttardómari.

Varnaraðili skaut málinu til Hæstaréttar með kæru 14. nóvember 2014, sem barst réttinum ásamt kærumálsgögnum 17. sama mánaðar. Kærður er úrskurður Héraðsdóms Norðurlands eystra 13. nóvember 2014, þar sem varnaraðila var gert að sæta gæsluvarðhaldi allt til miðvikudagsins 19. nóvember 2014 klukkan 16 og einangrun meðan á því stendur. Kæruheimild er í l. lið 1. mgr. 192. gr. laga nr. 88/2008 um meðferð sakamála. Varnaraðili krefst þess aðallega að hinn kærði úrskurður verði felldur úr gildi, en til vara að gæsluvarðahaldinu verði markaður skemmri tími og að sér verði ekki gert að sæta einangrun meðan á því stendur.

Sóknaraðili krefst staðfestingar hins kærða úrskurðar.

Varnaraðili er undir rökstuddum grun um brot sem getur varðað fangelsisrefsingu samkvæmt 2. mgr. 257. gr. almennra hegningarlaga nr. 19/1940. Að þessu gættu, en að öðru leyti með vísan til forsendna hins kærða úrskurðar verður hann staðfestur.

Dómsorð:

Hinn kærði úrskurður er staðfestur.

Úrskurður Héraðsdóms Norðurlands eystra 13. nóvember 2014

Lögreglustjórinn á höfuðborgarsvæðinu krefst þess að sakborningi, X, kt. [...], verði gert að sæta gæsluvarðhaldi allt til miðvikudagsins 19. nóvember nk. kl. 16.  Þá er þess krafist að honum verði gert að sæta einangrun á meðan á gæsluvarðhaldinu stendur.

Sakborningur krefst þess að kröfunni verði hafnað, en til vara að henni verði markaður skemmri tími en krafist er og kröfu um einangrun hafnað.

Í greinargerð með kröfunni og rannsóknargögnum kemur fram að í fyrrinótt var fulltrúi sýslumannsins á [...], A, vakinn upp um þrjúleytið og var grímuklæddur maður fyrir utan.  A sagði honum að koma sér í burtu og ætlaði að láta lögreglu vita um þetta með morgninum.  Nokkru seinna vaknaði hann við hávaða.  Stóð bifreið hans í björtu báli.  Þá hringdi hann í Neyðarlínu.

Lögreglu var tilkynnt um eldinn klukkan 04:30 um nóttina.  Hún sá að eldurinn hafði verið tendraður með bensíni sem sett hafði verið í flösku og kveikt í því með efnisræmu (,,Molotov kokteill“) og vaknaði strax grunur um íkveikju.

Með bréfi til ríkissaksóknara í gær lýsti settur sýslumaður á [...] yfir vanhæfi sínu til að rannsaka málið þar sem ástæða væri til að ætla að atvik tengdust störfum A við rannsókn og saksókn sakamála við embættið.  Ríkissaksóknari fól lögreglustjóranum á höfuðborgarsvæðinu samdægurs að fara með rannsóknina, með vísan til 3. mgr. 21. gr. laga um meðferð sakamála nr. 88, 2008.

Í greinargerð rannsóknara kemur fram að fulltrúi sýslumanns hafi verið spurður hvort hann hefði átt í illindum við einhverja nýlega og hann þá nefnt tiltekinn mann.  Þessi maður hafi ítrekað komið við sögu lögreglu vegna ýmissa mála og sé talið að hann sé í nokkuð mikilli neyslu fíkniefna og lyfja.  Hann eigi sögu um nokkur mál þar sem hann hafi kveikt í bifreiðum.

Lögregla hafi rakið slóð tveggja manna frá vettvangi.  Á bifreiðastæði við fjölbýlishús í nágrenninu hafi sést að mennirnir hefðu stansað. Áfram hafi slóðin verið rakin uns hún endaði við [...] þar sem hafi verið nýleg hjólför.  Hafi mátt sjá að sporaslóðin hafi legið frá [...] í átt að [...] og til baka.

Um klukkan 11:40 í gær hafi lögregla farið heim til sakbornings og hitt þar sambýliskonu hans, sem hafi skýrt frá því að fyrrgreindur maður hefði dvalið þar síðastliðna daga. Lögregla hafi fundið og haldlagt tvö pör af skóm, sem hafi lyktað mjög af bensíni og komið heim og saman við skóför á vettvangi. Þá hafi nánar greind bifreið verið fyrir utan heimili sakbornings og telji lögregla að mynstur á hjólbörðum hennar samsvari hjólförum á vettvangi.

Sakborningur hafi verið handtekinn í gærkvöld, grunaður um aðild að málinu. Við yfirheyrslu fyrir lögreglu fyrr í dag hafi hann neitað sök, en ekki getað gert grein fyrir ferðum sínum aðfaranótt 12. nóvember og ekki heldur með hverjum hann hefði verið. Í málinu liggi fyrir hljóðupptaka á símtali sem sakborningur hafi átt við annan grunaðan rétt fyrir klukkan 3 um nóttina. Af upptökunni verði ráðið að sakborningur sé á hlaupum og hann segist vera á leið til bróður síns, en sá búi skammt frá vettvangi brotsins. Sakborningur hafi verið með kveikjuláslykil framangreindrar bifreiðar þegar hann hafi verið handtekinn. Sambýliskona hans hafi skýrt frá því að hann eigi annað skóparið sem haldlagt var. Vitni hafi skýrt frá því að það hafi ekið sakborningi frá heimili hans að nánar tilgreindum stað klukkan 8 að morgni 12 nóvember, til að sækja fyrrnefnda bifreið.

Rannsóknari segir að sakborningur sé nú undir rökstuddum grun um brot gegn 106. gr., 164. gr., 4. mgr. 220. gr. og 2. mgr. 257. gr. almennra hegningarlaga nr. 19, 1940.  Rannsókn málsins sé á frumstigi og því afar brýnt að honum verði gert að sæta varðhaldi vegna rannsóknarhagsmuna.  Gangi hann laus kunni hann að torvelda rannsóknina svo sem með því að hafa áhrif á aðra sakborninga og/eða koma undan munum sem kunni að hafa sönnunargildi.

Með vísan til þessa og a-liðar 1. mgr. 95. gr., 2. mgr. 98. gr. og b-liðar 1. mgr.  99. gr. laga nr. 88, 2008 sé þess krafist að krafan nái fram að ganga.

Með tilliti til framangreinds verður á það fallist að rökstuddur grunur beinist að sakborningi um framangreind brot.  Þá verður á það fallist að rannsóknarhagsmunir séu ríkir af því að sakborningur hafi ekki tækifæri til að hafa áhrif á aðra eða koma undan hugsanlegum sönnunargögnum í upphafi rannsóknar.  Eru því uppfyllt skilyrði a-liðar 1. mgr. 95. gr. laga nr. 88, 2008 fyrir því að sakborningur sæti gæsluvarðhaldi.

Samkvæmt þessu verður fallist á kröfuna.  Umbeðinn gæslutími þykir ekki vera úr hófi fram.  Þá ber að fallast á kröfu um að sakborningur sæti einangrun, sbr. 2. mgr. 98. gr. laga nr. 88, 2008.

Úrskurðinn kveður upp Erlingur Sigtryggsson héraðsdómari.

ÚRSKURÐARORÐ:

Sakborningur, X, sæti gæsluvarðhaldi allt til miðvikudagsins 19. nóvember nk., klukkan 16:00.

Sakborningur sæti einangrun í gæsluvarðhaldinu.