Mánudaginn 18. ágúst 2014.
Nr. 437/2014.	Maron ehf. (Guðjón Ármann Jónsson hrl.) gegn þrotabúi Perlufisks ehf. (Bjarni Lárusson hrl.)

 

Kærumál. Málskostnaður.

Staðfestur var úrskurður héraðsdóms þar sem mál þrotabús á hendur M ehf. var fellt niður og M ehf. gert að greiða þrotabúinu málskostnað tilgreindrar fjárhæðar.

 

Dómur Hæstaréttar

Mál þetta dæma hæstaréttardómararnir Ólafur Börkur Þorvaldsson, Eiríkur Tómasson og Þorgeir Örlygsson.

Sóknaraðili skaut málinu til Hæstaréttar með kæru 16. júní 2014 sem barst réttinum ásamt kærumálsgögnum 24. sama mánaðar. Kærður er úrskurður Héraðsdóms Reykjaness 3. júní 2014 þar sem mál varnaraðila á hendur sóknaraðila var fellt niður og sóknaraðila gert að greiða varnaraðila 75.300 krónur í málskostnað. Kæruheimild er í 4. mgr. 84. gr. laga nr. 90/1989 um aðför. Sóknaraðili krefst þess að úrskurður héraðsdóms um málskostnað varnaraðila til handa verði felldur úr gildi og sér úrskurðaður málskostnaður í héraði úr hendi varnaraðila auk kærumálskostnaðar.

Varnaraðili krefst þess aðallega að sóknaraðili greiði sér málskostnað í héraði að mati Hæstaréttar, til vara staðfestingar hins kærða úrskurðar en að því frágengnu að málskostnaður verði felldur niður. Í öllum tilvikum krefst hann kærumálskostnaðar.

Varnaraðili hefur ekki kært úrskurð héraðsdóms fyrir sitt leyti og kemur aðalkrafa hans því ekki til álita við úrlausn málsins hér fyrir dómi.

Með vísan til síðari málsliðar 3. mgr. 130. gr. laga nr. 91/1991, sbr. 2. mgr. 84. gr. laga nr. 90/1989 um aðför, og forsendna hins kærða úrskurðar verður hann staðfestur.

Sóknaraðili greiði varnaraðila kærumálskostnað eins og nánar greinir í dómsorði en við ákvörðun hans er tekið tillit til dæmds kærumálskostnaðar í samkynja málum aðila nr. 435/2014 og 436/2014.

Dómsorð:

Hinn kærði úrskurður er staðfestur.

Sóknaraðili, Maron ehf., greiði varnaraðila, þrotabúi Perlufisks ehf., 125.000 krónur í kærumálskostnað.

 

 

Úrskurður Héraðsdóms Reykjaness 3. júní 2014.

Aðfararbeiðni gerðarbeiðanda barst héraðsdómi Reykjaness 16. júní 2014. Málið var til úrskurðar 22. maí sl.

Gerðarbeiðandi er þrotabú Perlufisks ehf., kt. 661104-2440, Kirkjubraut 12, Akranesi.

Gerðarþoli er Maron ehf., kt. 460303-2140, Háseylu 16, Reykjanesbæ.

Dómkröfur gerðarbeiðanda voru þær að vöruflutningabifreiðin DH-693, af gerðinni Volvo FH12 6x4, ásamt öllu sem henni fylgdi og fylgja bæri, yrði tekin úr vörslum gerðarþola með beinni aðfarargerð og vörslur bifreiðarinnar fengnar Jóni Hauki Haukssyni hdl., umboðsmanni gerðarbeiðanda.

Þá krafðist gerðarbeiðandi þess að gerðarþola yrði gert að greiða málskostnað að mati dómsins.

Af hálfu gerðarþola var framangreindum kröfum gerðarbeiðanda mótmælt og þá var krafist málskostnaðar að mati dómsins.

Í þinghaldi hinn 22. maí síðastliðinn var þess krafist af hálfu gerðarbeiðanda að málið yrði fellt niður. Jafnframt krafðist gerðarbeiðandi málskostnaðar úr hendi gerðarþola að meðtöldum virðisaukaskatti, en til vara að málskostnaður yrði felldur niður. Af hálfu gerðarþola var málskostnaðarkrafa hans ítrekuð. Eftir að lögmenn aðila höfðu tjáð sig stuttlega var málið tekið til úrskurðar um málskostnaðarkröfur aðila og niðurfellingu málsins.

Með vísan til c-liðar 1. mgr. 105. gr. laga nr. 91/1991, sbr. 1. mgr. 84. gr. laga nr. 90/1989 um aðför, ber að fella mál þetta niður.

Málið var þingfest 4. febrúar sl. og var eftir það tekið fyrir alls fimm sinnum. Í ljósi þess, atvika málsins og þess að gerðarþoli upplýsti ekki með fullnægjandi hætti um málsatvik fyrr en skömmu áður en munnlegur málflutningur skyldi fara fram í málinu þykir rétt að stefndi greiði stefnanda 75.300 krónur í málskostnað að meðtöldum virðisaukaskatti. Við ákvörðun málskostnaðar er tekið tillit til tildæmds málskostnaðar í málum aðila nr. E-163/2014 og E-205/2014, sem varða sömu málsatvik og voru rekin voru samhliða þessu máli.

Ragnheiður Bragadóttir héraðsdómari kveður upp úrskurðinn.

Úrskurðarorð:

Mál þetta er fellt niður.

Gerðarþoli, Maron ehf., greiði gerðarbeiðanda, þrotabúi Perlufisks ehf., 75.300 krónur í málskostnað.