Ritið „Hæstiréttur og Háskóli Íslands: Rit til heiðurs Hæstarétti 100 ára„ var afhent við hátíðlega athöfn

Jón Atli Benediktsson, rektor Háskóla Íslands, færði Benedikt Bogasyni, forseta Hæstaréttar, ritið „Hæstiréttur og Háskóli Íslands: Rit til heiðurs Hæstarétti 100 ára“ við hátíðlega athöfn í gær. Háskóli Íslands ákvað að minnast aldarafmælis Hæstaréttar með því að standa fyrir útgáfu rits sem hefur að geyma safn 19 ritgerða á sviði réttarfars eftir fyrrverandi og núverandi aðstoðarmenn dómara við Hæstarétt.

Viðstödd athöfnina var ritnefnd bókarinnar, fyrrverandi forseti Hæstaréttar, varaforseti og skrifstofustjóri Hæstaréttar, forseti Lagadeildar og fulltrúi, Fons juris, útgefanda bókarinnar. Í ritnefnd sátu Kristín Benediktsdóttir, dósent við Lagadeild (ritstjóri), og þau Árni Kolbeinsson, Guðrún Erlendsdóttir og Markús Sigurbjörnsson sem öll eru fyrrverandi dómarar við Hæstarétt.